ఆర్బీఐ సేవింగ్స్ బాండ్లకు కొత్త వడ్డీ రేట్లు.. బ్యాంక్ ఎఫ్‌డీలకు మించి లాభం

అధిక వడ్డీ ఇచ్చే పెట్టుబడి మార్గాల కోసం జనం ఎక్కువగా అన్వేషిస్తుంటారని చెప్పొచ్చు. ఇంకా తమ డబ్బుకు మంచి భద్రత ఉండాలని కోరుకుంటారు. వీరు ఎక్కువగా రిస్క్ లేకుండా ఉంటుందని బ్యాంకుల్లో ఫిక్స్‌డ్ డిపాజిట్లు చేస్తుంటారు. రిజర్వ్ బ్యాంక్ ఆఫ్ ఇండియా రెపో రేట్లను గరిష్ట స్థాయిలకు చేర్చిన సమయంలో ఇక్కడ కూడా డిపాజిట్లపై చాలా బ్యాంకులు ఆకర్షణీయ స్థాయిలోనే వడ్డీ రేట్లు ఆఫర్ చేస్తున్నాయి. అయితే.. ఫిక్స్‌డ్ డిపాజిట్ల కంటే కూడా ఎక్కువ వడ్డీ అందించే.. ఎలాంటి రిస్క్ లేని.. గ్యారెంటీ రిటర్న్స్ అందించే ఒక ప్రభుత్వ పథకం ఉంది. ఇదే రిజర్వ్ బ్యాంక్ ప్రవేశపెట్టిన ఫ్లోటింగ్ రేట్ సేవింగ్స్ బాండ్స్. ఇక్కడ కూడా అధిక వడ్డీ సహా ఆర్బీఐ సార్వభౌమ గ్యారెంటీ కూడా వస్తుంది. ఇక్కడ డబ్బుకు చక్కటి భరోసా ఉంటుంది.

ఇప్పుడు రిజర్వ్ బ్యాంకు తాజాగా 2025 జనవరి- జూన్ సమయానికి ఆర్బీఐ సేవింగ్స్ బాండ్స్ వడ్డీ రేట్లను సవరించింది. కొత్త వడ్డీ రేట్లను ప్రకటించింది. ఇది జనవరి 1 నుంచి జూన్ 30 వరకు వర్తిస్తుందన్నమాట. వడ్డీ రేటు అప్పటివరకు స్థిరంగానే ఉంటుంది. ప్రస్తుతం ఈ పథకంలో వడ్డీ రేటు 8.05 శాతంగా ఉన్నట్లు వెల్లడించింది. ఇప్పుడు చాలా బ్యాంకుల్లో ఏడాది వ్యవధిలో ఇంత కంటే వడ్డీ రేటు తక్కువే ఉంది.

అయితే ఇక్కడ ఈ పథకం వడ్డీ రేటు.. ప్రముఖ చిన్న మొత్తాల పొదుపు పథకం (కేంద్ర ప్రభుత్వ పథకం) అయిన నేషనల్ సేవింగ్స్ సర్టిఫికెట్‌తో లింక్ అయి ఉంటుంది. అయితే NSC వడ్డీ రేటు కంటే.. ఆర్బీఐ బాండ్లలో వడ్డీ రేటు 0.35 శాతం ఎక్కువగా ఉంటుంది. అయితే ఇక్కడ కిందటి రోజు కేంద్రం పోస్టాఫీస్ పథకాల వడ్డీ రేట్లను కూడా ప్రకటించింది. ఇక్కడ కూడా ఏ పథకం వడ్డీ రేట్లను కేంద్రం మార్చలేదు. దీంతో NSC వడ్డీ రేటు కూడా అలాగే ఉంది. ఈ క్రమంలోనే ఆర్బీఐ బాండ్స్ వడ్డీ రేట్లు కూడా మారలేదు.

ఆర్బీఐ బాండ్లలో వడ్డీ రేటు ఏటా రెండు సార్లు సవరిస్తారు. జనవరి- జూన్ సమయానికి ఒకసారి, మళ్లీ జులై- డిసెంబర్ సమయానికి ఒకసారి వడ్డీ రేట్లు మారుతుంటాయని చెప్పొచ్చు. ఈ వడ్డీ రేట్లను ఆర్బీఐ ప్రకటిస్తుంది. ఇక్కడ కూడా ఇందులో పెట్టుబడులపై ఎలాంటి టాక్స్ బెనిఫిట్స్ పొందలేరు. ఈ సేవింగ్స్ బాండ్లలో కనీసం రూ. 1000 ఇన్వెస్ట్‌మెంట్‌తో చేరొచ్చు. గరిష్ట పరిమితి లేదు. ఇక ఇందులో లాకిన్ పీరియడ్ ఏడేళ్లుగా ఉంటుంది. ముందస్తు విత్‌డ్రాకు అనుమతి లేదు. మినిమం లాకిన్ పీరియడ్‌ తర్వాత స్వల్ప పెనాల్టీతో సీనియర్ సిటిజెన్లకు మాత్రం ముందస్తు విత్‌డ్రాకు ఛాన్స్ ఉంది.

వడ్డీ రేట్లు మారుతున్న దాన్ని బట్టే రిటర్న్స్ ఉంటాయి. వడ్డీ రేటు తగ్గితే మాత్రం ఆఖర్లో రాబడి తగ్గుతుందని చెప్పొచ్చు. ఇంకా ఏడేళ్ల వరకు డబ్బుతో అవసరం ఉండదనుకున్న వారికి ఇది బెస్ట్ ఆప్షన్. సీనియర్ సిటిజెన్లకు ఇది మంచి ఆదాయ వనరు అని చెప్పొచ్చు. ఆర్బీఐ గుర్తింపు పొందిన ఏ బ్యాంకులో అయినా ఈ బాండ్లు కొనుగోలు చేయొచ్చు. దీని కోసం కేవైసీ పత్రాల్ని సమర్పించాలి. బ్యాంక్ వెబ్‌సైట్స్ నుంచి కూడా కొనొచ్చు. ఆర్బీఐ రిటైల్ డైరెక్ట్ పోర్టల్ ఈ బాండ్లను కొనుగోలు చేయొచ్చు.