ఒకటో తేదీ ఊరట.. మారిన గ్యాస్ రేట్లు.. 14.2 కిలోలు, 19 కిలోల గ్యాస్ సిలిండర్ లేటెస్ట్ ధరలివే

2025 జనవరి 1న ఆయిల్ మార్కెటింగ్ కంపెనీలు (OMCs) కీలక ప్రకటన చేశాయి. కమర్షియల్ 19 కేజీల ఎల్‌పీజీ సిలిండర్ ధరల్ని తగ్గించాయి. ముఖ్యంగా మెట్రో సిటీల్లో ఈ ధరలు తగ్గుముఖం పట్టాయి. కమర్షియల్ అంటే వాణిజ్య సిలిండర్ అని చెప్పొచ్చు. ఇది బయట హోటల్స్, రెస్టారెంట్లలో ఎక్కువగా వాడుతుంటారు. కమర్షియల్ గ్యాస్ సిలిండర్ ధరలు తగ్గినప్పటికీ.. ఇంట్లో వంట కోసం వినియోగించే గృహ వినియోగ గ్యాస్ సిలిండర్ ధరల్లో ఎలాంటి మార్పు లేదు. ఇది దేశంలోని అన్ని ప్రాంతాల్లో ఇప్పటికీ స్థిరంగానే ఉంది. గత కొంత కాలంగా ఈ డొమెస్టిక్ గ్యాస్ సిలిండర్ ధరల్ని కేంద్రం మార్చట్లేదన్న సంగతి తెలిసిందే. మరోవైపు కమర్షియల్ గ్యాస్ సిలిండర్ రేట్లను దాదాపు ప్రతి నెలా సవరిస్తూనే ఉంది. స్వల్పంగా పెంచడం లేదా తగ్గించడం చేస్తోంది.

ఇప్పుడు ప్రధాన మెట్రో నగరాల్లో వాణిజ్య గ్యాస్ సిలిండర్ ధరల్ని రూ. 14.5 నుంచి రూ. 16 వరకు తగ్గించింది. దేశ రాజధాని ఢిల్లీలో రూ. 14.5 తగ్గించి 19 కిలోల కమర్షియల్ గ్యాస్ సిలిండర్ ధరను రూ. 1804 కు చేర్చింది. అయితే వరుసగా గత 5 నెలలుగా కమర్షియల్ గ్యాస్ రేట్లను పెంచగా.. ఇప్పుడు తగ్గించడం గమనార్హం. దేశ ఆర్థిక రాజధాని ముంబైలో ఈ గ్యాస్ సిలిండర్ ధర రూ. 1771 నుంచి రూ. 1756 కు తగ్గింది. చెన్నైలో 19 కిలోల గ్యాస్ సిలిండర్ ధర రూ. 1966 గా ఉండగా.. కోల్‌కతాలో ఇది రూ. 1911 గా ఉంది.

ఇక హైదరాబాద్ నగరంలో వాణిజ్య గ్యాస్ సిలిండర్ ధర రూ. 16 తగ్గగా రూ. 2044 నుంచి ఇప్పుడు రూ. 2028కి దిగొచ్చింది. అంతకుముందు ఇక్కడ వరుసగా రూ. 16, రూ. 61, రూ. 48, రూ. 38, రూ. 8.50 ఇలా పెరుగుకుంటూ పోయింది. 2024, జులై 1 సమయంలో ఈ ధర రూ. 1872.50 గానే ఉండగా.. ఈ 5 నెలల కాలంలో రూ. 2 వేల పైకి చేరింది. అయితే ప్రధాన మెట్రో నగరాల్లో చూస్తే.. ఈ వాణిజ్య గ్యాస్ సిలిండర్ ధరలు హైదరాబాద్‌లోనే ఎక్కువగా ఉన్నాయని చెప్పొచ్చు.

కమర్షియల్ గ్యాస్ సిలిండర్ రేట్లు ఇలా ఉన్నప్పటికీ.. డొమెస్టిక్ గ్యాస్ సిలిండర్ రేట్లను మాత్రం అస్సలు మార్చలేదు. అసలు ఇవి చివరిసారిగా మార్చిలో దేశవ్యాప్తంగా అన్ని చోట్లా రూ. 100 తగ్గింది. అప్పుడు మహిళా దినోత్సవం సందర్భంగా కేంద్రం ఒక్కసారిగా రూ. 100 తగ్గించింది. దానికి ముందటి ఏడాది రాఖీ సందర్భంగా రూ. 200 తగ్గించిన సంగతి తెలిసిందే. దీంతో ప్రస్తుతం 14.2 కిలోల డొమెస్టిక్ గ్యాస్ సిలిండర్ ధర హైదరాబాద్ నగరంలో రూ. 855 గా ఉంది.

ఇదే ఢిల్లీలో చూస్తే రూ. 803 గా ఉంది. కోల్‌కతాలో రూ. 803, ముంబైలో రూ. 802.50, చెన్నైలో రూ. 818.50 గా ఉన్నాయి. ఇక ప్రధాన మంత్రి ఉజ్వల యోజన పథకం కింద అర్హులైన వారికి గ్యాస్ సిలిండర్‌పై రూ. 300 రాయితీ లభిస్తుంది. ఇక ఇదే సమయంలో ఎయిర్ టర్బైన్ ఫ్యూయెల్ లేదా జెట్ ఫ్యూయెల్ ధరను కిలో లీటరుపై రూ. 1401 తగ్గించింది. ప్రస్తుతం కిలోలీటరుకు ఇది రూ. 90,455.47 గా ఉంది.