పబ్లిక్ ఇష్యూకు ట్రేడింగ్ ప్లాట్‌ఫామ్ 'గ్రో'.. రూ.6000 కోట్లు సమీకరణే లక్ష్యం

ఫైనాన్షియల్ సేవలు అందించే ప్రముఖ ట్రేడింగ్ ప్లాట్ ఫామ్ గ్రో ఇన్వెస్టర్లకు సుపరిచితమే. లక్షల మంది ఈ ప్లాట్ ఫామ్ వినియోగిస్తున్నారు. ఇప్పుడుఈ గ్రో ప్లాట్ ఫామ్ మరో కీలక అడుగు వేస్తోంది. పబ్లిక్ ఇష్యూకు వచ్చేందుకు సిద్ధమవుతోంది. ఈ మేరకు ఐపీఓకు సంబంధఇంచిన సన్నాహాలు త్వరలో ప్రారంభించనున్నట్లు సంబంధిత వ్యక్తులు తెలిపినట్లు జాతీయ మీడియాల్లో కథనాలు వెలువడుతున్నాయి. ఈ ఏడాది 2025 చివరి నాటికి పబ్లిక్ ఇష్యూకు సంబంధించి సెక్యూరిటీస్ ఎక్స్చేంజ్ బోర్డ్ ఆఫ్ ఇండియా (సెబీ)కి ముసాయిదా పత్రాలు సమర్పించే అవకాశం ఉందని తెలుస్తోంది.

ట్రేడింగ్ ప్లాట్ ఫామ్ గ్రో దేశీయంగా ఐపీఓకు వస్తోంది. పబ్లిక్ ఇష్యూలో భాగంగా తొలుత తన హోల్డింగ్ కంపెనీని అమెరికా నుంచి భారత్‌కు తరలించాలని భావిస్తున్నట్లు తెలుస్తోంది. హోల్డింగ్ కంపెనీ ఇండియాకు మార్చిన తర్వాత ఏడాదిలోపే ఐపీఓకు రానుందని సమాచారం. ఈ ఫైనాన్షియల్ సేవల సంస్థ ఐపీఓ ద్వారా ఏకంగా 6-8 బిలియన్ డాలర్లు అంటే దాదాపూ రూ. 6000 కోట్లకుపైగా సమీకరించాలని భావిస్తున్నట్లు తెలుస్తోంది. ఇప్పటికే పబ్లిక్ ఇష్యూకు సంబంధించిన చర్చలు మొదలు పెట్టిందని సమాచారం.

కంపెనీ స్టాక్ ఎక్స్చేంజీ డేటా ప్రకారం డిసెంబర్, 2024 నాటికి గ్రో ట్రేడింగ్ ప్లాట్ ఫామ్ 13.2 మిలియన్ల యాక్టివ్ యూజర్లను కలిగి ఉంది. ప్రతి నెలా సగటున 3.25 లక్షల నుంచి 5.50 లక్షల మంది కొత్త యూజర్లను చేర్చుకుంటోంది. స్టాక్ మార్కెట్, మ్యూచువల్ ఫండ్స్, ఈక్విటీ పెట్టుబడులు చేసే లక్షల మంది ఇన్వెస్టర్లు ఈ డిజిటల్ ప్లాట్ ఫామ్ ఉపయోగిస్తున్నారు. దీంతో ట్రేడింగ్ చేసే వారికి ఈ గ్రో ప్లాట్ ఫామ్ సుపరిచితమే. ఈ క్రమంలో ఈ ఐపీఓకు మంచి డిమాండ్ ఉంటుందని మార్కెట్ వర్గాలు అంచనా వేస్తున్నాయి.

మరోవైపు.. ఈ 2025 ఏడాది ముగిసే నాటికి 90కి పైగా కంపెనీలు పబ్లిక్ ఇష్యూకు రానున్నాయని పలు నివేదికలు చెబుతున్నాయి. ఏకంగా రూ.3 లక్షల కోట్లకుపైగా సమీకరించే అవకాశం ఉందని తెలిపాయి. అలాగే 30కి పైగా స్టార్టప్ కంపెనీలు పబ్లిక్ ఇష్యూకు వచ్చేందుకు సన్నద్ధమవుతున్నట్లు సమాచారం. ఈ క్రమంలో 2025 ఏడాదంతా ఐపీఓల సందడి నెలకొననుంది. లిస్టింగ్ గెయిన్స్ కోసం చూసే వారికి ఇది మంచి అవకాశంగా చెప్పవచ్చు. ఇప్పటి వరకు ఐపీఓకు వచ్చిన కంపెనీల్లో చాలా వరకు మంచి లాభాలు అందించాయి. కొన్ని కంపెనీలు మాత్రమే నెగెటివ్ రిటర్న్స్ ఇచ్చాయి.