బడ్జెట్‌లో టాక్స్‌పేయర్లకు ఊరట? స్టాండర్డ్ డిడక్షన్ పెంపు, పన్ను రేట్ల తగ్గింపును పరిశీలిస్తున్న కేంద్రం

కేంద్ర వార్షిక బడ్జెట్‌- 2025కు సమయం దగ్గరపడుతోంది. ఫిబ్రవరి ఒకటో తేదీనే కేంద్ర ఆర్థిక మంత్రి నిర్మలా సీతారామన్ మరోసారి బడ్జెట్‌ను పార్లమెంట్ దిగువ సభలో (లోక్‌సభ) ప్రవేశపెడతారు. ఇప్పుడు బడ్జెట్‌కు తేదీ దగ్గరపడుతున్న కొద్దీ సామాన్యుల్లో అంచనాలు పెరిగిపోతున్నాయి. ముఖ్యంగా వేతన జీవులు (శాలరీడ్ పర్సన్స్) ఎప్పటిలాగే ఇప్పుడు కూడా గంపెడాశలు పెట్టుకున్నారు. గత కొన్ని బడ్జెట్ల సందర్భంగా టాక్స్ పేయర్లకు ఊరటనిస్తూ కేంద్ర ప్రభుత్వం నిర్ణయాలు తీసుకుంటున్న సంగతి తెలిసిందే. ముఖ్యంగా కొత్త పన్ను విధానంలోనే టాక్స్ శ్లాబుల్ని సరళీకరించండ సహా స్టాండర్డ్ డిడక్షన్ పెంచడం వంటివి చేస్తూ వస్తుంది. ఈ క్రమంలోనే ఇప్పుడు 2025 బడ్జెట్ వేళ కూడా వారికి ఊరటనిచ్చే దిశగా కేంద్రం నిర్ణయాలు తీసుకుంటుందని విశ్వసనీయ వర్గాలు చెబుతున్నాయి.

ముఖ్యంగా వేతన జీవులకు తీపికబురు చెప్పడం ద్వారా వినియోగాన్ని పెంచి తద్వారా ఆర్థిక వృద్ధికి ఊతం అందించాలని కేంద్రం భావిస్తున్నట్లు తెలుస్తోంది. ఈ మేరకు కేంద్రం టాక్స్‌ రేట్లకు సంబంధించి రెండు, మూడు అంశాలు ప్రభుత్వ పరిశీలనలో ఉన్నాయని.. విశ్వసనీయ వర్గాల్ని ఉటంకిస్తూ CNBC-18 ఒక కథనం ప్రచురించింది.

>> దేశ ఆర్థిక వృద్ధిని పరుగులు పెట్టించాలంటే.. వస్తు, సేవలకు డిమాండ్ పెంచడం కీలకం. ఈ క్రమంలోనే టాక్స్‌పేయర్లకు ఊరట ఇస్తే.. కొనుగోలు శక్తి పెరిగి వృద్ధికి ఊతం లభిస్తుందని ప్రభుత్వం భావిస్తుందంట. ఈ క్రమంలోనే ప్రత్యక్ష పన్నులు, జీఎస్టీ వసూళ్లు కూడా పెరిగి ఖజానాకు పెద్ద మొత్తంలో రాబడి వస్తుందని కేంద్రం భావిస్తున్నట్లు తెలుస్తోంది. ఈ క్రమంలోనే వినియోగం పెంచి.. వృద్ధికి బాటల పరిచే దిశగా కేంద్రం.. బడ్జెట్‌లో వ్యక్తిగత ఆదాయపు పన్ను మినహాయింపుల్ని పెంచాలని పలు కన్సల్టింగ్ సంస్థలు కూడా అభిప్రాయపడుతున్నాయి.

>> వేతన జీవులకు ఊరట ఎలా కలిగించాలన్న దానిపై వివిధ అంశాల్ని కేంద్రం పరిశీలిస్తున్నట్లు సంబంధిత వర్గాలు చెబుతున్నాయి. దీంట్లో ఒకటి కొత్త పన్ను విధానాన్ని టాక్స్ పేయర్లకు మరింత ఆకర్షణీయంగా మార్చడం. కిందటిసారి బడ్జెట్‌లో కొత్త పన్ను విధానంలో స్టాండర్డ్ డిడక్షన్‌ను రూ. 50 వేల నుంచి రూ. 75 వేలకు పెంచగా.. ఈసారి కూడా మరింత పెంచొచ్చని తెలుస్తోంది.

కొత్త పన్ను విధానంలో ప్రస్తుత టాక్స్ శ్లాబుల్ని మరోసారి సవరించడం రెండో ఆప్షన్‌గా ఉన్నట్లు సంబంధిత వర్గాలు పేర్కొన్నాయి. ప్రస్తుతం కొత్త పన్ను విధానంలో రూ. 12-15 లక్షల వార్షికాదాయంపై 20 శాతం టాక్స్ పడుతోంది. దీనిని రూ. 12-18 లక్షలకు లేదా రూ. 12-20 లక్షలకు పెంచొచ్చని తెలుస్తోంది. రూ. 15 లక్షల పైబడిన ఆదాయంపై 30 శాతం టాక్స్ వర్తిస్తుండగా.. దీనిని రూ. 18 లక్షలు లేదా రూ. 20 లక్షలపైన సంపాదిస్తున్న వారికి వర్తింపజేయాలని కేంద్రం భావిస్తున్నట్లుగా సదరు వర్గాలు అంటున్నాయి. మరి కేంద్రం చివరకు బడ్జెట్‌లో ఏం నిర్ణయం తీసుకుంటుందోనని సర్వత్రా ఆసక్తి నెలకొంది.