వరల్డ్‌ చెస్‌ ఛాంపియన్‌ కోనేరు హంపిపై ప్రశంసల వెల్లువ

తెలుగు చెస్ ప్లేయర్, భారత గ్రాండ్ మాస్టర్ కోనేరు హంపి చరిత్ర సృష్టించింది. ఫిడే మహిళల వరల్డ్ ర్యాపిడ్ చెస్ ఛాంపియన్‌గా అవతరించింది. ఈ మెగా టోర్నీలో హంపి 8.5 పాయింట్లతో అగ్రస్థానంలో నిలిచి విజేతగా నిలిచింది. న్యూయార్క్‌లోని వాల్‌ స్ట్రీట్‌లో జరిగిన 11వ రౌండ్‌లో హంపి ఐరీన్ సుకందర్‌ను ఓడించింది. తన ప్రదర్శనతో వరల్డ్‌ చెస్‌లో తనకంటూ ఓ ప్రత్యేక పేజీని లిఖించుకుంది.

కాగా కోనేరు హంపి మహిళల వరల్డ్ ర్యాపిడ్ చెస్ ఛాంపియన్‌గా నిలవడం ఇది రెండో సారి. ఐదేళ్ల క్రితం అంటే 2019లో హంపి తొలిసారి వరల్డ్‌ ర్యాపిడ్‌ చెస్‌ టైటిల్‌ను గెలుచుకుంది. దీంతో ఒకటి కంటే ఎక్కువ సార్లు వరల్డ్ ర్యాపిడ్ చెస్ టైటిళ్లను నెగ్గిన రెండో ప్లేయర్‌గా నిలిచింది. ఈ జాబితాలో చైనా గ్రాండ్‌మాస్టర్ జు వెంజున్ తర్వాత ఒకటి కంటే ఎక్కువసార్లు విజేతగా నిలిచింది. ఇక ఇవాళ జరిగిన ఇదే ఈవెంట్‌లో మరో తెలుగు గ్రాండ్‌మాస్టర్ ద్రోణవల్లి హారిక ఐదో స్థానంతో సరిపెట్టుకుంది.

మరోవైపు వరల్డ్‌ ర్యాపిడ్‌ చెస్‌ ఛాంపియన్‌ పురుషుల విభాగం విజేతగా రష్యాకు చెందిన 18 ఏళ్ల గ్రాండ్‌మాస్టర్‌ వోలోదర్ ముర్జిన్‌ అవతరించాడు. ముర్జిన్‌ 13 రౌండ్లలో 10 పాయింట్లు సాధించి విజేతగా నిలిచాడు. ఇదే టోర్నీలో పాల్గొన్న భారత గ్రాండ్‌మాస్టర్‌, తెలంగాణకు చెందిన అర్జున్‌ ఇరిగేశి ఐదో స్థానంతో సరిపెట్టుకున్నాడు. వాస్తవానికి తొమ్మిది రౌండ్లు పూర్తయ్యే వరకు అర్జున్ అగ్రస్థానంలోనే నిలిచాడు. కానీ చివరి రౌండ్లలో అనూహ్యంగా వెనకబడి పోయాడు.

ఇక ఫిడే మహిళల వరల్డ్ ర్యాపిడ్ చెస్ ఛాంపియన్‌గా నిలిచిన హంపిని ప్రముఖులు అభినందలనతో ముంచెత్తారు. కోట్ల మంది భారతీయులకు హంపి స్పూర్తిగా నిలుస్తోందని భారత ప్రధానమంత్రి నరేంద్ర మోదీ సంతోషం వ్యక్తం చేశారు. ఈ ఛాంపియన్ షిప్‌ను రెండుసార్లు దక్కించుకున్న తొలి భారతీయురాలిగా హంపి నిలవడం గర్వకారణమన్నారు.

ఏపీ సీఎం చంద్రబాబు నాయుడు కూడా హంపిని ప్రశంసించారు. ఆమె విజయం దేశానికే గర్వ కారణమన్నారు. 2024 మన దేశ చెస్‌ క్రీడాకారులకు మరిచిపోలేని సంవత్సరమని చంద్రబాబు నాయుడు పేర్కొన్నారు. మరోవైపు మహీంద్ర సంస్థల అధినేత ఆనంద్ మహీంద్రా కూడా హంపీ ఆటతీరుపై ప్రశంసల జల్లు కురిపించారు.