రహానే కెప్టెన్సీలో ఆడనున్న రోహిత్ శర్మ.. పదేళ్ల తర్వాత మళ్లీ

బోర్డర్ గవాస్కర్ ట్రోఫీలో పేలవ ప్రదర్శన తర్వాత ఫామ్‌లోకి రావడమే లక్ష్యంగా రోహిత్ శర్మ సన్నద్ధం అవుతున్నాడు. ఇప్పటికే ముంబై రంజీ జట్టుతో కలిసి ప్రాక్టీస్ చేసిన ఈ ప్లేయర్.. తాజాగా రంజీ మ్యాచ్‌ ఆడేందుకు సిద్ధమయ్యాడు. రంజీ ట్రోఫీలో భాగంగా ఈనెల 23 నుంచి ముంబై జట్టు.. జమ్ము కశ్మీర్‌తో మ్యాచ్ ఆడనుంది. ఈ మ్యాచ్‌ కోసం ముంబై 17 మందితో కూడిన జట్టును ప్రకటించింది. ఇందులో రోహిత్ శర్మ కూడా చోటు దక్కించుకున్నాడు.

రోహిత్ శర్మతో పాటు భారత స్టార్‌ ఆటగాళ్లు యశస్వి జైశ్వాల్, శ్రేయస్ అయ్యర్, శివమ్ దూబె, శార్దూల్ ఠాకూర్‌లు ముంబై జట్టు తరఫున ఆడనున్నారు. అంతర్జాతీయ మ్యాచ్‌లు లేని సమయంలో అందుబాటులో ఉంటే ఆటగాళ్లంతా తప్పకుండా దేశవాళీ లీగ్‌ల్లో ఆడాలని ఇటీవల బీసీసీఐ ఆదేశించిన విషయం తెలిసిందే. దీంతో రోహిత్, జడేజా, గిల్‌, పంత్‌ లాంటి ప్లయర్లు రంజీ మ్యాచ్‌లలో ఆడేందుకు సిద్ధమయ్యారు.

ఇక రోహిత్ శర్మ 2015 తర్వాత తొలిసారి రంజీ మ్యాచ్‌ ఆడనున్నాడు. అయితే ముంబై జట్టు అజింక్య రహానే సారథ్యం వహించనున్నాడు. దీంతో టీమిండియా కెప్టెన్ రోహిత్ శర్మ.. అజింక్య రహానే సారథ్యంలో ఆడనున్నాడు. కాగా ఛాంపియన్స్ ట్రోఫీకి ఇటీవల భారత జట్టు ప్రకటించిన విషయం తెలిసిందే. జట్టు ప్రకటన సందర్భంగా ఏర్పాటు చేసిన విలేకరుల సమావేశంలో రోహిత్ మాట్లాడుతూ.. తానూ రంజీ మ్యాచ్ ఆడబోతున్నట్లు చెప్పాడు. అందుకు తగ్గట్లుగానే ముంబై జట్టులో చోటు సంపాదించాడు. ఈ రంజీ మ్యాచ్ తర్వాత అతడు ఇంగ్లాండ్‌తో వన్డే సిరీస్‌లో పాల్గొననున్నాడు!

జమ్ము కశ్మీర్‌తో రంజీ మ్యాచ్‌కు ముంబై జట్టు:

అజింక్యా రహానె (కెప్టెన్), రోహిత్ శర్మ, యశస్వి జైశ్వాల్, ఆయుష్ మాత్రే, శ్రేయస్ అయ్యర్, సిద్ధేష్ లాడ్, శివమ్ దూబె, హార్దిక్ టామోర్ (వికెట్ కీపర్‌), ఆకాష్ ఆనంద్ (వికెట్ కీపర్), తనుష్ కోటియన్, శామ్స్ ములానీ, హిమాన్షు సింగ్, శార్దూల్ ఠాకూర్, మోహిత్ అవస్థి, రాయిస్టన్ డయాస్, సిల్వెస్టర్ డిసౌజా, కర్ష్ కొఠారి.