ఎస్‌బీఐ ఖాతాదారులూ.. ఇక ఆ ఫోన్లలో యోనో సేవలు బంద్.. ఎప్పటినుంచంటే?

ప్రభుత్వ రంగానికి చెందిన అతిపెద్ద బ్యాంకింగ్ సంస్థ స్టేట్ బ్యాంక్ ఆఫ్ ఇండియా (ఎస్‌బీఐ) తమ ఖాతాదారుల కోసం ఎప్పటికప్పుడు కొత్త కొత్త సాంకేతికతను అందుబాటులోకి తీసుకొస్తోంది. డిజిటల్ సేవలు అందించేందుకు ఎస్‌బీఐ యోనో యాప్ తీసుకొచ్చిన సంగతి తెలిసిందే. దాదాపు అన్ని బ్యాంకింగ్ సేవలను ఈ యోనో యాప్ ద్వారానే అందిస్తోంది. లక్షల మంది నిత్యం ఈ యోనో యాప్ వినియోగిస్తున్నారు. అయితే, ఈ యోనో యాప్ వినియోగంపై తమ యూజర్లను అలర్ట్ చేసింది ఎస్‌బీఐ. యూజర్ల భద్రత దృష్ట్యా కీలక నిర్ణయం తీసుకుంది.

డిజిటల్ సేవలు ఏ స్థాయిలో అందుబాటులోకి వచ్చాయో అదే స్థాయిలో సైబర్ మోసాలు పెరిగాయి. దీంతో ఎస్‌బీఐ బ్యాంక్ తమ ఖాతాదారుల భద్రత కోసం ఎప్పటికప్పుడు తగిన చర్యలు తీసుకుంటోంది. తాజాగా యోనో యాప్ సేవలపై దృష్టి పెట్టింది. త్వరలోనే పలు స్మార్ట్ ఫోన్లలో ఈ యోనో సేవలను నిలిపివేస్తున్నట్ల ప్రకటించింది. ఆండ్రాయిడ్ 11, అంత కంటే తక్కువ వెర్షన్ ఆపరేటింగ్ సిస్టమ్ ఉన్న స్మార్ట్ ఫోన్లలో త్వరలోనే యోనో సేవలు నిలిపి వేయనుంది. ఈ మేరకు పాత వెర్షన్ మొబైల్స్ ఉపయోగిస్తున్న స్టేట్ బ్యాంక్ కస్టమర్లకు సందేశాలు పంపిస్తోంది.

  తమ ఖాతాదారుల భద్రతను దృష్టిలో పెట్టుకొని యోనో సేవల నిలిపివేత నిర్ణయం తీసుకున్నట్లు ఎస్‌బీఐ చెబుతోంది. వెంటనే కొత్త వెర్షన్ మొబైల్‌కి మారాలని సూచించింది. అందుకు కొంత గడువు ఇచ్చింది. ఆండ్రాయిడ్ 11 అంత కంటే తక్కువ వెర్షన్ మొబైల్స్ యూజ్ చేస్తున్న వారికి ఫిబ్రవరి 28, 2025 వరకు అవకాశం ఉంది. ఫిబ్రవరి 28వ తేదీ లోపు ఆండ్రాయిడ్ 12 అంత కంటే ఎక్కువ వెర్షన్ మొబైల్స్‌కి అప్ గ్రేడ్ కవాలని సూచించింది. లేకపోతే పాత ఫోన్లలో మార్చి 1, 2025 నుంచి యోనో సేవలు నిలిచిపోతాయని స్పష్టం చేసింది. ఇప్పటికీ చాలా మంది ఖాతాదారులు పాత వెర్షన్ ఫోన్లు ఉపయోగిస్తున్నట్లు గుర్తించిన క్రమంలో భద్రత దృష్ట్యా ఈ నిర్ణయం తీసుకోవాల్సి వచ్చిందని బ్యాంక్ వర్గాలు తెలిపాయి.