టెస్టు ర్యాంకింగ్స్‌లో పడిపోయిన టీమిండియా.. 2016 తర్వాత తొలిసారి టాప్‌-2 నుంచి ఔట్

పదేళ్ల తర్వాత ఆస్ట్రేలియా చేతిలో బోర్డర్ గవాస్కర్ ట్రోఫీలో ఓటమి పాలైన భారత్‌.. ఐసీసీ తాజా టెస్టు ర్యాంకింగ్స్‌లో భారత జట్టు మూడో స్థానానికి పడిపోయింది. గత కొన్నేళ్లుగా టెస్టు క్రికెట్‌లో భారత జట్టు మెరుగైన ప్రదర్శన చేస్తోంది. కానీ, చివరగా ఆడిన 8 టెస్టుల్లో కేవలం ఒక్కదాంట్లో మాత్రమే గెలుపొందిన టీమిండియా.. తన ర్యాంక్‌ను కోల్పోయింది. ఫలితంగా 8 ఏళ్ల తర్వాత టెస్టుల్లో మూడో స్థానానికి పడిపోయింది.

సుమారు పదేళ్లుగా టెస్టు క్రికెట్‌లో భారత్‌ మెరుగైన ప్రదర్శన చేస్తోంది. వరుసగా రెండుసార్లు ప్రపంచ టెస్టు ఛాంపియన్‌షిప్‌ ఫైనల్‌కు చేరింది. కానీ, ఇటీవల కాలంలో టీమిండియా టెస్టుల్లో పేలవ ప్రదర్శన చేసింది. స్వదేశంలో న్యూజిలాండ్‌తో సిరీస్‌ను 0-3తో కోల్పోయింది. ఆ తర్వాత బోర్డర్ గవాస్కర్ ట్రోఫీని కూడా 1-3తో కోల్పోయింది. పదేళ్ల తర్వాత ఈ ట్రోఫీని ఆస్ట్రేలియాకు అప్పగించింది. దీంతో టెస్టుల్లో భారత జట్టు ఆధిపత్యానికి తెరపడింది.

ఇక ఇదే సమయంలో దక్షిణాఫ్రికా జట్టు రెడ్‌బాల్ క్రికెట్‌లో మెరుగైన ప్రదర్శన చేసింది. పాకిస్థాన్‌తో టెస్టు సిరీస్‌ను 2-0తో క్లీన్ స్వీప్ చేసిన సఫారీ జట్టు.. ఈ ఫార్మాట్‌లో వరుసగా ఏడో విజయాన్ని నమోదు చేసింది. దీంతో టెస్టు ర్యాంకింగ్స్‌లలో భారత్‌ను వెనక్కినెట్టి.. రెండో స్థానానికి చేరింది. ఈ సిరీస్‌లో తొలి మ్యాచ్ గెలిచాక.. దక్షిణాఫ్రికా ప్రపంచ టెస్టు ఛాంపియన్‌షిప్‌ ఫైనల్‌కు అర్హత సాధించిన విషయం తెలిసిందే. భారత్‌తో సిరీస్ గెలుచుకున్నాక.. ఆస్ట్రేలియా కూడా ఫైనల్ చేరింది. ఆ జట్టు ప్రస్తుతం టెస్టు ర్యాంకింగ్స్‌లో అగ్రస్థానంలో కొనసాగుతోంది.

ప్రస్తుతం ఐసీసీ టెస్టు ర్యాంకింగ్స్‌లో 126 రేటింగ్ పాయింట్లతో ఆస్ట్రేలియా అగ్రస్థానంలో నిలిచింది. ఆ తర్వాత దక్షిణాఫ్రికా (112), భారత్ (109), ఇంగ్లాండ్ (106), న్యూజిలాండ్ (96) జట్లు ఉన్నాయి. శ్రీలంక (87), పాకిస్థాన్ (83), వెస్టిండీస్ (75), బంగ్లాదేశ్‌ (65) తర్వాతి స్థానాల్లో నిలిచాయి.

భారత క్రికెట్ జట్టు గత 8 టెస్టుల్లో ఒక్క మ్యాచ్‌లోనే విజయం సాధించింది. 6 మ్యాచ్‌ల్లో ఓడిపోయింది. ఒక మ్యాచ్ మాత్రం డ్రాగా ముగిసింది. అంతేకాకుండా మొదటిసారి డబ్ల్యూటీసీ ఫైనల్‌కు దూరమైంది. గత రెండు పర్యాయాలు భారత్ ఫైనల్ చేరింది. మొత్తంగా 2023-25 డబ్ల్యూటీసీలో భారత్ 19 మ్యాచ్‌లు ఆడి 9 విజయాలు, 8 ఓటములు, 2 డ్రాలు నమోదు చేసింది.