తులసి, వేపాకులతో దంతాలపై పాచి వదిలించుకోవచ్చు, ఎలా వాడాలంటే

దంతాలు ముఖ సౌందర్యంలో కీలక పాత్ర పోషిస్తాయి. పళ్ళు తెల్లగా ముత్యాల్లా మెరిసిపోవాలని చాలా మంది కోరుకుంటారు. దంతాలు తెల్లగా మెరిసిపోతే మనలో ఆత్మవిశ్వాసం పెరుగుతుంది. అదే పళ్ళు పాచి పట్టి పసుపు రంగులోకి మారితే.. చాలా ఇబ్బందిగా ఉంటుంది. అందరిలో ఉన్నప్పుడు నవ్వడానికి చాలా తంటాలు పడాల్సి ఉంటుంది. ఈ రోజుల్లో చాలా మంది దంతాలు పాచి పట్టి పసుపు రంగులోకి మారిపోతాయి. పళ్లు తోమే విషయంలో బద్ధకం, ఎప్పుడూ పడితే అప్పుడు తినడం, కెఫీన్ ఉండే డ్రింక్స్ ఎక్కువగా తీసుకోవడం, సిగరెట్లు ఎక్కువగా తాగడం వల్ల దంతాలు పసుపు రంగులోకి మారతాయి.

ఇంకొందరు రోజూ రెండు పూటలా బ్రష్ చేస్తారు. కానీ, వారి పళ్ళు కూడా పసుపు రంగులోకి మారతాయి. ఇక, ఈ సమస్యలు ఉంటే చాలా మంది దంత వైద్యుల చుట్టూ ప్రదిక్షణలు చేస్తారు. వేల రూపాయల్లో ఖర్చుపెడతారు. మీరు కూడా పసుపు దంతాలతో ఇబ్బంది పడుతుంటే.. వాటి తెల్లగా మార్చే సహజ ఇంటి చిట్కాలు ఉన్నాయి. కొన్ని సహజ పదార్థాలు, పెరట్లో దొరికే ఆకులు దంతాల పసుపు రంగును తగ్గిస్తాయి. అవేంటో ఇక్కడ తెలుసుకుందాం.

తులసి ఆకులు

​తులసి ఆకుల్లో శరీరానికి మేలు చేసే ఎన్నో పోషకాలు ఉంటాయి. తులసి ఆకుల్లో యాంటీ బ్యాక్టీరియల్, క్రిమినాశక మూలకాలు ఉంటాయి. ఇవి నోటి ఆరోగ్యాకి ఎంతో మేలు చేస్తాయి. తులసి ఆకుల్ని నమలడం వల్ల దంతాల్ని శుభ్రంగా ఉంచుకోవచ్చు. చిగుళ్ల ఆరోగ్యం కోసం తులసి ఆకుల్ని నమలాలి. తులసి ఆకులు నమలడం ద్వారా దంతాల పాచి కూడా వదిలించుకోవచ్చు.

తులసి ఆకుల్ని ఎలా వాడాలి?

​ఉదయం పళ్లు తోముకున్న తర్వాత 5-6 తులసి ఆకులను నీటితో కడిగి శుభ్రం చేసుకోవాలి. ఆ తరువాత, ఆకులను నెమ్మదిగా నమలండి. తులసి ఆకుల నమలడం ద్వారా అందులో యాంటీ బ్యాక్టీరియల్, క్రిమినాశక మూలకాలు నోటిలోని బ్యాక్టీరియాను తగ్గిస్తాయి. తులసి ఆకుల్ని నమిలి తినవచ్చు. ఇలా క్రమం తప్పుకుండా చేయడం వల్ల దంతాలపై పసుపు రంగు తగ్గిపోతుంది.

వేపాకులు

చాలా మంది వేప పుల్లల్ని దంతాల్ని శుభ్రపర్చుకోవడానికి ఉపయోగిస్తారు. ఆయుర్వేదంలో వేపాకలు దంతాల ఆరోగ్యానికి ఉపయోగిస్తారు. కావిటీస్, దంత క్షయాన్ని తగ్గించడంలో వేపాకులు బాగా ఉపయోగపడతాయి. వేపాకుల్లో యాంటీ బ్యాక్టీరియల్ మూలకాలు కనిపిస్తాయి. ఈ మూలకాలు దంతాల్లోని బ్యాక్టీరియాను తగ్గిస్తాయి. అంతేకాకుండా నొప్పి, వాపు నుంచి ఉపశమనం లభిస్తంది. రోజూ వేపాకుల్ని నమలడం ద్వారా దంతాలు, చిగళ్లును ఆరోగ్యంగా ఉంచుకోవచ్చు. అంతేకాకుండా దంతాల మీద పాచి, గారె కూడా తొలగిపోతుందని నిపుణులు చెబుతున్నారు.

పుదీనా ఆకులు

​పుదీనా ఆకుల్ని మౌత్ ఫ్రెషనర్‌గా వాడుతుంటారు. ఇందులో యాంటీ ఆక్సిడెంట్లు, పోషకాలు ఉంటాయి. పచ్చి పుదీనా ఆకులను నమలడం వల్ల దంతాల పసుపు రంగు తగ్గుతుంది. పుదీనాలో ఉండే యాంటీ ఆక్సిడెంట్లు దంతాలకు కొత్త మెరుపునిస్తాయి. పుదీనా ఆకులను రోజుకు ఒకటి లేదా రెండుసార్లు నమలడం ద్వారా దంతాల పసుపు రంగును తగ్గించుకోవచ్చు.

దంతాల పాచికి కారణాలు

* సరిగ్గా బ్రష్ చేయకపోవడం

* పొగాకు నమిలే అలవాటు

* ధూమపానం, మద్యపానం

* ఎక్కువగా టీ, కాఫీ తాగడం

* చెడు ఆహారపు అలవాట్లు

* ఫ్లోరైడ్ అధికంగా ఉన్న నీరు తాగడం

* సోడా, కార్బోనేటెడ్ డ్రింక్స్ తాగడం

* దంతాలు ఆరోగ్యంగా ఉండాలంటే ఈ అలవాట్లకు దూరంగా ఉండండి. అంతేకాకుండా రోజుకు రెండు సార్లు బ్రష్ చేసుకోవడం అలవాటు చేసుకోవాలని నిపుణులు చెబుతున్నారు.