రింకూ సింగ్‌, ఎంపీ ప్రియా సరోజ్‌ పెళ్లి ఖరారు.. ఏడాది కాలంగా ప్రేమ

టీమిండియా యంగ్ బ్యాటర్‌ రింకూ సింగ్ పెళ్లికి సంబంధించిన వార్తలు ఇటీవల సోషల్‌ మీడియాలో వైరల్‌గా మారిన విషయం తెలిసిందే. సమాజ్‌వాదీ లోక్‌సభ ఎంపీ ప్రియా సరోజ్‌తో రింకూ సింగ్‌ ఎంగేజ్‌మెంట్ జరిగినట్లు వార్తలు వచ్చాయి. అయితే, వీటిని ప్రియా సరోజ్‌ తండ్రి తుఫానీ సరోజ్ ఖండించారు. ఎంగేజ్‌మెంట్ జరగలేదని.. పెళ్లి ప్రతిపాదన మాత్రం వచ్చిందని చెప్పుకొచ్చాడు. తాజాగా ఈ విషయంపై ఆయన అప్‌డేట్ ఇచ్చాడు.

‘రింకూ సింగ్, మా కుటుంబాల మధ్య సుదీర్ఘ చర్చలు జరిగిన తర్వాత ఈ పెళ్లి నిశ్చయం అయింది. అయితే, ఇంకా వీరిద్దరికి నిశ్చితార్థం ఏమీ జరగలేదు. రింకూ - ప్రియా ఏడాది కాలం కంటే ఎక్కువ రోజుల నుంచి ఒకరినొకరు బాగా తెలుసు. వాళ్లిద్దరూ ప్రేమించుకున్నారు. కానీ, పెళ్లికి ఇరు కుటుంబాల అంగీకారం దీనికి అవసరం. వీరిద్దరికీ పెళ్లి చేసేందుకు మా రెండు కుటుంబాలు అంగీకరించాయి’ ప్రియా సరోజ్‌ తండ్రి తుఫాని సరోజ్ పేర్కొన్నారు.

పార్లమెంట్ బడ్జెట్ సమావేశాలు పూర్తైన తర్వాత నిశ్చితార్థం ఉండే అవకాశం ఉంటుందని ప్రియా సరోజ్‌ తండ్రి తెలిపారు. ‘రింకూ సింగ్‌ జనవరి 22 నుంచి ఇంగ్లాండ్‌తో ఐదు మ్యాచుల టీ20 సిరీస్‌లో ఆడనున్నాడు. అందువల్ల అతడి క్రికెట్ షెడ్యూల్‌పై ఎలాంటి ప్రభావం పడకుండా ఉండేలా పెళ్లి ప్లాన్ చేస్తున్నాం. ఇటీవల మా రెండు కుటుంబాలు రింకూ సింగ్ ఇంట్లో కలిశాయి. ఆ రోజే పెళ్లి ఖరారు చేశాం’ అని తుఫానీ సరోజ్‌ వెల్లడించారు.

ఇండియన్ ప్రీమియర్‌ లీగ్‌ ద్వారా వెలుగులోకి వచ్చాడు రింకూ సింగ్. ఒకే ఓవర్‌లో 5 సిక్సర్లు కొట్టిన ఈ ప్లేయర్.. ఒక్కసారిగా ఫేమస్ అయిపోయాడు. తన ప్రదర్శనతో ఏకంగా భారత జట్టులో చోటు సంపాదించాడు. అందివచ్చిన అవకాశాన్ని సద్వినియోగం చేసుకుంటూ.. తనదైన శైలిలో రాణిస్తున్నాడు. ఈ క్రమంలోనే ఐపీఎల్ 2025కి ముందు కోల్‌కతా నైట్‌ రైడర్స్ జట్టు రూ.13 కోట్లు వెచ్చించి రిటైన్ చేసుకుంది. ఇంగ్లాండ్‌తో జరగనున్న ఐదు టీ20ల సిరీస్‌కు సైతం అతడు ఎంపికయ్యాడు.

ప్రియా సరోజ్ నేపథ్యం

ఇక ప్రియా సరోజ్ గతేడాది మచ్లిషహర్ (ఉత్తర ప్రదేశ్‌) లోకసభ నియోజకవర్గం నుంచి సమాజ్‌వాదీ పార్టీ తరఫున ఎంపీగా గెలిచారు. 25 ఏళ్ల వయసులోనే ఎంపీగా ఎన్నికైన ఆమె.. లోక్‌సభ ఎంపీగా గెలిచిన రెండో పిన్న వయస్కురాలిగా రికార్డు సృష్టించారు. ప్రియా సరోజ్ తండ్రి తుఫానీ సరోజ్ మచ్లిషహర్ నియోజకవర్గం నుంచే 3 సార్లు లోక్‌సభ ఎంపీగా గెలవడం గమనార్హం.