కొత్త ఏడాదిలో కొత్త రూల్స్.. యూపీఐ లిమిట్, వీసా, కార్ల ధరలు సహా మొత్తం మారేవి ఇవే

ఆర్థిక సంబంధిత విషయాల్లో ఎప్పుడూ రూల్స్ మారుతుంటాయని చెప్పొచ్చు. ఇప్పటికే గతేడాది చాలానే ఆర్థిక మార్పులు వచ్చాయి. కొత్త ఏడాదిలో కూడా ఇదే ఒరవడి కొనసాగనుంది. ఇప్పుడు 2025 సంవత్సరంలోకి అడుగుపెట్టిన నేపథ్యంలో ఇప్పుడు జనవరి 1 నుంచి చాలానే మార్పులు వచ్చాయి. ఇందులో.. కార్ల ధరల పెంపు సహా వీసా నిబంధనల్లో మార్పులు.. అమెజాన్ ప్రైమ్ సబ్‌స్క్రిప్షన్ విషయంలో కొత్త రూల్స్ వంటివి ఎన్నో అమల్లోకి వచ్చేశాయి. ఇవి మనపై ఏదో రకంగా ప్రభావం చూపేవే అని గుర్తుంచుకోవాలి. ఇప్పుడు దేంట్లో ఎలాంటి మార్పులు వచ్చాయో తెలుసుకుందాం.

>> కొత్త సంవత్సరంలో .. పాత స్మార్ట్‌ఫోన్లకు తన మెసేజింగ్ సేవల్ని వాట్సాప్ నిలిపివేస్తోంది. ఆండ్రాయిడ్‌కు చెందిన శాంసంగ్ గెలాక్సీ S3, మోటో జీ, HTC వన్ ఎక్స్, మోటో రేజర్ HD, LG ఆప్టిమస్ జీ, సోనీ ఎక్స్‌పీరియా Z వంటి ఫోన్లకు వాట్సాప్ సపోర్ట్ నేటి నుంచి నిలిచిపోనుంది.

>> వివిధ కార్ల తయారీ కంపెనీలు కార్ల ధరల్ని కొత్త సంవత్సరంలో పెంచనున్నట్లు గతేడాదే ప్రకటించాయి. ఇక కొత్త ధరలు నేటి నుంచే అమల్లోకి వచ్చాయి. మారుతీ సుజుకీ, మహీంద్రా, హ్యుందాయ్, MGE మోటార్స్, టాటా మోటార్స్, హోండా ఇండియా, ఆడీ, మెర్సిడెస్ బెంజ్ వంటివి దీంట్లో ఉన్నాయి.

>> కేంద్రం ఒక రాష్ట్రం.. ఒక గ్రామీణ బ్యాంకు నినాదంతో.. ఆంధ్రప్రదేశ్ గ్రామీణ వికాస్ బ్యాంకుకు చెందిన తెలంగాణలోని బ్రాంచ్‌లన్నీ.. తెలంగాణ గ్రామీణ బ్యాంకులో విలీనమయ్యాయి. ఇది నేటి నుంచే అమలైంది. APGVB .. తెలుగు రాష్ట్రాల్లో 771 శాఖలతో సేవలందిస్తుండగా.. తెలంగాణలోని 493 బ్రాంచ్‌లు టీజీబీలో విలీనమయ్యాయి. దీంతో దేశంలోని అతిపెద్ద గ్రామీణ బ్యాంకుల్లో ఒకటిగా టీజీబీ అవతరించింది.

>> అమెజాన్ ప్రైమ్ వీడియో యూజర్స్.. ఏ డివైజ్ అన్న సంబంధం లేకుండా ఇక 5 డివైజుల్ని ఒకేసారి వాడుకోవచ్చు. అయితే జనవరి 1 నుంచి ఒకేసారి 2 కంటే ఎక్కువ టీవీల్లో ప్రైమ్ వీడియో వాడేందుకు అవకాశం లేదు. అలా వాడాలంటే కొత్త కనెక్షన్ తీసుకోవాలి.

>> స్మార్ట్‌ఫోన్ లేకున్నా.. ఇంటర్నెట్ కనెక్షన్ లేకున్నా యూపీఐ సేవల్ని అందించేందుకు NPCI.. యూపీఐ 123పే ఫీచర్ తీసుకొచ్చిన సంగతి తెలిసిందే. ఇక్కడ ట్రాన్సాక్షన్ లిమిట్ గతంలో రూ. 5 వేలుగా ఉండగా.. ఇప్పుడు రూ. 10 వేలకు పెరిగింది. ఫీచర్ ఫోన్ (స్మార్ట్ ఫోన్ కానిది) కస్టమర్ల కోసం ఈ సదుపాయం తెచ్చింది.

>> కొత్త సంవత్సరంలో ఏ దేశానికి చెందిన వ్యక్తులైనా థాయ్‌లాండ్ వీసా వెబ్‌సైట్‌తో ఈజీగా ఈ- వీసా కోసం అప్లై చేయొచ్చు. గతంలో ఈ- వీసా సదుపాయం కొన్ని ప్రాంతాల నుంచి యాత్రికులకు మాత్రమే అందుబాటులో ఉంది. జనవరి 1 నుంచి ఏ దేశం వారైనా.. ఆన్‌లైన్‌లో ఈజీగా వీసా కోసం దరఖాస్తు చేసుకునే సదుపాయం తీసుకొస్తోంది.

>> అమెరికాకు వెళ్లాలనుకునే వారి కోసం అమెరికా కొన్ని కీలక మార్పులు చేయనుంది. నాన్ ఇమిగ్రెంట్ వీసా కోసం అప్లై చేసుకునే వారు.. నచ్చిన లొకేషన్‌లో ఇంటర్వ్యూ అపాయింట్‌మెంట్‌ను షెడ్యూల్ చేసుకోవచ్చు. ఒకవేళ ఏ కారణంతో అయినా మీరు రీషెడ్యూల్ చేసుకోవాల్సిన పరిస్థితి వస్తే.. ఎలాంటి అదనపు రుసుము లేకుండా ఒకసారి షెడ్యూల్ మార్చుకోవచ్చు. మరోసారి రీషెడ్యూల్ కోసం అయితే రుసుము చెల్లించాలి.

>> ప్రతి నెలా చమురు కంపెనీ ఎల్పీజీ గ్యాస్ సిలిండర్ రేట్లను సవరిస్తుంటాయి. ఇవాళ 2025, జనవరి 1న కమర్షియల్ గ్యాస్ సిలిండర్ ధర రూ. 14.5 నుంచి రూ. 16 వరకు తగ్గింది. ఢిల్లీలో ఇప్పుడు వాణిజ్య సిలిండర్ ధర రూ. 1804 కు చేరగా.. హైదరాబాద్ నగరంలో రూ. 2028 గా ఉంది. ఇక గృహ వినియోగ గ్యాస్ సిలిండర్ ధరల్లో మార్పుల్లేవ్.