క్రికెట్‌ చరిత్రలోనే ఎవరికీ సాధ్యం కాని రికార్డు.. దక్షిణాఫ్రికా అరంగేట్ర ప్లేయర్‌ అద్భుతం

దక్షిణాఫ్రికా, పాకిస్థాన్ జట్ల మధ్య జరుగుతున్న తొలి టెస్టులో ఓ రికార్డు నమోదైంది. క్రికెట్‌ చరిత్రలోనే ఎవరికీ సాధ్యం కాని రికార్డును దక్షిణాఫ్రికా బౌలింగ్ ఆల్‌రౌండర్‌ కోర్బిన్ బాష్‌ సాధించాడు. తన అరంగేట్రం మ్యాచ్‌లోనే ప్రపంచ క్రికెట్‌లో తనకంటూ ఓ ప్రత్యేక పేజీని లిఖించుకున్నాడు. లేట్‌గా ఎంట్రీ ఇచ్చినా.. లేటెస్ట్‌గా తన అంతర్జాతీయ కెరీర్‌ను ప్రారంభించాడు. అరంగేట్రంలోనే నాలుగు వికెట్లు, హాఫ్‌ సెంచరీ సాధించిన ప్లేయర్‌గా రికార్డుల కెక్కాడు ఈ 30 ఏళ్ల ప్రొటీస్ ప్లేయర్‌.

దక్షిణాఫ్రికా, పాకిస్థాన్ జట్ల మధ్య సెంచూరియన్ వేదికగా టెస్టు మ్యాచ్‌ జరుగుతున్న విషయం తెలిసిందే. ఈ మ్యాచ్‌లో తొలి ఇన్నింగ్స్‌లో పాకిస్థాన్‌ 211 పరుగులకు ఆలౌట్ అయింది. అనంతరం బ్యాటింగ్ ప్రారంభించిన దక్షిణాఫ్రికా.. ఓ దశలో 213 పరుగులకే 8 వికెట్లు కోల్పోయి కష్టాల్లో పడింది. ఈ మ్యాచ్‌తోనే దక్షిణాఫ్రికా బౌలింగ్‌ ఆల్‌రౌండర్ కోర్బిన్ బాష్‌ అరంగేట్రం చేశాడు. అతడు 9వ స్థానంలో బ్యాటింగ్‌కు వచ్చాడు. అప్పటికే బౌలింగ్‌లో నాలుగు వికెట్లు తీసిన ఈ ప్లేయర్.. బ్యాటింగ్‌లోనూ సత్తాచాటాడు.

9వ స్థానంలో బ్యాటింగ్‌కు దిగిన కోర్బిన్ 93 బంతుల్లో 15 బౌండరీల సాయంతో 81 పరుగులు చేసి అజేయంగా నిలిచాడు. రబాడ (13), డేన్ పీటర్సన్‌ (12)తో కలిసి జట్టు స్కోరును 300 మార్కు దాటించాడు. అతడి ధాటికి దక్షిణాఫ్రికా 301 పరుగులకు ఆలౌట్ అయింది.

ఈ ఇన్నింగ్స్‌తో కోర్బిన్ బాష్‌ క్రికెట్‌ చరిత్రలోనే అరంగేట్రంలో నాలుగు వికెట్లు, అర్ధ శతకం సాధించిన తొలి ఆటగాడిగా రికార్డు క్రియేట్‌ చేశాడు. అంతేకాకుండా టెస్టుల్లో అరంగేట్ర మ్యాచ్‌లో 9వ స్థానంలో వచ్చి అత్యధిక స్కోరు చేసిన ఆటగాడిగానూ నిలిచాడు. అంతకుముందు ఈ రికార్డు శ్రీలంకకు చెందిన మిలన్ రత్నాయకే (72) పేరిట ఉంది. ఈ జాబితాలో భారత్‌కు చెందిన బల్వీందర్‌ సంధు (71), ఇంగ్లాండ్ ప్లేయర్‌ డారెన్ గోఫ్‌ (65), దక్షిణాఫ్రికాకు చెందిన జోండేకి (59) తర్వాతి స్థానాల్లో ఉన్నారు.

ఇక 90 పరుగుల లోటుతో రెండో ఇన్నింగ్స్‌ ప్రారంభించిన పాకిస్థాన్.. రెండో రోజు ఆట ముగిసే సమయానికి 3 వికెట్ల నష్టానికి 88 పరుగులు చేసింది. ఇంకా రెండు పరుగులు వెనకబడి ఉంది. ప్రపంచ టెస్టు ఛాంపియన్‌షిప్‌ పాయింట్ల పట్టికలో అగ్రస్థానంలో ఉన్న దక్షిణాఫ్రికా మరో మ్యాచ్‌ గెలిస్తే ఫైనల్ చేరినట్లే. అదే జరిగితే భారత్‌ ఫైనల్‌ చేరే అవకాశాలు సంక్లిష్టం అవుతాయి. అప్పుడు బోర్డర్ గవాస్కర్ ట్రోఫీలో ఆస్ట్రేలియాను ఓడించడంతో పాటు.. ఆసీస్‌పై శ్రీలంక కూడా గెలవాల్సి ఉంటుంది.