మెల్‌బోర్న్ ఓటమి తర్వాత భారత ఆటగాళ్లకు క్లాస్‌ పీకిన గంభీర్‌

బోర్డర్‌ గవాస్కర్‌ ట్రోఫీని వరుసగా మూడోసారి గెలిచి.. డబ్ల్యూటీసీ ఫైనల్‌కు వరుసగా మూడోసారి వెళ్లాలనే లక్ష్యంతో ఆస్ట్రేలియా గడ్డపై అడుగుపెట్టిన భారత్‌కు ఆశాభావం ఎదురయ్యేలా ఉంది. ఇప్పటికే టెస్టు సిరీస్ గెలిచే అవకాశం కోల్పోగా.. సిడ్నీ టెస్టులో ఓడిపోతే.. డబ్ల్యూటీసీ ఫైనల్ అవకాశాలు కూడా ఆవిరైపోతాయి. మెల్‌బోర్న్‌ టెస్టులో ఓడిపోయిన భారత్.. నాలుగు మ్యాచ్‌లు ముగిసే సరికి సిరీస్‌లో 1-2తో వెనకబడి పోయింది.

 బాక్సింగ్ డే టెస్టు తర్వాత టీమిండియా డ్రెస్సింగ్‌ రూమ్‌లో వాతావరణ వేడెక్కినట్లు తెలుస్తోంది. టీ20 ప్రపంచకప్‌ 2024 తర్వాత భారత హెడ్‌కోచ్‌గా గంభీర్ బాధ్యతలు చేపట్టిన విషయం తెలిసిందే. అప్పటి నుంచి భారత్‌ మిశ్రమ ఫలితాలు అందుకుంటోంది. ముఖ్యంగా శ్రీలంక చేతిలో వన్డే సిరీస్‌.. సొంతగడ్డపై న్యూజిలాండ్ చేతిలో టెస్టు సిరీస్‌ క్లీన్ స్వీప్ కావడంతో కెప్టెన్, హెడ్‌కోచ్‌పై విమర్శలు వచ్చాయి. దానికి తోడు బోర్డర్ గవాస్కర్ ట్రోఫీలో కూడా భారత్‌ ఆశించిన మేర రాణించకపోవడంతో తీవ్ర ఒత్తిడిలో ఉన్న హెడ్‌కోచ్ గంభీర్.. ఆటగాళ్లపై ఆసంతృప్తి వ్యక్తం చేసినట్లు తెలుస్తోంది.

బాక్సింగ్ డే టెస్టులో ఓటమి తర్వాత డ్రెస్సింగ్‌ రూమ్‌కు తిరిగివచ్చిన ఆటగాళ్లపై గంభీర్‌ ఆగ్రహం వ్యక్తం చేసినట్లు వార్తలు వస్తున్నాయి. “ఇక చేసింది చాలు” అని గంభీర్‌ అన్నట్లు తెలుస్తోంది. ముఖ్యంగా కొందరు ఆటగాళ్లు పేలవ షాట్లు ఆడి.. ఔట్‌ కావడంపై గంభీర్.. ఆగ్రహం వ్యక్తంచేసినట్లు సమాచారం. టీమిండియా హెడ్‌కోచ్‌గా బాధ్యతలు చేపట్టిన తర్వాత ఆటగాళ్లు వారి మార్గాల్లోనే ఆడేందుకు గంభీర్‌ అంగీకరించాడట. కానీ ఈ ఆరు నెలల కాలంలో అనుకున్న ఫలితాలు రాకపోవడంతో.. తన పంథా మార్చాలని అతడు భావిస్తున్నట్లు తెలుస్తోంది. దీంతో ఇప్పటినుంచి జట్టు వ్యూహాలకనుగుణంగా ఆడనివారిపై వేటు వేసే దిశగా చర్యలు ఉంటాయని గంభీర్.. ఆటగాల్లకు సంకేతాలు ఇచ్చాడట.

ఇక కివీస్‌ చేతిలో క్లీన్‌ స్వీప్, ఆస్ట్రేలియా పర్యటనలో ఆశించిన మేర జట్టు రాణించకపోవడంపై బీసీసీఐ దృష్టిసారించినట్లు తెలుస్తోంది. కొన్ని రోజులుగా జట్టు ప్రదర్శనపై తీవ్ర అసంతృప్తిగా ఉన్న బీసీసీఐ యాజమాన్యం.. కెప్టెన్‌ రోహిత్‌ శర్మ, హెడ్‌ కోచ్‌ గౌతమ్‌ గంభీర్‌లను ఈ విషయంపై ప్రశ్నించే అవకాశం ఉన్నట్లు వార్తలు వస్తున్నాయి. బోర్డర్ గవాస్కర్ ట్రోఫీ తర్వాత బీసీసీఐ పెద్దలు.. కెప్టెన్, కోచ్‌తో మాట్లాడి వివరణ తీసుకోనున్నట్లు తెలుస్తోంది.

కాగా బోర్డర్‌ గవాస్కర్ ట్రోఫీలో నాలుగు మ్యాచ్‌లు ముగిసే సరికి భారత్‌ 1-2తో వెనకబడి పోయింది. సిరీస్‌ రిటైన్ చేసుకోవాలన్నా.. డబ్ల్యూటీసీ ఫైనల్ ఆశలు సజీవంగా ఉంచుకోవాలన్నా.. చివరి టెస్టులో గెలవాల్సిందే. జనవరి 3 నుంచి ఐదో టెస్టు ప్రారంభం కానుంది.