గోధుమ పిండికి పురుగు పడుతోందా..? ఇలా చేస్తే ఎక్కువ కాలం తాజాగా ఉంటుంది..

చాలా మంది ఇళ్లల్లో మార్నింగ్ బ్రేక్‌ఫాస్ట్‌, నైట్ డిన్నర్‌లో చపాతీలను ఆహారంగా తీసుకుంటారు. కొందరు బరువు తగ్గాలనుకునేవారు రాత్రి సమయాల్లో చపాతీలు మాత్రమే తింటారు. చపాతీలు తినడం వల్ల ఆరోగ్య ప్రయోజనాలు ఉన్నాయి. కార్బోహైడ్రేట్స్ ఎక్కువగా ఉండటం వల్ల చపాతీలు తినడం వల్ల రోజుకు సరిపడా శక్తి లభిస్తుంది. ఇమ్యూనిటీ పవర్ పెరుగుతుంది. పాత రోజుల్లో గోధుమల్ని శుభ్రం చేసి.. ఎండ బెట్టి పిండిని ఇంట్లోనే తయారు చేసుకునేవారు. ఇప్పుడు రోజులు మారిపోయాయి. మార్కెట్లో దొరికే పిండితో చపాతీలు చేసుకుంటున్నారు.

చాలా మంది ఎక్కువ మోతాదులో గోధుమ పిండి తెచ్చి నిల్వ ఉంచుకుంటారు. అయితే, రోజులు గడిచే కొద్ది పిండికి పురుగు పట్టడం మనం గమనించవచ్చు. దీంతో.. చాలా మంది ఆ పిండిని పారేస్తుంటారు. లేదంటే జల్లెడ పట్టించి వాడుకుంటారు. అయితే, పురుగుపట్టడమే కాకుండా అప్పుడప్పుడూ పిండి వాసన వస్తుంటుంది. ఇలాంటప్పుడు కచ్చితంగా పిండిని పారేయాల్సిందే. అందుకే కొన్ని చిట్కాలు ఫాలో అయితే గోధుమ పిండిని ఎక్కువ రోజుల పాటు తాజాగా ఉంచవచ్చు. ఇంతకీ ఆ చిట్కాలేంటో ఇక్కడ తెలుసుకుందాం.

గోధుమ పిండిని గది ఉష్ణోగ్రత వద్ద వంటగది క్యాబినెట్‌లో నిల్వ చేసుకోవచ్చు. ఇందుకోసం గాలి చొరబడని, తేమ బారిన పడని జాడీలు లేదా గాజు పాత్రలు ఎంపిక చేసుకోవాలి. వీటిలో నిల్వ చేయడం వల్ల 3 నెలలు పిండి తాజాగా, ఫ్రెష్‌గా ఉంటుందని నిపుణులు చెబుతున్నారు. గోధుమ పిండి షెల్ఫ్‌లో ఉండేలా చూసుకోవాలి. ప్లేసులు మార్చుతూ ఉండటం వల్ల గోధుమ పిండి పాడయ్యే ప్రమాదముంది. అందుకే ఒకే ప్రాంతంలో ఉంచడం మంచిది.

బిర్యానీ ఆకులు..

మనం బిర్యానీ, వంటల్లో ఉపయోగించే బిర్యానీ ఆకుల్లో ఇంటి చిట్కాల్లో ప్రభావవంతంగా పనిచేస్తాయి. ఈ బిర్యానీ ఆకులు గోధుమ పిండికి పురుగులు పట్టకుండా చేయడంలో సాయపడతాయి. ఇందుకోసం మూడు నుంచి నాలుగు బిర్యానీ ఆకులు తీసుకోండి. ఆ తర్వాత గోధుమ పిండి స్టోర్ చేసిన డబ్బాలో వేయండి. ఇలా చేయడం వల్ల పురుగులు పట్టకుండా ఎక్కువ రోజులు నిల్వ ఉంచుకోవచ్చు.

లవంగాలు..

బిర్యానీ ఆకుల్లాగే.. లవంగాలు కూడా గోధుమ పిండికి పురుగు పట్టకుండా చేయడంలో సాయపడతాయి. ఇందుకోసం కొన్ని లవంగాల్ని తీసుకుని గోధుమ పిండి స్టోర్ చేసిన కంటైనర్ లేదా డబ్బాలో వేయండి. లవంగాల ఘాటు వాసనకు పురుగులు గోధుమ పిండి దగ్గరకు రావడానికే జంకుతాయి. దీంతో.. గోధుమ పిండి ఎక్కువ రోజులు తాజాగా ఉంటుంది.

ఫ్రిజ్‌లో నిల్వ చేయవచ్చు..

గోధుమ పిండిని సాధారణ ఉష్ణోగ్రత వద్ద 3 నెలల పాటు నిల్వ ఉంచవచ్చు. కానీ అది రిఫ్రిజిరేటర్లో నిల్వ చేయబడితే, దాని షెల్ప్ జీవితం 6 నెలల వరకు పెరుగుతుంది. ఇందుకోసం గాలి చొరబడని కంటైనర్ లేదా సీసాలో గోధుమ పిండి నిల్వ చేసి ఫ్రిజ్‌లో స్టోర్ చేయండి. అయితే, ఈ పిండి వాడే ముందు ఫ్రిజ్‌లో నుంచి తీసి కాసేపు పక్కన పెట్టండి.

పిండి స్టోర్ చేసేటప్పుడు ఈ తప్పులు చేయకండి..

* చాలా మంది కొత్త పిండి తీసుకువచ్చినప్పుడు.. పాత గోధుమ పిండి ఉన్న డబ్బాలో అలానే కలిపి స్టోర్ చేస్తారు. ఇలా చేయడం వల్ల పిండి పాడయ్యే అవకాశం ఉంది. అందుకే వేర్వేరు డబ్బాల్లో స్టోర్ చేయండి.

* ఇక, స్టోర్ చేసే డబ్బాల్లో తేమ లేకుండా చూసుకోండి. ఒక వేళ తేమ ఉంటే పిండి త్వరగా పాడవుతుంది. డబ్బాలు లేదా గాజు సీసాల్లో స్టోర్ చేసేటప్పుడు వాటిని కడిగి.. పొడి గుడ్డతో తేమ లేకుండా శుభ్రంగా తుడవండి. ఆ తర్వాత కాసేపు ఆరబెట్టండి. ఆ తర్వాత మాత్రమే పిండి నిల్వ చేయాలి.

* గోధుమ పిండిని వంటగదిలో చీకటి ప్రాంతాల్లో గది ఉష్ణోగ్రత వద్ద నిల్వ చేయండి. అంతేకానీ.. సూర్య రశ్మి తగిలేలా మాత్రం నిల్వ చేయకండి. ఇలా చేయడం వల్ల పిండి నాణ్యత తగ్గిపోయే ప్రమాదముంది.