బొప్పాయితో పాటు ముఖంపై ముడతలు తగ్గించి అందాన్ని పెంచే పండ్లు, ఎప్పుడు తినాలంటే

ప్రతి ఒక్కరూ అందంగా ఉండాలని కోరుకుంటారు. అయితే, ఈ రోజుల్లో లైఫ్‌స్టైల్, కాలుష్యం, అనారోగ్యకర ఆహారపు అలవాట్లు అనేక చర్మ సమస్యలకు కారణమవుతున్నాయి. ఇక, వయసు పెరిగే కొద్దీ ముఖంపై ముడతలు రావడం కామన్ ప్రాబ్లమ్. అయితే, చాలా మంది చిన్న వయసులోనే ముఖంపై ముడతలు వచ్చి ముసలి వారిలా కనిపిస్తున్నారు. దీంతో.. చాలా మంది ఆందోళన చెందుతున్నారు. చిన్న వయసులోనే ఇలా ఎందుకు జరుగుతుందని ఆలోచిస్తున్నారు.

చిన్న వయసులోనే ముఖంపై ముడతలు రావడం వెనుక చాలా కారణాలు ఉండవచ్చు. వీటిలో సరైన ఆహారం తీసుకోకపోవడం, వ్యాయామం లేకపోవడం, అధిక ఒత్తిడి వంటి కారణాలు ఉంటాయి. ముడతల సమస్య, వృధాప్య ఛాయల్ని తగ్గించడం కోసం సరైన జీవనశైలితో పాటు సరైన ఆహారం తీసుకోవడం చాలా ముఖ్యం. ఆహారంలో కొన్ని పండ్లను భాగం చేసుకోవాలి. ఈ పండ్లు తినడం వల్ల ముఖంపై ముడతలు తగ్గి అందం రెట్టింపు అవుతుందని నిపుణులు చెబుతున్నారు. ఇంతకీ ఆ పండ్లు ఏంటంటే..

బొప్పాయి

​​బొప్పాయి ఆరోగ్యానికి ఎంతో మేలు చేస్తుంది. ఇది చర్మం ఆరోగ్యంలో కూడా కీలక పాత్ర పోషిస్తుంది. ఇందులో ఫోలిక్ యాసిడ్, పొటాషియం, మెగ్నీషియం, విటమిన్ ఎ, విటమిన్ సి, వంటి ఎన్నో ముఖ్యమైన పోషకాలు ఈ పండులో ఉన్నాయి. ఇవి చర్మ ఆరోగ్యానికి మేలు చేస్తాయి. బొప్పాయిలో ఉండే పపైన్ ఎంజైమ్ చర్మాన్ని ఆరోగ్యంగా ఉంచడంతోపాటు వృద్ధాప్య సమస్యను తగ్గిస్తుంది. బొప్పాయిలో ఉండే విటమిన్ సి, యాంటీ ఆక్సిడెంట్లు ముఖంపై ముడతల్ని తగ్గిస్తాయి. ప్రతి రోజూ ఉదయాన్నే ఖాళీ కడుపుతో బొప్పాయి తింటే ఈ ప్రయోజనాలు రెట్టింపు అవుతాయని నిపుణులు చెబుతున్నారు.

అరటి పండు

​అరటి పండు ఆరోగ్యానికి చేసే మేలు గురించి ప్రత్యేకంగా చెప్పాల్సిన పనిలేదు. అరటిలో అధిక మొత్తంలో పొటాషియం, విటమిన్లు ఉన్నాయి. అంతేకాకుండా ఎన్నో పోషకాలు అరటి పండు తినడం వల్ల లభిస్తాయి. ఇవి చర్మాన్ని ఆరోగ్యంగా, మెరుస్తూ ఉండటానికి సాయపడతాయి. అరటి పండు తినడం వల్ల చర్మంపై ముడతలు తగ్గుతాయి. అంతేకాకుండా బ్లడ్ షుగర్, కొలెస్ట్రాల్, ఫ్యాటీ లివర్ మొదలైన సమస్యల నుంచి ఉపశమనం లభిస్తుంది. అరటి పండును బ్రేక్ ఫాస్ట్ తర్వాత, సాయంత్రం తింటే మంచిది.

యాపిల్

​యాపిల్‌లో సహజ చక్కెర, ఫ్రక్టోజ్ ఉన్నాయి. యాపిల్‌లో యాంటీ ఆక్సిడెంట్లు అధికంగా ఉంటాయి. అందుకే ఉదయాన్నే ఖాళీ కడుపుతో యాపిల్ తింటే చర్మ ఆరోగ్యం మెరుగుపడుతుంది. చర్మాన్ని ముడతలు పడకుండా కాపాడటంతో పాటు రోజంతా ఎనర్జిటిక్ గా ఉంచుతుంది. యాపిల్‌లో ఉండే యాంటీఆక్సిడెంట్లు, ఫైబర్ చర్మాన్ని ఆరోగ్యంగా, ముడతలు లేకుండా ఉంచడంలో సహాయపడతాయి.

ద్రాక్ష

​ద్రాక్ష పండ్లలో చర్మానికి మేలు చేసే ఎన్నో గుణాలు ఉన్నాయి. ఈ పండులో ఉంటే విటిమిన్ సి, యాంటీ ఆక్సిడెంట్లు చర్మాన్ని ఆరోగ్యంగా ఉంచుతాయి. ద్రాక్ష పండు తినడం వల్ల ముఖంపై ముడతలు తొలగిపోయి చర్మం కాంతివంతంగా మారుతుంది. ద్రాక్ష పండును బ్రేక్ ఫాస్ట్ తర్వాత లేదా మధ్యాహ్నం తింటే మేలు.

ఇవి కూడా ముఖ్యం

చర్మాన్ని ఆరోగ్యంగా ఉంచుకోవడం కోసం పై చెప్పిన పండ్లతో పాటు కొన్ని జాగ్రత్తలు కూడా తీసుకోవాలి. హైడ్రేట్‌గా ఉండటం తప్పనిసరి. అందుకోసం తగినంత నీళ్లు తాగండి. ఆహారంలో పండ్లతో పాటు గింజలు, నట్స్ కూడా యాడ్ చేసుకోండి. బాదం, వాల్ నట్స్, గుమ్మడి గింజలు వంటివి డైట్‌లో భాగం చేసుకోవాలి. వీటితో పాటు తగినంత నిద్ర, వ్యాయామాన్ని కూడా అలవాటు చేసుకుంటే చర్మంపై ముడతలు తగ్గుతాయని నిపుణులు చెబుతున్నారు.