అందువల్లే రోహిత్ శర్మకు జట్టులో చోటు.. లేకపోతే వేటే..!: ఇర్ఫాన్ పఠాన్‌

గత కొన్ని రోజులుగా టెస్టుల్లో విఫలవమతున్న టీమిండియా కెప్టెన్ రోహిత్ శర్మ.. బోర్డర్ గవాస్కర్ ట్రోఫీలో పేలవ ప్రదర్శన చేస్తున్నాడు. ఈ సిరీస్‌లో తొలి టెస్టు ఆడని హిట్‌మ్యాన్‌ ఆ తర్వాత ఆడిన మూడు టెస్టుల్లోనూ కలిపి 31 రన్స్ మాత్రమే స్కోరు చేశాడు. బోర్డర్ గవాస్కర్ ట్రోఫీలో 3, 6, 10, 3, 9 స్కోర్లు నమోదు చేశాడు. సగటు 6.2గా ఉంది. జైశ్వాల్‌, నితీశ్‌ రెడ్డి లాంటి యువ ప్లేయర్లు రాణిస్తున్న ఇదే పిచ్‌లపై.. రోహిత్ మాత్రం పరుగులు చేసేందుకు తీవ్రంగా ఇబ్బంది పడుతున్నాడు. దీంతో అతడి ఆటతీరుపై విమర్శలు వస్తున్నాయి.

ముఖ్యంగా మెల్‌బోర్న్‌ టెస్టులో భారత్‌ ఓడిపోయాక.. అతడిని జట్టు నుంచి తప్పించాలనే డిమాండ్‌లు వినిపిస్తున్నాయి. మరికొందరేమో.. రోహిత్ ఇక.. టెస్టు ఫార్మాట్‌కు గుడ్‌బై చెప్పాల్సిన సమయం ఆసన్నమైందని పేర్కొంటున్నారు. ఈ నేపథ్యంలో టీమిండియా మాజీ క్రికెటర్‌ ఇర్ఫాన్ పఠాన్‌ కూడా రోహిత్ శర్మపై ఆసక్తికర వ్యాఖ్యలు చేశాడు. భారత జట్టు కెప్టెన్ కాకపోయి ఉంటే.. రోహిత్ శర్మ‌ను కచ్చితంగా తుది జట్టులో నుంచి తప్పించేవారని అన్నాడు. అతడి వల్ల జట్టు కూర్పు దెబ్బతింటోందని వ్యాఖ్యానించాడు.

“భారత జట్టు తరఫున దాదాపు 20 వేల పరుగులు చేసిన రోహిత్ శర్మ ఇప్పుడు పరుగులు చేసేందుకు తీవ్రంగా ఇబ్బంది పడుతున్నాడు. అతడు ఫామ్‌ను అందుకోలేకపోతున్నాడు. కెప్టెన్ కాబట్టే రోహిత్‌ తుది జట్టులో కొనసాగుతున్నాడు. కెప్టెన్ కాకపోతే.. రోహిత్ శర్మ తుది జట్టులో ఉండేవాడు కాదేమో. నిజానికి రోహిత్ శర్మ బ్యాటింగ్‌లో రాణించలేకపోతున్నాడు. అతడి వల్ల జట్టు కూర్పు దెబ్బతింటోంది. అతడు లేకపోతే.. భారత్‌కు మంచి కాంబినేషన్‌తో తుది జట్టు ఉండేది. ఓపెనర్లుగా కేఎల్ రాహుల్, యశస్వి జైశ్వాల్‌, వన్ డౌన్‌లో శుభ్‌మన్ గిల్ బరిలోకి దిగేవారు” అని ఇర్ఫాన్ పఠాన్ విశ్లేషించాడు.

కాగా బోర్డర్ గవాస్కర్ ట్రోఫీలో తొలి టెస్టుకు రోహిత్ శర్మ వ్యక్తిగత కారణాలతో దూరమయ్యాడు. జస్‌ప్రీత్ బుమ్రా సారథ్యంలో టీమిండియా ఆ మ్యాచ్‌లో చారిత్రాత్మక విజయాన్నందుకుంది. రెండో టెస్టు నుంచి రోహిత్ జట్టులోకి రాగా.. ఆడిన మూడు టెస్టుల్లో రెండిట్లో ఓడిపోయి.. ఒక దాన్ని డ్రా చేసుకుంది. రెండు, మూడో టెస్టులో ఆరో స్థానంలో వచ్చిన రోహిత్.. మెల్‌బోర్న్ టెస్ట్‌లో ఓపెనర్‌గా బరిలోకి దిగి రెండు ఇన్నింగ్స్‌ల్లో సింగిల్ డిజిట్‌కే పరిమితమయ్యాడు. దాంతో అతను రిటైర్మెంట్ ప్రకటించడం ఉత్తమమనే వాదనలు వినిపిస్తున్నాయి.