నా చావుకు కారణమైన ఆమెకు గుణపాఠం చెప్పాలి.. కన్నీళ్లు పెట్టిస్తోన్న భార్య బాదితుడి చివరి మాటలు

మొన్న టెకీ అతుల్ సుభాష్.. నిన్న కేఫ్ యజమాని పునీత్ ఖురానా.. నేడు సురేశ్ సథాదియా.. ఇలా భార్య బాధితుల వరుస ఆత్మహత్యలు ఆందోళనకు గురిచేస్తున్నాయి. మహిళల రక్షణ కోసం తీసుకొచ్చిన చట్టాలను కొందరు దుర్వినియోగం చేస్తూ.. భర్త, అత్తింటివాళ్లను తప్పుడు కేసులతో ఇబ్బందులకు గురిచేస్తున్నారు. గుజరాత్‌లోని బొటాడ్ జిల్లా జమర్లా గ్రామానికి చెందిన సురేశ్ సథాదియా (39) అనే వ్యక్తి భార్య వేధింపులతో డిసెంబరు 30న ఇంటిలోనే ఉరేసుకుని ఆత్మహత్య చేసుకున్నాడు. దీనికి ముందు అతడు ఓ సెల్ఫీ వీడియోను రికార్డు చేసి.. అందులో భార్యపై ఆరోపణలు చేశాడు.

తన చావుకు కారణమైన ఆమెకు తగిన గుణపాఠం చెప్పాలని కుటుంబసభ్యులను వీడియోలో కోరినట్టు పోలీసులు వెల్లడించారు. డిసెంబరు 30 ఇంటిలో ఉరేసుకుని సురేశ్ చనిపోయినట్టు తెలిపారు. అతడి మొబైల్ ఫోన్‌లో రికార్డు చేసిన వీడియోను కుటుంబసభ్యులు గుర్తించారు. ‘నా భార్యే చావుకు కారణం.. ఆమెకు గుణపాఠం చెప్పండి’ అని సురేశ్ వీడియోలో చెప్పడం స్పష్టంగా ఉందని పోలీసులు వివరించారు. సురేశ్ సథాదియా తండ్రి ఫిర్యాదు మేరకు పోలీసులు.. అతడి భార్య జయబెన్‌పై కేసు నమోదుచేశారు. తరుచూ గొడవపడి.. పుట్టింటికి వెళ్లిపోతూ తన కుమారుడ్ని మానసికంగా వేధించిందని ఆయన ఆరోపించారు.

‘‘డిసెంబరు చివరి వారంలో సురేశ్‌తో గొడవపడిన కోడలు జయబెన్.. పుట్టింటికి వెళ్లిపోయింది... నచ్చజెప్పి తిరిగి తీసుకొచ్చేందుకు వెళ్తే ఘోరంగా అవమానించింది... దీంతో తీవ్ర ఆవేదనకు గురై అక్కడ నుంచి వచ్చిన తర్వాత ఉరేసుకుని ఆత్మహత్య చేసుకున్నాడు’ అని ఫిర్యాదులో పేర్కొన్నారు. ఫిర్యాదు ఆధారంగా భారతీయ న్యాయ సంహిత (బీఎన్ఎస్) సెక్షన్ 100 (ఆత్మహత్యకు ప్రేరేపించడం) కేసు నమోదుచేసి దర్యాప్తు చేపట్టామని పోలీసులు తెలిపారు. ఇక, టెకీ అతుల్ సుభాష్ ఘటన దేశవ్యాప్తంగా సంచలనం సృష్టించింది. 24 పేజీల సూసైడ్ నోట్, దాదాపు గంటన్నర నిడివి ఉన్న సెల్ఫీ వీడియో సోషల్ మీడియాలో వైరల్ అయ్యాయి. భార్య, ఆమె కుటుంబసభ్యులు తనను ఏవిధంగా వేధింపులకు గురిచేసిందీ అందులో వివరించాడు. న్యాయవ్యవస్థపై కూడా ఆరోపణలు చేసిన అతుల్.. న్యాయమూర్తి రూ.5 లక్షలు లంచం అడిగినట్టు వాపోయాడు.