సునీల్ 'గవాస్కర్‌'కు ఘోర అవమానం.. అక్కడే ఉన్నా పట్టించుకోకుండా

బోర్డర్‌ గవాస్కర్ ట్రోఫీని ఆస్ట్రేలియా పదేళ్ల తర్వాత కైవసం చేసుకుంది. వరుసగా నాలుగు సార్లు ఈ సిరీస్‌లో ఓడిపోయిన ఆస్ట్రేలియా.. ఎట్టకేలకు ట్రోఫీని చేజిక్కించుకుంది. సిడ్నీ టెస్టులో భారత్‌ను 6 వికెట్ల తేడాతో ఓడించి.. ఈ ఫీట్ సాధించింది. అయితే మ్యాచ్ తర్వాత టీమిండియా క్రికెట్ దిగ్గజం సునీల్‌ గవాస్కర్‌కు అవమానం జరిగింది. వాస్తవానికి 1996-97 నుంచి ఈ ట్రోఫీ గవాస్కర్.. ఆస్ట్రేలియాకు చెందిన అలన్‌ బోర్డర్ పేరు మీదుగా జరుగుతోంది. వారి పేర్లతోనే బోర్డర్‌-గవాస్కర్ ట్రోఫీగా నామకరణం చేశారు. అయితే ఆస్ట్రేలియా సిరీస్‌ సాధించిన తర్వాత ట్రోఫీని అందజేసేందుకు గవాస్కర్‌ను నిర్వహకులు పిలవలేదు.

సిడ్నీ టెస్టులో ఆస్ట్రేలియా గెలిచిన తర్వాత.. ఆ జట్టు కెప్టెన్ ప్యాట్ కమిన్స్‌కు ట్రోఫీని బహుకరించాల్సి ఉంది. అయితే ఇందుకు కేవలం బోర్డర్‌ను మాత్రమే నిర్వహకులు ఆహ్వానించారు. ఈ సమయంలో గవాస్కర్ సిడ్నీ మైదానంలో ఉన్నప్పటికీ.. నిర్వహకులు పట్టించుకోలేదు. దీనిపై సునీల్ గవాస్కర్‌ ఆగ్రహం వ్యక్తం చేశారు. తాను భారతీయుడిని కాబట్టి తనకు ఇలా చేశారని పేర్కొన్నాడు. ప్రెజెంటేషన్ తర్వాత మాట్లాడిన ఆయన.. ఈ విషయంపై స్పందించారు.

“నేను ఇక్కడే(సిడ్నీ స్టేడియంలోనే) ఉన్నా. మెరుగైన ఆటతీరు ప్రదర్శించిన ఆస్ట్రేలియా జట్టు సిరీస్‌ గెలుచుకుంది. అది ఓకే. ఎందుకంటే వారు విజయానికి అర్హులు. కానీ ఆస్ట్రేలియా జట్టుకు ట్రోఫీని బోర్డర్‌తో కలిసి నేను కూడా అందిస్తే బాగుండేది. భారతీయుడినే కాబట్టే నన్ను పిలవలేదేమో. నా స్నేహితుడు అలెన్ బోర్డర్‌తో కలిసి ప్రెజెంటేషన్‌ కార్యక్రమంలో నేను ఉండంటే సంతోషించేవాడిని. అయితే ఈ మ్యాచ్‌ ప్రారంభానికి ముందే నిర్వాహకులు వచ్చి ట్రోఫీ అందజేతపై తమ నిర్ణయాన్ని చెప్పారు. ఈ మ్యాచ్‌లో ఎలాంటి ఫలితం వచ్చినా.. నేను అవసరం లేదన్నారు. దీని గురించి నాకేం బాధలేదు. కానీ కాస్త ఆశ్చర్యానికి గురయ్యా. ఎందుకంటే ఇది బోర్డర్ - గావస్కర్ ట్రోఫీ కదా” అని గవాస్కర్‌ వ్యాఖ్యానించారు.

కాగా సిడ్నీ టెస్టులో విజయంతో ఆస్ట్రేలియా పదేళ్ల తర్వాత బోర్డర్ -గావస్కర్ ట్రోఫీని ఆసీస్ సొంతం చేసుకుంది. చివరిసారిగా 2014/15 సీజన్‌లో ఆస్ట్రేలియా సిరీస్‌ను గెలుచుకుంది. ఆ తర్వాత భారత్‌ స్వదేశంలో రెండు సార్లు.. ఆస్ట్రేలియా గడ్డపై రెండు సార్లు ట్రోఫీని దక్కించుకుంది. తాజాగా ఈ ట్రోఫీ ఆస్ట్రేలియా వద్దకు చేరుకుంది.