ఖాళీ కడుపుతో తినకూడని పండ్లు, తింటే ఆరోగ్యానికి ముప్పు

చాలా మంది ఉదయాన్నే లేచిన వెంటనే నోటికి పని చెబుతుంటారు. ఖాళీ కడుపుతోనే ఏది పడితే అది తింటారు. ఉదయాన్నే తినే బ్రేక్ ఫాస్ట్ ఆరోగ్యానికి చాలా ముఖ్యం. మంచి ఆహారం తినడం వల్ల రోజంతా మీరు చాలా యాక్టివ్‌గా ఉంటారు. అయితే, కొందరికి నిద్ర లేచిన వెంటనే ఆకలి వేస్తుంది. దీంతో.. ఇంట్లో ఏం దొరికితే అది తినేస్తారు. ఇంకొందరు ఆరోగ్యానికి మంచిదని పండ్లు తింటుంటారు. అయితే, ఖాళీ కడుపుతో కొన్ని పండ్లు ఎట్టి పరిస్థితుల్లో కూడా తినకూడదంటున్నారు నిపుణులు. ఆ పండ్లు మీకు మేలు చేయడం పక్కన పెడితే.. తీవ్రంగా హాని చేసే ప్రమాదం ఉందంటున్నారు.

చాలా మంది ఆరోగ్యానికి మంచిదని పండ్లు తింటారు. పండ్లలో ఆరోగ్యానికి మేలు చేసే ఎన్నో పోషకాలు ఉంటాయి. అందుకే పండ్లను సలాడ్, జ్యూస్ రూపంలో తీసుకుంటారు. పండ్లను ఎప్పుడు తిన్నా ఆరోగ్యానికి మంచిదని భావిస్తారు. అయితే, కొన్ని పండ్లు సహజ చక్కెరను, ఆమ్లత్వాన్ని కలిగి ఉంటాయి. వీటిని ఖాళీ కడుపుతో తింటే కొన్ని ఆరోగ్య సమస్యలు తలెత్తవచ్చు. ఖాళీ కడుపుతో ఏ పండ్లు తినకూడదో ఇక్కడ తెలుసుకుందాం.

 సిట్రస్ ఫ్రూట్స్

నారింజ, గ్రేప్ ఫ్రూట్, బత్తాయి, ఉసిరి, నిమ్మ, వంటి పండ్లు సిట్రస్ జాతికి చెందినవి. ఈ పుల్లని పండ్లను ఖాళీ కడుపుతో తినకూడదని నిపుణులు హెచ్చరిస్తున్నారు. వీటిని తింటే కడుపులో యాసిడ్ ఏర్పడుతుంది. ఎందుకంటే వీటిలో సిట్రిక్ యాసిడ్ ఎక్కువగా ఉంటుంది. దీంతో.. గ్యాస్ట్రిక్ సమస్యలు వచ్చే డేంజర్ ఉంది. అంతేకాకుండా కడుపు నొప్పి, ఏసిడిటీ, పుల్లటి తేన్పులు, వాంతులు వచ్చే అవకాశం ఉంది. అందుకే ఖాళీ కడుపుతో సిట్రస్ ఫ్రూట్స్ తినకూడదంటున్నారు నిపుణులు.

అరటి పండు

అరటి పండు ఆరోగ్యానికి ఎంతో మేలు చేస్తుంది. అయితే, ఈ పండును ఖాళీ కడుపుతో తినకూడదంటున్నారు నిపుణులు. అరటి పండులో మెగ్నిషియం అధికంగా ఉంటుంది. ఖాళీ కడుపుతో తినడం వల్ల శరీరంలో మెగ్నిషియం, కాల్షియం స్థాయిల అసమతుల్యత ఏర్పడవచ్చు. దీంతో కండరాలు కూడా పట్టేయవచ్చు. రక్తంలో మెగ్నిషియం స్థాయిలు కూడా పెరిగే ఛాన్స్ ఉంది. దీంతో.. గుండె సంబంధిత వ్యాధులు వచ్చే ప్రమాదం ఉంది.

యాపిల్

యాపిల్‌లో ఆరోగ్యానికి మేలు చేసే ఎన్నో పోషకాలు ఉన్నాయి. యాంటీ ఆక్సిడెంట్లు, పోషకాలతో నిండి ఉంటుంది. అందుకే రోజుకు ఒక్క యాపిల్ అయినా సరే తినాలంటారు. అయితే, యాపిల్ పండును ఖాళీ కడుపుతో తినకూడదంటున్నారు. ఇలా తినడం వల్ల కడుపులో ఆమ్లత్వం పెరిగే అవకాశం ఉంది. దీంతో కడుపు నొప్పి, గ్యాస్, అజీర్తి వంటి సమస్యలు రావచ్చు.

పుచ్చకాయ

​పుచ్చకాయలో ఆరోగ్యానికి మేలు చేసే ఎన్నో పోషకాలు ఉన్నాయి. అయితే, దీనిని పరగడుపున తినకూడదు. పుచ్చకాయలో నీటి శాతం ఎక్కువగా ఉంటుంది. ఉదయాన్నే ఖాళీ కడుపుతో పుచ్చకాయను తినడం వల్ల జీర్ణవ్యవస్థ నిదానిస్తుంది. దీంతో కడుపులో అసౌకర్యంగా ఉంటుంది. గ్యాస్, ఎసిడిటీ, కడుపు నొప్పి, అజీర్తి వంటి సమస్యలు వచ్చే అవకాశం ఉంది. అందుకే ఖాళీ కడుపుతో పుచ్చకాయను అవాయిడ్ చేయండి.

ఈ పండ్లు కూడా తినకూడదు

* ద్రాక్ష

*చెర్రీలు

*టమాటా

* ఈ పండ్లను కూడా ఖాళీ కడుపుతో తినకూడదు. తింటే కడుపులో ఆమ్లత్వం పెరిగే అవకాశం ఉంది. దీంతో జీర్ణ సమస్యలు తలెత్తవచ్చు. ఖాళీ కడుపుతో తింటే పొట్టలో అసౌకర్యం, ఎసిడిటీ, గ్యాస్ట్రిక్ సమస్యలు, నొప్పి రావచ్చు. అందుకే ఈ పండ్లను ఖాళీ కడుపుతో తినకండి.

ఎప్పుడు తినాలి?

ఉదయం బ్రేక్ ఫాస్ట్ తర్వాత ఈ పండ్లను తినడం మేలు అంటున్నారు. భోజనానికి అరగంట ముందు తినవచ్చని నిపుణులు చెబుతున్నారు. పండ్ల జ్యూసులను బ్రేక్‌ఫాస్ట్‌తో కలిపి తీసుకుంటే మంచిదంటున్నారు. ఖాళీ కడుపుతో బాదం, పిస్తా వంటి డ్రై ఫ్రూట్ తీసుకోవచ్చని అభిప్రాయపడుతున్నారు. ఖాళీ కడుపుతో తినాలనుకుంటే తక్కువ ఆమ్లత్వం కలిగిన ఆహారాలను తినాలి.