డొనాల్డ్ ట్రంప్‌ క్యాండిల్ లైట్ డిన్నర్.. హాజరైన అంబానీ దంపతులు

అమెరికా నూతన అధ్యక్షుడిగా డొనాల్డ్ ట్రంప్ మరికొన్ని గంటల్లో ప్రమాణం చేయనున్నారు. ఈ కార్యక్రమంలో వివిధ దేశాలకు చెందిన ప్రముఖులు, వ్యాపారవేత్తలు, సెలబ్రిటీలు పాల్గొననున్నారు. ఈ క్రమంలోనే రిలయన్స్ ఇండస్ట్రీస్ ఛైర్మన్ ముకేష్ అంబానీ, రిలయన్స్ ఫౌండేషన్ ఛైర్ పర్సన్ నీతా అంబానీ కూడా ఈ కార్యక్రమంలో పాల్గొననున్నారు. అయితే అంతకుముందే ముకేష్ అంబానీ, నీతా అంబానీ.. డొనాల్డ్ ట్రంప్‌తో భేటీ అయ్యారు. దీనికి సంబంధించిన ఫోటో, వీడియో వైరల్ అవుతున్నాయి. జనవరి 20వ తేదీ అంటే ఆదివారం రోజున అమెరికా నూతన అధ్యక్షుడిగా ట్రంప్ ప్రమాణ స్వీకారం చేస్తారు.

ప్రమాణ స్వీకారం సందర్భంగా వాషింగ్టన్‌లో డొనాల్డ్ ట్రంప్ క్యాండిల్ లైట్ డిన్నర్ ఏర్పాటు చేశారు. ఈ కార్యక్రమానికి పలువురు ప్రముఖులు హాజరు కాగా.. అందులో ముకేష్, నీతా అంబానీలు కూడా ఉన్నారు. ఈ విషయాన్ని రిలయన్స్ ఫౌండేషన్ వెల్లడించింది. ఓ ప్రైవేటు విందులో ట్రంప్‌తో ముకేశ్‌ అంబానీ దంపతులు భేటీ అయ్యారని రిలయన్స్‌ ఫౌండేషన్‌ తెలిపింది. ప్రమాణ స్వీకారం సందర్భంగా డొనాల్డ్‌ ట్రంప్‌‌కు వారు శుభాకాంక్షలు తెలిపారని రిలయన్స్ ఫౌండేషన్ పేర్కొంది. డొనాల్డ్ ట్రంప్‌ నాయకత్వంలో ఇరుదేశాల సంబంధాలు మరింత బలోపేతం అవుతాయని ఆశిస్తున్నట్లు రిలయన్స్ ఫౌండేషన్ వెల్లడించింది.

డొనాల్డ్ ట్రంప్ ప్రమాణ స్వీకారోత్సవంలో పలువురు అంతర్జాతీయ ప్రముఖులు పాల్గొననున్నారు. అలాగే భారత్ నుంచి కూడా పలువురు వ్యాపార దిగ్గజాలు హాజరుకానున్నట్లు తెలిసింది. టెస్లా అధినేత ఎలాన్ మస్క్, అమెజాన్ ఫౌండర్ జెఫ్ బెజోస్, మెటా చీఫ్ మార్క్ జుకర్ బర్గ్, పలువురు టెక్ దిగ్గజాలు ఈ కార్యక్రమానికి హాజరుకానున్నారు. ఇక ట్రంప్ ప్రమాణ స్వీకారోత్సవానికి భారతదేశం ప్రభుత్వ ప్రతినిధిగా విదేశాంగ శాఖ మంత్రి ఎస్. జైశంకర్ హాజరు కానున్నారు.

ప్రమాణ స్వీకార కార్యక్రమంలో భాగంగా అమెరికా 47వ అధ్యక్షుడిగా డొనాల్డ్ ట్రంప్ బాధ్యతలు స్వీకరిస్తారు. 2017 నుంచి 2021 మధ్య అమెరికా 45వ అధ్యక్షుడిగా ట్రంప్ పనిచేసిన సంగతి తెలిసిందే. అయితే ఆ తర్వాత జరిగిన అమెరికా అధ్యక్ష ఎన్నికల్లో డెమొక్రాటిక్ అభ్యర్థి జో బైడెన్.. అమెరికా అధ్యక్షుడిగా ఎన్నికయ్యారు. ప్రస్తుతం ఆయనే కొనసాగుతున్నారు. అయితే గతేడాది జరిగిన అమెరికా అధ్యక్ష ఎన్నికల్లో డెమొక్రాటిక్ అభ్యర్థి అయిన కమలా హారిస్‌పై రిపబ్లికన్ పార్టీ అభ్యర్థి డొనాల్డ్ ట్రంప్ విజయం సాధించారు.