బంగారంపై బంపర్ రిటర్న్స్.. 2025లో తులం రూ. 90 వేలకు వెళ్తుందా? నిపుణులేం చెబుతున్నారు

బంగారం అంటే ఎవరికి ఇష్టం ఉండదు చెప్పండి. ముఖ్యంగా భారతీయులు పసిడి ప్రియులు. పండగలు.. వివాహాది శుభకార్యాలు.. ఇతర వేడుక ఏదైనా ముందు గుర్తొచ్చేది బంగారమే. సంక్షోభ సమయాల్లో.. అనిశ్చిత పరిస్థితుల్లో ఇది సురక్షిత పెట్టుబడి సాధనంగా పనిచేస్తుంది. ఎన్నో కారణాల వల్ల 2024 సంవత్సరంలో బంగారం ధర భారీగా పెరిగింది. అయితే వచ్చే సంవత్సరం కూడా ఇదే ధోరణి కొనసాగొచ్చని మార్కెట్ విశ్లేషకులు భావిస్తున్నారు. ఇప్పటిలానే భౌగోళిక, రాజకీయ అనిశ్చిత పరిస్థితులు, ఆర్థిక అస్థిర పరిస్థితులు కొనసాగితే.. దేశీయంగా 10 గ్రాముల బంగారం ధర రూ. 85 వేల వరకు చేరే అవకాశం ఉన్నట్లు చెబుతున్నారు. అయితే ఇది రూ. 90 వేలకు చేరినా ఆశ్చర్యపోవాల్సిన అవసరం లేదని చెబుతున్నారు.

>> ప్రస్తుతం దేశీయ మార్కెట్లో 10 గ్రాముల స్వచ్ఛమైన బంగారం ధర రూ. 79,350 వద్ద ట్రేడవుతోంది. ఎంసీఎక్స్‌లో (మల్టీ కమొడిటీ ఎక్స్చేంజీ) రూ. 76,600 పలుకుతోంది. అయితే.. బంగారంపై పెట్టుబడులు పెట్టిన వారికి 2024లో మంచి రిటర్న్స్ వచ్చాయి. ఏకంగా 23 శాతం పెరిగింది. అక్టోబర్ 30న రూ. 82,400 వద్ద ఆల్ టైమ్ గరిష్ట స్థాయిని చేరింది. వెండి కూడా 30 శాతం వృద్ధి నమోదు చేయడం విశేషం. ఈ సంవత్సరం మొదటిసారి కిలో వెండి ధర రూ. లక్ష మార్కు దాటింది కూడా. ఇక ఇంటర్నేషనల్ మార్కెట్లో చూస్తే.. ఈ సంవత్సరం ప్రారంభంలో ఔన్సుకు గోల్డ్ 2062 డాలర్ల వద్ద ఉండగా.. ఒక దశలో 2790 డాలర్ల స్థాయికి చేరింది. ప్రస్తుతం అది 2600 డాలర్ల లెవెల్స్‌లో ఉంది.

నిపుణులు ఏం చెబుతున్నారంటే?

ప్రస్తుత బాటలోనే 2025లో కూడా గోల్డ్.. మెరుగైన రాబడి అందించే అవకాశముందని మార్కెట్ విశ్లేషకులు భావిస్తున్నారు. ప్రస్తుత భౌగోళిక, రాజకీయ అనిశ్చిత పరిస్థితులు సహా కేంద్ర బ్యాంకులు పెద్ద మొత్తంలో గోల్డ్ కొనుగోలు చేస్తుండటం, వడ్డీ రేట్ల తగ్గింపు వంటివి దీనికి కారణంగా చెబుతున్నారు.

2024 సంవత్సరంతో పోలిస్తే పసిడి వృద్ధి కాస్త తగ్గొచ్చని LKP సెక్యూరిటీస్ వైస్ ప్రెసిడెంట్, రీసెర్చ్ అనలిస్ట్ జతిన్ త్రివేది చెప్పారు. పరిస్థితులు ఇలాగే ఉంటే.. గోల్డ్ రేటు దేశీయంగా రూ. 85 వేలకు చేరొచ్చని.. ఇంకా రాణిస్తే రూ. 90 వేలకు వెళ్లొచ్చని అన్నారు. వెండి గరిష్టంగా రూ. 1.25 లక్షల వరకు వెళ్లొచ్చని అంచనా వేస్తున్నారు.

>> మరోవైపు తక్కువ వడ్డీ రేట్లు ఉంటే మార్కెట్లోకి లిక్విడిటీ పెరిగి దీంతో డాలర్ బలహీనపడుతుందని.. అప్పుడు గోల్డ్‌కు డిమాండ్ పెరిగి రేట్లు పెరుగుతాయని విశ్లేషించారు త్రివేది. మరోవైపు ఫెడ్ అనుసరిస్తున్న వైఖరితో గోల్డ్ రేట్ల పెరుగుదల కాస్త తగ్గొచ్చని అన్నారు. కామ్ ట్రెండ్జ్ రీసెర్చ్ కోఫౌండర్, సీఈఓ జ్ఞానశేఖర్ త్యాగరాజన్ కూడా ఇదే విధంగా.. వచ్చే ఏడాది బంగారం వృద్ధిలో కాస్త మందగమనం ఉంటుందని అంచనా వేస్తున్నారు.

నాణేనికి మరో వైపు ఉన్నట్లు.. డొనాల్డ్ ట్రంప్ అమెరికా అధ్యక్షుడిగా రెండోసారి ఎన్నిక కాగా.. ఒకవైపు క్రిప్టో కరెన్సీ బిట్ కాయిన్ పరుగులు పెడుతోంది. ఇంకా బాండ్ల రాబడులు పెరగడం వల్ల మదుపరులు కొందరు బంగారానికి దూరంగా ఉండొచ్చన్న అంచనాలున్నాయి. అప్పుడు రేట్లలో అంతలా పెరుగుదల ఉండకపోవచ్చని అన్నారు.