గంభీర్ పట్టుబట్టినా ఆస్ట్రేలియాతో టెస్టులకు పుజారాను ఎంపిక చేయని సెలక్టర్లు

మెల్‌బోర్న్‌ టెస్టులో ఓటమి తర్వాత టీమిండియా కెప్టెన్ రోహిత్ శర్మ, హెడ్‌కోచ్‌ గౌతమ్‌ గంభీర్‌పై విమర్శలు వస్తున్నాయి. రాహుల్ ద్రవిడ్‌ హయాంలో భారత జట్టు మెరుగైన ప్రదర్శన చేసిందని.. కానీ రోహిత్-గంభీర్ హయాంలో దారుణంగా విఫలమవుతోందనే వాదనలూ ఉన్నాయి. జట్టు ఎంపిక నుంచి.. డ్రెస్సింగ్‌ రూమ్‌లో వాతావరణం, ప్రాక్టీస్ సెషన్స్ వంటివి సరిగా లేదనే విమర్శలు వస్తున్నాయి. ఇలాంటి సమయంలోనే గంభీర్‌, భారత సెలక్షన్‌ కమిటీ మధ్య ఓ ఆసక్తికర చర్చ జరిగినట్లు తెలుస్తోంది. బోర్డర్ గవాస్కర్ ట్రోఫీలో చెతేశ్వర్ పుజారాను ఆడించాలని గంభీర్‌ పట్టుబట్టినట్లు సమాచారం. కానీ సెలక్టర్లు మాత్రం 36 ఏళ్ల పుజారాను పరిగణలోకి తీసుకోలేదని తెలుస్తోంది.

ఆస్ట్రేలియాతో బోర్డర్ గవాస్కర్ ట్రోఫీలో టీమిండియా వెటరన్ ప్లేయర్‌.. చెతేశ్వర్‌ పుజారా సేవలు వినియోగించుకోవాలని గంభీర్‌ సూచినట్లు తెలుస్తోంది. కానీ భారత సెలక్టర్లు మాత్రం.. గంభీర్ సూచనను తిరస్కరించినట్లు సమాచారం. పుజారాకు ఆస్ట్రేలియా గడ్డ ఆడిన అనుభవం జట్టుకు ఉపయోగడపుతుందని, తద్వారా జట్టుకు స్థిరత్వాన్ని తీసుకొస్తాడని గంభీర్‌ చెప్పినట్లు తెలుస్తోంది. పెర్త్ టెస్టులో భారత్‌ గెలిచిన తర్వాత కూడా గంభీర్.. పుజారాను తీసుకోవాలని సిఫార్సు చేయగా.. సెలక్షన్‌ కమిటీ మాత్రం ససేమిరా అన్నట్లు వార్తలు వస్తున్నాయి.

వాస్తవానికి ఆస్ట్రేలియా గడ్డపై ఘనమైన చరిత్ర కాగా పుజారాకు మెరుగైన రికార్డు ఉంది. గత రెండు పర్యాయాలు.. భారత జట్టు ఆస్ట్రేలియాలో 2-1తో టెస్టు సిరీస్ గెలిచిందంటే.. అందులో పుజారా పాత్ర కూడా ఎంతో ఉంది. 2018-19 బోర్డర్‌ గావస్కర్‌ ట్రోఫీ సిరీస్‌లో చెతేశ్వర్‌ పుజారా 1258 బంతులు ఎదుర్కొని.. 521 పరుగులు చేశాడు. ఈ సిరీస్‌లో టీమిండియా తరఫున టాప్‌ స్కోరర్‌గా నిలిచాడు. ఆస్ట్రేలియా గడ్డపై తొలిసారి సిరీస్‌ గెలవడంలో కీలకపాత్ర పోషించాడు. ఇక 2020-21 సీజన్‌లోనూ సత్తాచాటాడు. కోహ్లీ లాంటి ప్లేయర్‌ లేకపోయినా.. యువ ఆటగాళ్లతో కూడిన భారత బ్యాటింగ్‌ యూనిట్‌ను నడిపించాడు.

మొత్తంగా ఆస్ట్రేలియాలో 11 టెస్టు మ్యాచ్‌లు ఆడాడు పుజారా. అందులో ఏకంగా 47.28 సగటుతో 993 పరుగులు చేశాడు. పుజారా చివరగా 2023లో భారత్ తరఫున టెస్టు మ్యాచ్ ఆడాడు. ప్రపంచ టెస్టు ఛాంపియన్ షిప్‌ 2023 ఫైనల్‌లో 14, 27 పరుగులు చేశాడు. ఆ తర్వాత అతడిని బీసీసీఐ సెలక్టర్లు పట్టించుకోలేదు. ఇంగ్లాండ్‌లోని కౌంటీల్లో.. దేశవాళీ ట్రోఫీల్లో సత్తాచాటినా.. అతడిని మాత్రం ఎంపిక చేయకపోవడం గమనార్హం. అయితే, జట్టులో చోటు దక్కకోపోవడంతో పుజారా ప్రస్తుతం జరుగుతున్న బోర్డర్ గవాస్కర్‌ ట్రోఫీలో హిందీ కామెంటేటర్‌గా వ్యవహరిస్తున్నాడు.