వివాహం బంధంలోకి అడుగుపెట్టిన నీరజ్ చోప్రా.. వధువు కూడా క్రీడాకారిణే

భారత స్టార్‌ జావెలిన్‌ త్రోయర్‌, ఒలింపిక్ పతక విజేత నీరజ్‌ చోప్రా ఓ ఇంటివాడయ్యాడు. ఈ విషయాన్ని నీరజ్‌ చోప్రానే స్వయంగా సోషల్‌ మీడియా వేదికగా వెల్లడించాడు. జీవితంలో కొత్త అధ్యాయాన్ని ప్రారంభిస్తున్నానని.. సోషల్ మీడియాలో పెళ్లికి సంబంధించిన ఫొటోలను షేర్ చేశాడు. హర్యానాలోని సోనిపట్‌కు చెందిన హిమానీ మోర్‌ను అతడు పెళ్లి చేసుకున్నాడు.

అతికొద్ది మంది కుటుంబ సభ్యుల సమక్షంలో నీరజ్ చోప్రా- హిమానీల పెళ్లి జరిగింది. కాగా వీరి పెళ్లి రెండు రోజుల క్రితం జరిగిందని.. నీరజ్ చోప్రా మామ భీమ్ తెలిపారు. అయితే ఈ వివాహం ఎక్కడ జరిగిందనేది మాత్రం చెప్పలేనని వెల్లడించాడు. ప్రస్తుతం నూతన దంపతులు హనీమూన్‌కు వెళ్లారని.. భీమ్ చోప్రా చెప్పుకొచ్చాడు.

హిమానీ మోర్ ఎవరు?

హర్యానాలోని సోనిపట్‌కు చెందిన 25 ఏళ్ల హిమానీ మోర్.. సోనిపట్‌లోని లిటిల్ ఏంజెల్స్ స్కూల్‌లో పాఠశాల విద్యను అభ్యసించారు. చదువు, క్రీడల్లో రాణించారు. ప్రస్తుతం అమెరికాలోని న్యూహాంప్ షైర్‌లోని ఫ్రాంక్లిన్ పియర్స్ యూనివర్సిటీలో స్పోర్ట్స్ మేనేజ్‌మెంట్‌లో ఆమె డిగ్రీ చదువుతున్నారు. గతంలో ఢిల్లీలోని మిరాండా హౌస్ నుంచి పొలిటికల్ సైన్స్ అండ్ ఫిజికల్ ఎడ్యుకేషన్‌లో బ్యాచిలర్ డిగ్రీ పొందారు. టెన్నిస్ క్రీడాకారిగా ఆమె జాతీయ వేదికపై రాణించింది. ఆలిండియా టెన్నిస్ అసోసియేషన్ ర్యాంకింగ్స్‌లో సింగిల్స్‌లో 42, డబుల్స్‌లో 27వ ర్యాంక్ సాధించింది.

కాగా 27 ఏళ్ల నీరజ్ చోప్రా.. టోక్యో 2020 ఒలింపిక్స్‌లో స్వర్ణ పతకం సాధించి ఒక్కసారిగా వెలుగులోకి వచ్చాడు. పారిస్ 2024లోనూ అతడు అదే ప్రదర్శన పునరావృతం చేస్తాడని అంతా భావించారు. కానీ అతడు రజత పతకానికే పరిమితమయ్యాడు. ఫైనల్‌లో మొత్తంగా ఆరు సార్లు బల్లెం విసిరిన నీరజ్‌ చోప్రా.. రెండో ప్రయత్నంలో అత్యధికంగా 89.45 మీటర్లు నమోదు చేశాడు. మిగతా ఐదు ప్రయత్నాల్లోనూ ఫౌల్‌ చేశాడు. పాకిస్థాన్‌కు చెందిన జావెలిన్ త్రోయర్ అర్షద్ నదీమ్ పారిస్ 2024 ఒలింపిక్స్‌లో ఏకంగా 92.97 మీటర్లు జావెలిన్‌ విసిరి ఒలింపిక్ రికార్డును బద్దలు కొట్టాడు. అతడు స్వర్ణం సాధించాడు.