ఢిల్లీ ఎన్నికల తర్వాత హిమాలయాలకు వెళ్లిపోతా.. సీఈసీ రాజీవ్ కుమార్ ఆసక్తికర వ్యాఖ్యలు

కేంద్ర ఎన్నికల ప్రధాన కమిషనర్ రాజీవ్ కుమార్ కీలక వ్యాఖ్యలు చేశారు. ఢిల్లీ అసెంబ్లీ ఎన్నికల షెడ్యూల్ విడుదల కోసం మంగళవారం ప్రెస్‌మీట్ నిర్వహించిన సీఈసీ రాజీవ్ కుమార్.. ఎన్నికల తేదీలు, షెడ్యూల్ వివరాలు వెల్లడించారు. ఈ క్రమంలోనే తన పదవీ విరమణ గురించి కూడా స్పందించారు. ఢిల్లీ అసెంబ్లీ ఎన్నికల తర్వాత ఆయన పదవీ కాలం పూర్తి కానున్నట్లు తెలిపారు. అయితే రిటైర్మెంట్ తర్వాత ఏవైనా ప్లాన్స్ వేసుకున్నారా అని మీడియా అడిగిన ప్రశ్నకు ఆయన ఆసక్తికరమైన సమాధానం ఇచ్చారు. తాను ఈ పదవి నుంచి రిటైర్ అయిన తర్వాత కొన్ని నెలల పాటు హిమాలయాలకు వెళ్లి అక్కడే ఉంటానని స్పష్టం చేశారు.

ఇక ఢిల్లీ అసెంబ్లీ ఎన్నికల ప్రక్రియ పూర్తి అయిన తర్వాత.. ఫిబ్రవరి 18వ తేదీన తాను పదవీ విరమణ చేయనున్నట్లు సీఈసీ రాజీవ్ కుమార్ వెల్లడించారు. రిటైర్మెంట్‌ తర్వాత

హిమాలయాలకు వెళ్లి తాను డీటాక్సీఫై (శరీరంలోని రసాయనాలను తొలగించుకోవడం) కావాలని కోరుకుంటున్నట్లు చెప్పారు. తనకు కొంచెం ఏకాంతం, స్వీయ అధ్యయనం కోసం సమయం కావాలని తెలిపారు. అందుకోసం అందరికీ దూరంగా వెళ్తానని చెప్పారు. హిమాలయాల్లో సుదూర ప్రాంతానికి వెళ్లి అక్కడే 4, 5 నెలల పాటు అక్కడే ఉంటానని పేర్కొన్నారు. అనవసర అంశాల నుంచి పూర్తి విముక్తి పొందుతానని రాజీవ్‌ కుమార్‌ వెల్లడించారు.

ఈ సందర్భంగా తన వ్యక్తిగత విషయాలను కూడా మీడియాతో పంచుకున్న రాజీవ్ కుమార్.. తాను ఒక మున్సిపల్‌ స్కూల్లో చదువుకున్నట్లు వివరించారు. చిన్నతనంలో తాను చెట్టు కింద విద్యా బోధనలు విన్న రోజులను గుర్తుచేసుకున్నారు. ఇక తాను ఏ, బీ, సీ, డీలను ఆరో తరగతిలో నేర్చుకున్నట్లు చెప్పారు. అందుకే అణగారిన వర్గాల చిన్నారులకు బోధించడం తనకు ఎంతో సంతోషం కలిగిస్తుందని వివరించారు. ఇక బీహార్‌ కేడర్‌కు చెందిన 1984 ఐఏఎస్‌ అధికారి రాజీవ్‌ కుమార్‌. ఆయన కేంద్ర ఎన్నికల కమిషనర్‌గా 2020 సెప్టెంబర్‌లో బాధ్యతలు చేపట్టారు. ఆ తర్వాత 2022 మే 15వ తేదీ నుంచి రాజీవ్‌ కుమార్‌ సీఈసీగా కొనసాగుతున్నారు. ఈ క్రమంలోనే మరికొన్ని రోజుల్లోనే ఆయన పదవీ విరమణ చేయనున్నారు.