వరుసగా ఆరు సెషన్లు అప్పర్ సర్క్యూట్ కొట్టిన స్టాక్.. లక్షకు రెండేళ్లలోనే రూ. 1.3 కోట్లొచ్చాయ్.. కాసుల పంట

మీరు స్టాక్ మార్కెట్లలో ఇన్వెస్ట్ చేస్తున్నారా.. అయితే ఎలాంటి స్టాక్స్ ఎంచుకుంటున్నారు. కొన్ని స్టాక్స్ ఊహించని రీతిలో ఇన్వెస్టర్లకు అదిరిపోయే రిటర్న్స్ అందిస్తుంటాయి. దలాల్ స్ట్రీట్‌లో ఇన్వెస్టర్ల సంపదను పెంచే షేర్లు చాలానే ఉంటాయి. షేరు అసలు ధరకు అనతి కాలంలోనే ఎన్నో రెట్లు పెరిగితే దానిని మల్టీబ్యాగర్ స్టాక్స్ అంటారు. వీటిని గుర్తించడమే కాస్త కష్టం కానీ.. ఒక్కసారి కనిపెట్టి ఇన్వెస్ట్ చేస్తే కళ్లుచెదిరేలా లాభాలు కూడా అందిస్తుంటాయి. ఇందుకోసం ఆయా కంపెనీల ఫలితాలు, ప్రకటనలు, పెట్టుబడి వ్యూహాలు, ప్రణాళికలు ఇలా అన్నీ గమనిస్తూ ఉండాలి. అప్పుడు ఆర్థిక నిపుణుల నుంచి సలహాలు తీసుకొని ఇన్వెస్ట్ చేసేందుకు ఆలోచించాలి. ఇప్పుడు మనం ఇలా ఇన్వెస్టర్లకు అదిరిపోయేలా రిటర్న్స్ అందించిన ఒక మల్టీబ్యాగర్ స్టాక్ గురించి తెలుసుకుందాం.

అదే ఎరాయా లైఫ్‌సైన్సెస్ లిమిటెడ్. ఇది వరుస సెషన్లలో అప్పర్ సర్క్యూట్లు కొడుతూనే ఉంది. జనవరి 17 తో (శుక్రవారం) కలిపి వరుసగా 6 సెషన్లు ఈ స్టాక్ 5 శాతం చొప్పున అప్పర్ సర్క్యూట్ కొట్టడం విశేషం. ఈ క్రమంలోనే 6 రోజుల్లో ఏకంగా 32 శాతానికిపైగా రిటర్న్స్ అందించింది. గత 5 రోజుల్లో 21 శాతానికిపైగా పెరిగింది.

జనవరి 17న 4.96 శాతం అప్పర్ సర్క్యూట్‌తో రూ. 124.85 వద్ద సెషన్ ముగించింది. చివరగా జనవరి 9న రూ. 94.15 వద్ద ముగిసిన స్టాక్ తర్వాత వరుసగా జనవరి 10, 13, 14, 15, 16, 17 ఇలా వరుసగా 6 సెషన్లు అప్పర్ సర్క్యూట్లు కొట్టుకుంటూ పోయింది. ఈ క్రమంలోనే దీంట్లో ఇన్వెస్ట్ చేసిన వారికి అద్భుత స్థాయిలో రిటర్న్స్ వచ్చాయి. ఇక కంపెనీ మార్కెట్ విలువ ప్రస్తుతం రూ. 2.36 వేల కోట్లుగా ఉంది. స్టాక్ 52 వారాల గరిష్ట ధర రూ. 316.90 కాగా.. కనిష్ట ధర రూ. 14.72 గా ఉంది.

కొద్ది రోజుల కిందట కర్ణాటక స్టేట్ రోడ్ ట్రాన్స్‌పోర్ట్ కార్పొరేషన్ నుంచి రూ. 33.5 కోట్ల ఆర్డర్ లభించింది. దీంతో మంచి కొనుగోళ్ల మద్దతు లభిస్తోందని నిపుణులు చెబుతున్నారు. ఈ స్టాక్ పెర్ఫామెన్స్ విషయానికి వస్తే నెల వ్యవధిలో 12 శాతం పడిపోగా.. 6 నెలల్లో 50 శాతానికిపైగా పుంజుకుంది. ఇదే సమయంలో ఏడాది వ్యవధిలో చూస్తే 730 శాతం పెరిగింది. అంటే అప్పుడు లక్ష పెట్టుబడితో ఇప్పుడు రూ. 8.31 లక్షలొచ్చేవి. ఇంకా రెండేళ్లలో 13 వేల శాతానికిపైగా పెరగ్గా.. లక్షను రూ. 1.30 కోట్లు చేసింది. ఇంకా ఐదేళ్లలో 76 పైసల నుంచి ఈ స్టాక్ ప్రస్తుత స్థాయికి చేరింది. ఈ క్రమంలో 16,327 శాతం రిటర్న్స్ ఇచ్చింది. అంటే లక్ష పెట్టుబడిని ఈ సమయంలో రూ. 1.63 కోట్లు చేసింది.