గుడ్‌న్యూస్.. ఐటీఆర్ దాఖలు గడువు పొడిగింపు

ఇన్‌కమ్ ట్యాక్స్ చెల్లింపుదారులకు అదిరే శుభవార్త. ఆదాయపు పన్ను శాఖ కీలక నిర్ణయం తీసుకుంది. ఇన్‌కమ్ ట్యాక్స్ రిటర్నులు దాఖలు చేసేందుకు మరో అవకాశం కల్పించింది. బిలేటెడ్ ఐటీఆర్ లేదా రివైజ్డ్ ఐటీఆర్ ఫైల్ చేసేందుకు ఉన్న గడువును పొడిగిస్తున్నట్లు ప్రకటించింది. వాస్తవానికి ఈ గడువు డిసెంబర్ 31, 2024తో ముగియనుంది. ఈ క్రమంలో మరో 15 రోజుల పాటు అంటే జనవరి 15, 2025 వరకు అవకాశం కల్పిస్తూ కీలక నిర్ణయం తీసుకుంది. భారత నివాసితులు ఎరైనా జనవరి 15 వరకు బిలేటెడ్ లేదా రివైజ్డ్ ఐటీఆర్ ఫైల్ చేసేందుకు అవకాశం ఉంటుంది.

సాధారణంగా ప్రతి సంవత్సరం ఐటీఆర్ ఫైల్ చేసేందుకు జులై 31వ తేదీ వరకు గడువు ఉంటుంది. ఈ గడువులోపు రిటర్నులు ఫైల్ చేయని వారు జరిమానా చెల్లించి దాఖలు చేసేందుకు డిసెంబర్ 31 వరకు అవకాశం ఇస్తారు. అయితే, పలు కారణాలతో బిలేటెడ్ ఐటీఆర్ ఫైల్ చేయలేని వారికి మరో అవకాశం ఇస్తూ జనవరి 15, 2025 వరకు అవకాశం ఇచ్చింది. ఐటీఆర్ ఫైల్ చేయని వారు జరిమానా చెల్లించి జనవరి 15 వరకు ఫైల్ చేసేందుకు అవకాశం లభించింది. గడువులోపు ఐటీఆర్ సమర్పించినా ఏవైనా తప్పులు ఉండి మార్చుకోవాలనుకునే వారికి సైతం రివైడ్జ్ రిటర్న్స్ దాఖలు చేయాలనుకునే వారు ఈ సదుపాయాన్ని ఉపయోగించుకోవచ్చు.

గత ఆర్థిక సంవత్సరం 2023- 24 (అసెస్మెంట్ ఇయర్ 2024- 25) సంబంధించిన ఐటీ రిటర్నులు ఫైలింగ్‌కు జులై 31తో గడువు ముగిసింది. ఏదైనా కారణంతో ఫైల్ చేయని వారికి చివరి అవకాశంగా ఆగస్టు 1 నుంచి డిసెంబర్ 31 వరకు లేట్ రిటర్నులు ఫైల్ చేయవచ్చు. వీటినే బిలేటెడ్ రిటర్నులుగా పేర్కొంటారు. బిలేటెడ్ ఐటీఆర్ ఫైల్ చేసేందుకు వార్షిక ఆదాయం రూ. 5 లక్షల లోపు ఉన్నట్లయితే రూ. 1000 జరిమానా చెల్లించాలి. అదే వార్షిక ఆదాయం రూ. 5 లక్షల పైన ఉంటే రూ.5 వేల వరకు ఫైన్ చెల్లించాల్సి ఉంటుంది. కొన్ని సందర్భాల్లో బకాయిలపై వడ్డీ, పెనాల్టీలు సైతం కట్టాల్సి వస్తుంది. జనవరి 15 వరకు బిలేటెడ్ ఐటీఆర్ ఫైల్ చేయలేకపోతే వ్యాపారం, మూలధన నష్టాలు వంటి వాటిని తదుపరి సంవత్సరాలకు సర్దుబాటు చేసుకోలేరు. అలాగే కొత్త పన్ను విధానంలోనే రిటర్నులు ఫైల్ చేయాల్సి ఉంటుంది. కొన్ని ప్రత్యేక కేసుల్లో జైలు శిక్ష పడే అవకాశం ఉంటుంది.