సీనియర్లకు బిగ్ రిలీఫ్.. రూ.10 లక్షల వరకు నో ట్యాక్స్? బడ్జెట్ అంచనాలివే..

ప్రతి సంవత్సరం బడ్జెట్ ప్రవేశపెట్ట సమయంలో ట్యాక్స్ పేయర్లు ఎలాంటి పన్ను మినహాయింపులు ప్రకటిస్తారోనని ఆత్రుతగా ఎదురు చూస్తారు. ముఖ్యంగా 60 సంవత్సరాలు పైబడిన సీనియర్ సిటిజన్లు. సాధారణంగా సీనియర్ సిటిజన్లకు పెన్షన్ వంటి చాలా తక్కువ ఆదాయ మార్గాలు ఉంటాయి. దీంతో వారికి ఆదాయపు పన్నులకు సంబంధించి ఎక్కువ మినహాయింపులు ఇవాలని డిమాండ్ ఉన్నాయి. ఈ క్రమంలో ఫిబ్రవరి 1, 2025 రోజున ప్రవేశపెట్టనున్న వార్షిక బడ్జెట్‌లో కేంద్రం ఆర్థిక మంత్రి నిర్మలా సీతారమన్ కీలక ప్రకటనలు చేస్తారని ట్యాక్స్ నిపుణులు అంచనా వేస్తున్నారు. ముఖ్యంగా సీనియర్ సిటిజన్లకు రిలీఫ్ కల్పిస్తూ పాత పన్ను విధానంలో ట్యాక్స్ శ్లాబుల్లో మార్పులు చేయాలని కోరుతున్నారు.

బడ్జెట్ 2020-21లో కొత్త పన్ను విధానం ప్రకటించిన తర్వాత నుంచి ఇప్పటి వరకు పాత పన్ను విధానంలో ఎలాంటి ప్రధాన మార్పులు చేయలేదు. అయితే, 2023-24 బడ్జెట్‌లో 60 సంవత్సరాలు పైబడిన సీనియర్ సిటిజన్లకు ఆదాయపు పన్ను బెసిక్ ఎగ్జెంప్షన్ లిమిట్ రూ.3 లక్షలకు పెంచింది. 80 ఏళ్లు పైబడిన వారికి రూ.5 లక్షలుగా చేసింది. ఈ ఏడాది బడ్జెట్‌లో ప్రధానంగా కొత్త పన్ను విధానంపై ప్రభుత్వం దృష్టి సారించే అవకాశం ఉందని ట్యాక్స్ నిపుణులు చెబుతున్నారు. ట్యాక్స్ పరిధిలోకి మరింత మందిని తీసుకొచ్చేందుకు చర్యలు తీసుకోవచ్చు. ఇదే సమయంలో పాత పన్ను విధానంలో కీలక మార్పులు చేసే అవకాశాలు కనిపిస్తున్నాయని చెబుతున్నారు. ముఖ్యంగా సీనియర్ సిటిజన్ల ట్యాక్స్ శ్లాబుల్లో మార్పులు చేయవచ్చని తెలిపారు. బెసిక్ ట్యాక్స్ ఎగ్జెంప్షన్ పరిమితి రూ.5 లక్షలు, సూపర్ సీనియర్లకు రూ.7 లక్షలకు పెంచే అవకాశం ఉందన్నారు.

ప్రస్తుతం పాత పన్ను విధానంలో 60-80 ఏళ్ల మధ్య వయసు ఉన్న సీనియర్ సిటిజన్లకు రూ.3 లక్షల వరకు ఎలాంటి ట్యాక్స్ లేదు. రూ.3-5 లక్షల మధ్య 5 శాతం, రూ.5-10 లక్షల వరకు 20 శాతం, ఆపైన 30 శాతం ట్యాక్స్ రేట్లు ఉన్నాయి. ఇక 80 ఏళ్లు పైబడిన వారికి రూ.5 లక్షల వరకు ఎలాంటి ట్యాక్స్ ఉండదు. రూ.5-10 లక్షల వరకు 20 శాతం ఆపైన 30 శాతం ట్యాక్స్ శ్లాబ్స్ ఉంటాయి. సాధారణంగా సీనియర్ సిటిజన్లు పొదుపు పథకాల్లో ఇన్వెస్ట్ చేస్తుంటారు. వారికి పాత పన్ను విధానంలోనే సెక్షన్ 80సీ మినహాయింపులు లభిస్తాయి. దీంతో పాత పన్ను విధానంలో ట్యాక్స్ శ్లాబులు మార్పాలని డిమాండ్లు వినిపిస్తున్నాయి.

కొత్త శ్లాబులు ఇలా ఉండే ఛాన్స్..!

60-79 ఏళ్ల వారికి రూ.5 లక్షల వరకు ఎలాంటి ట్యాక్స్ ఉండదు. రూ.5-10 లక్షల వరకు 20 శాతం, రూ.10 లక్షలు ఆపైన 30 శాతం ట్యాక్స్ ఉండొచ్చు. 80 ఏళ్లు దాటిన వారికి రూ.7 లక్షల వరకు పన్ను మినహాయింపు. రూ.7-10 లక్షలకు 20 శాతం, రూ.10 లక్షలపైన 30 శాతం ట్యాక్స్ ఉండొచ్చు. ఇదే జరిగితే 60 ఏళ్ల వయసు పైబడిన వారికి రూ.10 లక్షల ఆదాయం ఉన్నప్పటికీ ఒక్క రూపాయి ట్యాక్స్ కట్టకుండా చూసకుకోవచ్చు. అది ఎలాగో తెలుసుకుందాం.

ఆదాయం రూ.10 లక్షలు ఉంటే అందులో రూ.5 లక్షలకు బేసిక్ ట్యాక్స్ ఎగ్జెంప్షన్ ఉంటుంది. ఆ తర్వాత సెక్షన్ 80సీ ద్వారా రూ.1.50 లక్షలు, సెక్షన్ 80సీసీడీ (1బీ) ద్వారా రూ.50 వేలు, సెక్షన్ 80డీ ద్వారా రూ.50 వేలు, స్టాండర్డ్ డిడక్షన్ రూ.50 వేలు, సెక్షన్ 80టీటీబీ ద్వారా రూ.50 వేలు, ఫ్యామిలీ పెన్షన్ ద్వారా రూ.15 వేలు, సెక్షన్ 80డీడీబీ ద్వారా రూ.1 లక్ష వరకు మినహాయింపులు క్లెయిమ్ చేసుకోవచ్చు. అంటే మొత్తం రూ.5.65 లక్షల వరకు పన్ను ఆదాయంపై మినహాయింపులు పొందచ్చు. దీని ప్రకారం చూస్తే రూ.10 లక్షల వరకు ఆదాయం ఉన్నా ఎలాంటి ట్యాక్స్ పడదు.