క్రికెట్ రౌండప్@ 2024.. కొన్ని తీపి గుర్తులు.. కొన్ని చేదు జ్ఞాపకాలు

2024 ముగిసేందుకు మరికొన్ని గంటలు మాత్రమే సమయం ఉంది. అయితే ఈ ఏడాది భారత్ క్రికెట్ జట్టుకు కొన్ని తీపి జ్ఞాపకాలను అందించింది.. అదే సమయంలో కొన్ని చేదు గుర్తులను ఇచ్చింది. తీపిగుర్తుల్లో ప్రధానంగా చెప్పుకోవాల్సింది టీ20 ప్రపంచకప్ 2024. సుదీర్ఘ విరామం తర్వాత భారత జట్టు టీ20 ప్రపంచకప్ టైటిల్ సాధించింది ఈ ఏడాదిలోనే. దీంతో 11 ఏళ్ల తర్వాత ఐసీసీ ట్రోఫీని సాధించింది. 2024 భారత క్రికెట్ రౌండప్..

టీ20 ప్రపంచకప్ 2024..

వన్డే ప్రపంచకప్ 2023 ఫైనల్‌లో ఓటమిపాలైన భారత్‌.. ఏడాది వ్యవధిలోనే మరో టోర్నీకి సిద్ధమైంది. కానీ గత కొన్నేళ్లుగా కీలక సమయంలో తేలిపోయి.. టైటిల్‌కు దూరమవుతూ వచ్చింది భారత్. కానీ టీ20 ప్రపంచకప్ 2024తో ఆ కల నెరవేరింది. కెప్టెన్‌గా రోహిత్ శర్మ భారత్‌కు టైటిల్ అందించాడు. ఆటగాడిగా ప్రపంచకప్ అందుకోని రాహుల్ ద్రవిడ్ కోచ్‌గా మాత్రం సక్సెస్ అయ్యాడు. భారత టైటిల్ సాధించాక.. టీ20లకు రోహిత్, కోహ్లీ, జడేజాలు గుడ్‌బై చెప్పేశారు.

గంభీర్ శకం మొదలు..

టీ20 ప్రపంచకప్ తర్వాత ద్రవిడ్ టీమిండియా హెడ్ కోచ్ బాధ్యతల నుంచి తప్పుకున్నాడు. అతడి స్థానంలో గౌతమ్ గంభీర్ నియమితుడయ్యాడు. కెప్టెన్ రోహిత్ టీ20లకు గుడ్ బై చెప్పడంతో కెప్టెన్ ఎంపిక అనివార్యమైంది. అయితే హార్దిక్ పాండ్యాను కాదని.. బీసీసీఐ సూర్యకుమార్ యాదవ్‌కు టీ20 జట్టు పూర్తి స్థాయి కెప్టెన్సీ బాధ్యతలు అప్పగించింది.

షాక్ ఇచ్చిన కివీస్..

వరుసగా రెండు పర్యాయాలు ప్రపంచ టెస్టు ఛాంపియన్ షిప్ ఫైనల్ చేరిన భారత్‌.. హ్యాట్రిక్ కొట్టాలని భావించింది. కానీ భారత ఆశలపై కివీస్ నీళ్లు చల్లింది. భారత గడ్డపై టీమిండియాను.. మూడు టెస్టుల్లోనూ ఓడించింది. దీంతో ఫైనల్ రేసులో భారత్ వెనకబడి పోయింది. స్వదేశంలో 12 ఏళ్ల తర్వాత భారత్ టెస్టు సిరీస్ ఓడిపోయింది. 24 ఏళ్ల తర్వాత భారత్‌లో ఓ టెస్టు సిరీస్‌లో వైట్ వాష్ అయింది.

ఐపీఎల్ వేలంలో రికార్డులు బద్దలు..

నవంబర్‌లో నిర్వహించిన ఐపీఎల్ 2025 మెగా వేలంలో రికార్డులు బద్దలయ్యాయి. రిషభ్ పంత్ రూ.27 కోట్ల ధర పలికి.. లీగ్ చరిత్రలోనే అత్యంత విలువైన ఆటగాడిగా నిలిచాడు. రూ.26.75 కోట్లతో శ్రేయస్ అయ్యర్ రెండో స్థానంలో నిలిచాడు. పేస్ ఆల్ రౌండర్ వెంకటేశ్ అయ్యర్ (రూ.23.75 కోట్లు) అనూహ్య ధర పలికాడు.

బోర్డర్ గవాస్కర్ ట్రోఫీలో వెనుకంజ..

గత రెండు పర్యాయాలు ఆస్ట్రేలియా గడ్డపై బోర్డర్ గవాస్కర్ ట్రోఫీ టైటిల్ సాధించిన భారత్ ఈసారి మాత్రం అందుకు దూరమైంది. నాలుగో టెస్టులో ఓడిపోయి.. సిరీస్‌లో 2-1తో వెనకబడి పోయింది. మిగిలిన మ్యాచులో గెలిస్తే.. మాత్రం సిరీస్‌ను టీమిండియా రిటైన్ చేసుకోనుంది. ఇదే సిరీస్‌లో మూడో మ్యాచ్ తర్వాత అశ్విన్ అంతర్జాతీయ క్రికెట్‌కు గుడ్‌బై చెప్పేసి.. అందర్నీ ఆశ్చర్య పరిచాడు.

ఐసీసీ చీఫ్‌గా జైషా..

బీసీసీఐ కార్యదర్శిగా ఉన్న జైషా.. ఇప్పుడు ఐసీసీ ఛైర్మన్ బాధ్యతలు చేపట్టారు. దీంతో అతి పిన్న వయసులో ప్రపంచ క్రికెట్‌ను శాసించే పదవికి ఎన్నికైన వ్యక్తిగా నిలిచారు. 36 ఏళ్ల వయసులోనే జైషా.. ఐసీసీ ఛైర్మన్‌గా బాధ్యతలు చేపట్టారు.