టెస్టు జట్టు పగ్గాలు మళ్లీ విరాట్ కోహ్లీకే.. అప్పుడే ముహూర్తం

టీమిండియా కెప్టెన్ రోహిత్ శర్మ.. ఆస్ట్రేలియాతో ఐదో టెస్టు నుంచి తప్పుకున్నాడు. ఫామ్‌ లేమి సహా అతడి సారథ్యంలో ఆశించిన మేర రాణించలేకపోతుండటంతో రోహిత్ ఈ నిర్ణయం తీసుకున్నట్లు తెలుస్తోంది. అయితే, కొంత మంది విశ్లేషకులు మాత్రం.. రోహిత్ శర్మ తన కెరీర్‌లో చివరి టెస్టు మ్యాచ్ ఆడేశాడని చెబుతున్నారు. మెల్‌బోర్న్‌ టెస్టే అతడి కెరీర్‌లో చివరి టెస్టు మ్యాచ్ అని అంచనా వేస్తున్నారు. ఈ నేపథ్యంలో భారత టెస్టు జట్టు తదుపరి కెప్టెన్ ఎవరనేది ఆసక్తికరంగా మారింది. ప్రస్తుతం భారత జట్టుకు వైస్‌ కెప్టెన్‌గా ఉన్న జస్‌ప్రీత్ బుమ్రా.. సిడ్నీ టెస్టుకు కెప్టెన్‌గా వ్యవహరించనున్నాడు.

బోర్డర్ గవాస్కర్ టెస్టు తర్వాత భారత జట్టుకు పూర్తి స్థాయి కెప్టెన్‌ను నియమించాలని బీసీసీఐ భావిస్తున్నట్లు తెలుస్తోంది. ఇందుకు భారత మాజీ కెప్టెన్ విరాట్ కోహ్లీ పేరు పరిశీలిస్తున్నట్లు తెలుస్తోంది. రోహిత శర్మతో పోలిస్తే విరాట్ కోహ్లీ ప్రస్తుతం మెరుగ్గా కనిపిస్తున్నాడు. అతడి ఫిట్‌నెస్ ప్రకారం చూసినా.. మరో మూడు నాలుగేళ్లు ఈజీగా క్రికెట్‌ ఆడేస్తాడు. ఆఫ్‌సైడ్‌ బంతిని ఆడే బలహీనతను వదిలేస్తే, కోహ్లీని ఆపేవారే లేరని మాజీలు చెబుతున్నారు. గతంతో కోహ్లీ కెప్టెన్సీలో భారత టెస్టు జట్టు అద్భుతాలు సృష్టించింది. దీంతో మరోసారి అతడికే బాధ్యతలు అప్పగించాలని మేనేజ్‌మెంట్ భావిస్తోందట.

వాస్తవానికి విరాట్ కోహ్లీ.. జట్టు ఆపదలో ఉన్న ప్రతీసారి తనలోని నాయకుడిని బయటకు తీస్తాడు. అంతర్జాతీయ మ్యాచుల్లో ఆడినప్పుడైనా, ఐపీఎల్‌లో రాయల్‌ ఛాలెంజర్స్ బెంగళూరు తరఫున ఆడేటప్పుడు అయినా.. కోహ్లీ తీరు ఇలాగే ఉంటుంది. మెల్‌బోర్న్ టెస్టులోనూ.. కోహ్లీ చాలా సార్లు ఫీల్డింగ్ సెటప్‌ మారుస్తూ.. బౌలర్లకు సూచనలు ఇస్తూ కనిపించాడు. అధికారికంగా మాత్రమే కోహ్లీ కెప్టెన్ కాదు గానీ.. సారథి చేయాల్సిన పనులన్నీ చేస్తూ తరచూ కెమెరాలకు చిక్కుతాడు. ఒక్క డీఆర్‌ఎస్ విషయంలో మినహా.. మిగతా సమయాల్లో కెమెరాలన్నీ విరాట్‌ వైపే ఫోకస్‌ చేస్తాయంటే, అతిశయోక్తి కాదు.

వీటన్నింటికి తోడు ఐపీఎల్‌ 2025 ద్వారా కోహ్లీ.. మళ్లీ సారథిగా మారబోతున్నాడనే సంకేతాలు వినిపిస్తున్నాయి. ఐపీఎల్‌ 2025 మెగా వేలంలో రాయల్ ఛాలెంజర్స్ బెంగళూరు జట్టు కెప్టెన్సీ కోసం అనుభవం ఉన్న ఆటగాళ్లను కొనుగోలు చేయలేదు. దీంతో అతడికే ఈసారి సారథ్య బాధ్యతలు అప్పగిస్తుందనే ప్రచారం జరుగుతోంది. తాజాగా రోహిత్ శర్మ కూడా తప్పుకోవడంతో టీమిండియా టెస్టు జట్టు బాధ్యతలు కూడా కోహ్లీకి ఇవ్వాలనే డిమాండ్స్ గట్టిగానే వినిపిస్తున్నాయి. కెప్టెన్సీ వల్ల కొందరి ఆటతీరుపై ప్రతికూల ప్రభావం పడుతుందని.. కానీ, కోహ్లీ మాత్రం మరింత రెచ్చిపోయి ఆడతాడని.. వెంటనే అతడికి టెస్టు జట్టు పగ్గాలు ఇవ్వాలని ఫ్యాన్స్‌ కోరుకుంటున్నారు.