హైదరాబాద్‌లో ఆ ప్రాంతంవైపే అందరి దృష్టి.. హైటెక్ సిటీ, మాదాపూర్‌కు దగ్గర్లోనే.. తక్కువ ధరలకే ఫ్లాట్లు

హైదరాబాద్‌లో ఐటీ అంటే హైటెక్ సిటీ, గచ్చిబౌలి, కొండాపూర్, మాదాపూర్ ప్రాంతాలే గుర్తుకొస్తాయి. దాదాపు 80 శాతం వరకు ఇక్కడి ప్రాంతాల్లోనే పనిచేస్తుంటారు. ఈ ప్రాంతాలకు 10 కిలోమీటర్ల పరిధిలో నివాసం ఉండాలంటే.. కోకాపేట ప్రాంతం చూస్తే.. అక్కడ చదరపు అడుగు ధర దాదాపుగా రూ. 12 నుంచి రూ. 14 వేల వరకు ఉంటోంది. మిగతా ప్రాంతాలన్నీ దాదాపు ఇప్పటికే రద్దీగా మారాయి. దీంతో చాలా మంది ఇప్పుడు బాలా నగర్ ప్రాంతం వైపు చూస్తున్నట్లు తెలుస్తోంది. ఒకప్పుడు బాలా నగర్ అంటే భూగర్భ జలాలు కలుషితం అయ్యాయని.. పారిశ్రామిక వాడ అని.. గాలి కూడా కలుషితం అయిందని అనుకునేవారు. కానీ ఇప్పుడు అలాంటి పరిస్థితి లేదు. ఇక్కడ ఇప్పుడు నేషనల్ రిమోట్ సెన్సింగ్ సెంటర్ (NRSC), సెంట్రల్ ఇన్‌స్టిట్యూట్ ఆఫ్ టూల్ డిజైన్, నైఫర్ వంటి కేంద్ర ప్రభుత్వ సంస్థలు ఉన్నాయి.

ఒకప్పుడు ఇక్కడ ఉండే ఇండియన్ డ్రగ్స్ అండ్ ఫార్మాష్యూటికల్స్ వంటి కంపెనీలు వేలాది మందికి ఉపాధి కల్పించినప్పటికీ.. చాలా కాలం కిందటే అది మూతపడింది. ఇంకా ఈ కంపెనీకి చెందిన దాదాపు 100 ఎకరాల భూముల్లో పచ్చదనం విస్తరించింది. ఈ క్రమంలోనే బాలానగర్ ప్రాంతం వైపు కూడా లగ్జరీ నిర్మాణాలు మొదలయ్యాయి.

కోకాపేట సహా ఇతర ప్రాంతాల్లో లభించే సదుపాయాలన్నీ కూడా ఇక్కడ లభిస్తున్నాయి. ఇంకా.. కోకాపేటలో చదరపు అడుగు ధర ప్రస్తుతం రూ. 12-14 వేల వరకు పలుకుతుండగా.. ఇక్కడ దాదాపు రూ. 6 వేల నుంచి 7 వేల వరకే అందుబాటులో ఉంది. అంటే కోకాపేట ధరల్లో సగం ధరలకే ఇక్కడ లగ్జరీ ఫ్లాట్లు లభించే అవకాశాలు కనిపిస్తున్నాయి.

>> ఇంకా బాలానగర్ ప్రాంతం.. హైటెక్ సిటీకి దాదాపు 12-13 కిలోమీటర్ల దూరంలోనే ఉంది. ఫ్లై ఓవర్స్, అండర్ పాస్‌లు వంటి మౌలిక సదుపాయాలు వచ్చిన నేపథ్యంలో అరగంటలోపే బాలానగర్ నుంచి హైటెక్ సిటీ చేరుకోవచ్చు. ఇక్కడ మంచి పెద్ద పెద్ద స్కూళ్లు, ఇంజినీరింగ్ కాలేజీలు కూడా ఉండటంతో పిల్లల చదువుల గురించి కూడా ఏమాత్రం కంగారు పడనక్కర్లేదు. మల్టీప్లెక్సులు, మాల్స్ కూడా ఉండటంతో విహారం, వినోదానికి అడ్డంకుల్లేవు.

>> ఇక కొండాపూర్, మాదాపూర్ వంటి ప్రాంతాల్లో లగ్జరీ ఫ్లాట్స్ కావాలంటే ఎంత కాదన్నా కనీసం రూ. 6- 7 కోట్ల వరకు పెట్టాల్సి ఉంటుంది. బాలా నగర్‌లో అయితే లగ్జరీ ఫ్లాట్ కోసం 2 వేల చదరపు అడుగుల విస్తీర్ణం ఉండే ఫ్లాట్ అన్ని సౌకర్యాలతో కలిపి రూ. కోటిన్నర నుంచి రూ. 2 కోట్ల లోపే వచ్చే అవకాశాలు కనిపిస్తున్నాయి. గతంలో ఇతర ప్రాంతాల్లో పనిచేసినా.. హైదరాబాద్ వచ్చి స్థిరపడాలనుకునే వారికి కూడా బాలానగర్ బెస్ట్ ఆప్షన్ రియల్ ఎస్టేట్ నిపుణులు అభిప్రాయాలు వ్యక్తం చేస్తున్నారు.