8వ వేతన సంఘం ఏర్పాటు.. జీతాలు ఎంత పెరగొచ్చు? ఎలా లెక్కించాలి

కేంద్ర ప్రభుత్వ ఉద్యోగుల జీతభత్యాలకు సంబంధించి ప్రధాన మంత్రి నరేంద్ర మోదీ నేతృత్వంలోని ఎన్డీయే సర్కార్ కీలక నిర్ణయం తీసుకుంది. ఉద్యోగులకు అదిరే శుభవార్త చెప్పింది. చాలా కాలంగా ఉన్న డిమాండ్‌ను పరిగణలోకి తీసుకుని 8వ వేతన సంఘం ఏర్పాటు చేసేందుకు ఆమోదం తెలిపింది. ఈ మేరకు పీఎం మోదీ నేతృత్వంలోని కేంద్ర కేబినెట్ గురువారం సమావేశమై 8వ పే కమిషన్ ఏర్పాటుకు ఓకే చెప్పినట్లు కేంద్ర మంత్రి అశ్విని వైష్ణవ్ తెలిపారు. కొత్త పే కమిషన్ అమలులోకి వస్తే ఉద్యోగుల జీతాలు పెరుగుతాయని చాలా సార్లు వినే ఉంటారు. అయితే, మరి 8వ వేతన సంఘం సిఫార్సులు అమలులోకి వస్తే వేతనాలు ఎంత పెరగొచ్చు? ఎలా లెక్కించాలి? అనేది నిపుణుల మాటల్లో తెలుసుకుందాం.

7వ వేతన సంఘం జనవరి 1, 2016 నుంచి అమలులోకి వచ్చింది. డిసెంబర్ 31, 2025తో ముగుస్తుంది. అప్పటి నుంచి కొత్త పే స్కేల్ అమలులోకి రానుంది. కొత్త ఫిట్‌మెంట్ ఫ్యాక్టర్ ప్రకటిస్తారు. దీని ఆధారంగా వేతనాలు, పెన్షన్ ఎంత అనేది నిర్ణయం తీసుకుంటారు. ప్రస్తుతం 8వ వేతన సంఘం ఏర్పాటుకు కేంద్రం ఆమోదం తెలిపినప్పటికీ ఎలాంటి మార్గదర్శకాలు విడుదల చేయలేదు. పే కమిషన్ ఏర్పాటు తర్వాత కొద్ది రోజులకు సిఫార్సులు అందించనుంది. దాని ప్రకారమే వేతనాల పెంపు ఉంటుంది.

8వ వేతన సంఘం సిఫార్సులు అమలులోకి వస్తే ఉద్యోగుల కనీస వేతనం భారీగా పెరగనుందని ఆర్థిక నిపుణులు చెబుతున్నారు. కింగ్ స్టబ్ అండ్ కసివా పార్ట్నర్ రోహితాశ్వ్ సిన్హా ఎకనామిక్ టైమ్స్‌తో ఈ విషయంపై మాట్లాడారు. ' 7వ వేతన సంఘం జనవరి 2016 నుంచి అమలులోకి వచ్చింది. అప్పుడు కనీస బేసిక్ పే రూ.7 వేల నుంచి రూ.18000 పెరిగింది. ఫిట్‌మెంట్ ఫ్యాక్టర్ 2.57గా ఉంది. ఇక 8వ వేతన సంఘం అమలులోకి వస్తే బేసిక్ పే అనేది 186 శాతం పెరుగుతుందని అంచనా. దీంతో నెల వారీ కనీస వేతనం రూ.51,480కి చేరనుంది. అంటే అప్పుడు ఫిట్‌మెంట్ ప్యాక్టర్ 2.86గా ఉండొచ్చు. ఈ మార్పులను సెంట్రల్ సివిల్ సర్వీసెస్ (రివైజ్డ్ రూల్స్) రూల్స్ 2025 ద్వారా అమలు చేయనున్నారు. అలాగే పెన్షన్, రిటైర్మెంట్ బెనిఫిట్స్ ఈపీఎఫ్, గ్రాట్యుటీ వంటివి పెరగనున్నాయి.' అని ఆయన తెలిపారు.

ఎలా లెక్కించాలి?

ఇక్కడ ఫిట్‌మెంట్ ఫ్యాక్టర్ కీలకంగా మారనుంది. ఫిట్‌మెంట్ ఫ్యాక్టర్ అనేది అన్ని పే గ్రేడ్‌లలో జీతం పెంపుదల ఒకే విధంగా వర్తింపజేసేందుకు కీలకమైన యంత్రాంగంగా పని చేస్తుంది. పెరుగుతున్న ఖర్చులకు అనుగుణంగా, ఉద్యోగుల జీవన ప్రమాణాలను కొనసాగించేందుకు వీలు కల్పిస్తుంది. కేంద్ర ప్రభుత్వ ఉద్యోగులు, పెన్షనర్ల కనీస వేతనాలను ఫిట్‌మెంట్ ఫ్యాక్టర్‌తో మల్టిప్లై చేయాల్సి ఉంటుంది.

ఒక ఉదాహరణ ద్వారా అర్థం చేసుకునే ప్రయత్నం చేద్దాం. ప్రస్తుతం ఒక ఉద్యోగి బేసిక్ శాలరీ రూ.40 వేలుగా ఉందని అనుకుందాం. 8వ వేతన సంఘం అమలులోకి వచ్చాక ఫిట్‌మెంట్ ఫ్యాక్టర్ 2.5 శాతంగా సిఫార్స్ చేసిందని భావిస్తే అప్పుడు ఆ ఉద్యోగి కనీస వేతనం రూ.1 లక్ష అవుతుంది (40,000x2.5= 1,00,000). అయితే, తొలి నాళ్లలో డియర్‌నెస్ అలవెన్స్  అనేది ఇవ్వరు. కొన్ని సంవత్సరాల తర్వాత డీఏ జమ చేస్తూ ఉంటారు. అలాగే ఇతర అలవెన్సుల్లోనూ కీలక మార్పులు రానున్నాయి.