'నా భార్యకు.. నన్ను చూస్తూ ఉండడమే ఇష్టం'.. 90 పని గంటలపై పూనావాలా కౌంటర్

ఉద్యోగులు వారానికి 90 గంటలు పని చేయాలని, ఆదివారాలు ఇంట్లో కూర్చుని భార్యను ఎంత సేపు చూస్తారు అంటూ ఎల్ అండ్ టీ కంపెనీ ఛైర్మన్ ఎస్‌ఎన్ సుబ్రహ్మణ్యన్ చేసిన వ్యాక్యలు దుమారం రేపాయి. వివిధ వర్గాల నుంచి విరమర్శలు వస్తున్నాయి. ఈ విషయంపై ప్రముఖ పారిశ్రామికవేత్తలు సైతం తమదైన శైలిలో కౌంటర్లు ఇస్తున్నారు. ఇప్పటికే ఆనంద్ మహీంద్రా స్పందించగా తాజాగా సీరమ్ ఇన్‌స్టిట్యూట్ ఆఫ్ ఇండియా సీఈఓ అదర్ పూనావాలా స్పందించారు. ఆనంద్ మహీంద్రా వ్యాఖ్యలతో ఏకీభవించారు. ఎక్కువ గంటలు పని చేయాలనే విషయంపై పరోక్షంగా విమర్శించారు. ఈ మేరకు సోషల్ మీడియా ఎక్స్ వేదికగా ఓ పోస్ట్ చేశారు.

'నిజమే (ఆనంద్ మహీంద్రా).. నా భార్య కూడా నేను మంచోడినని అనుకుంటుంది. ఆదివారాలు ఇంట్లో నన్ను చూస్తూ ఉండడమే తనకు ఇష్టం. పని విషయంలో క్వాంటిటీ కంటే క్వాలిటీయే ముఖ్యం. వర్క్ లైఫ్‌ను బ్యాలెన్స్ చేసుకోవాలి.' అని ఎక్స్ వేదికగా రాసుకొచ్చారు. అంతకు ముందు ఆనంద్ మహీంద్రా ఈ విషయం స్పందిస్తూ 48,70,90 ఇలా ఎన్ని గంటలు పని చేశామన్నది కాదని, ఉత్పాదకతే ముఖ్యమన్నారు. 'నా భార్య ఎంతో మంచిది. ఆమెను తదేకంగా చూస్తూ ఉండడం నాకు చాలా ఇష్టం' అంటూ ఆయన పేర్కొన్నారు.

ఇటీవలే ఎల్అండ్‌టీ ఛైర్మన్ ఎస్ఎన్ సుబ్రహ్మణ్యన్ చేసిన వ్యాఖ్యలు తీవ్ర చర్చకు దారితీశాయి. ' ఇంట్లో కూర్చుని ఎంతసేపు అలా భార్యవైపు చూస్తూ ఉండిపోతారు? ఇంట్లో తక్కువ సమయం ఆఫీసులో ఎక్కువ సమయం ఉంటామని భార్యలకు చెప్పాలి. అవసరమైతే ఆదివారాలూ పని చేయాలి.' అని పేర్కొన్నారు. ఈ క్రమంలో ఒక ఉన్నత స్థాయిలో ఉన్న వ్యక్తి అలా మాట్లాడడం సరికాదని చాలా మంది విమర్శించారు. కార్మిక సంఘాలతో పాటుగా ప్రముఖ వ్యాపారవేత్తలు, సినీ, క్రీడా ప్రముఖులు స్పందించారు. అయితే, ఈ విషయంపై ఎల్ అండ్ టీ సంస్థ క్లారిటీ ఇచ్చింది. ఛైర్మన్ ఎస్ఎన్ సుబ్రహ్మణ్యన్ చేసిన వ్యాఖ్యలు విస్తృత ఆశయాన్ని ప్రతిబింబిస్తాయని పేర్కొంది. అసాధారణ ఫలితాలు సాధించేందుకు అసాధారణ కృషి అవసరమని తెలిపింది.