బాక్సింగ్ డే టెస్టులో అదరగొడుతూ,,,పుష్ప మార్క్ 'తగ్గేదే లే' సెలబ్రేషన్స్ చేసుకున్న నితీశ్

బోర్డర్ గవాస్కర్ ట్రోఫీతో టెస్టు క్రికెట్‌లో అరంగేట్రం చేసిన తెలుగు క్రికెటర్ నితీశ్ కుమార్ రెడ్డి.. తొలి హాఫ్ సెంచరీ నమోదు చేశాడు. ఈ సిరీస్‌లో ఇప్పటికే నాలుగు సార్లు తృటిలో హాఫ్ సెంచరీని చేజార్చుకున్న ఈ ప్లేయర్.. నాలుగో టెస్టులో మాత్రం ఆ మార్కును దాటేశాడు. బాక్సింగ్ డే టెస్టు మూడో రోజు ఆటలో జట్టు కష్టాల్లో ఉన్నప్పుడు క్రీజులోకి వచ్చిన ఈ ప్లేయర్.. కీలక ఇన్నింగ్స్ ఆడుతున్నాడు. ఈ క్రమంలోనే హాఫ్ సెంచరీ పూర్తి చేసుకుని తనదైన శైలిలో సెలబ్రేట్ చేసుకున్నాడు. పుష్ప సినిమాలోని 'తగ్గేదే లే' అన్నట్లుగా సంబురాలు చేసుకున్నాడు.

రిషభ్ పంత్ ఔట్ అయ్యాక.. 191/6 ఉన్నప్పుడు క్రీజులోకి వచ్చిన నితీశ్ రెడ్డి సాధికారికంగా బ్యాటింగ్ చేశాడు. ఈ సిరీస్‌లో 41, 38 నాటౌట్, 42, 42, 16 పరుగులు చేసిన నితీశ్.. ఈసారి మాత్రం ఫిఫ్టీ చేశాడు. జట్టు కష్టాల్లో ఉన్నప్పుడు క్రీజులోకి వచ్చి.. తన బ్యాటింగ్‌తో జట్టుకు ఫాలో ఆన్ ముప్పును తప్పించాడు. 8వ స్థానంలో బ్యాటింగ్‌కు దిగిన నితీష్ కుమార్ రెడ్డి.. తనదైన బ్యాటింగ్‌తో 81 బంతుల్లోనే ఈ ఫీట్ సాధించాడు. మిచెల్ స్టార్క్ వేసిన 83వ ఓవర్‌లో ఫోర్ కొట్టి హాఫ్ సెంచరీ మార్క్ అందుకున్నాడు. ఆ తర్వాత పుష్ప ట్రేడ్ మార్క్ సెలెబ్రేషన్.. 'నీ యవ్వ తగ్గేదేలే'అంటూ బ్యాట్‌తో ఫోజిచ్చాడు. పుష్ప సినిమాలో అల్లు అర్జున్ చేయితో ఈ సెలబ్రేషన్స్ చేసుకుంటే.. నితీశ్ మాత్రం బ్యాట్‌తో చేసుకున్నాడు. ఇందుకు సంబంధించిన దృశ్యాలు సోషల్ మీడియాలో వైరల్‌గా మారాయి.

ఈ వీడియో చూసిన నెటిజన్లు తెలుగు కుర్రాడు.. నితీశ్ ఆస్ట్రేలియా గడ్డపై తగ్గేదే లే అన్నట్లు దూసుకుపోతున్నాడని కామెంట్లు చేస్తున్నాడు. తెలుగోడి పవర్ అంటూ కొనియాడుతున్నారు. మరికొందరేమో.. నితీశ్ అంటే ఫైర్ అనుకుంటివా.. వైల్డ్ ఫైరూ అంటూ పోస్టులు పెడుతున్నారు.

కాగా బాక్సింగ్ డే టెస్టులో భారత్ తొలి ఇన్నింగ్స్‌లో మూడో రోజు రెండు సెషన్లు ముగిసే సరికి 326/7తో నిలిచింది. వర్షం అంతరాయం కలిగించడంతో మ్యాచ్ ఆగిపోయింది. భారత్ ఇంకా 148 పరుగులు వెనకబడి ఉంది. క్రీజులో నితీశ్ కుమార్ రెడ్డి (85), వాషింగ్టన్ సుందర్ (40)లు ఉన్నారు.