బ్లాక్ ఇంకుతో రాస్తే చెక్కు చెల్లదా? కేంద్రం క్లారిటీ.. ఏం చెప్పిందంటే?

చెక్ బుక్ ఎక్కువగా ఉపయోగించే బ్యాంక్ ఖాతాదారులకు ఇటీవల ఓ సమస్య ఎదురైంది. బ్లూ ఇంక్ పెన్నుతో కాకుండా బ్లాక్ ఇంక్ పెన్నులతో రాసే చెక్కులు చెల్లుబాటు కావని ఓ ప్రచారం జరుగుతోంది. ఇందుకు సంబంధించి రిజర్వ్ బ్యాంక్ ఆఫ్ ఇండియా (ఆర్‌బీఐ) ఉత్తర్వులు జారీ చేసినట్లు చెబుతున్నారు. దీంతో చాలా మంది అయోమయంలో పడిపోయారు. బ్లాక్ ఇంకుతో రాసేందుకు వెనకడుగు వేస్తున్నారు. బ్లూ ఇంకుతోనే రాయాలని, బ్లాక్ ఇంక్‌తో రాస్తే సదరు చెక్కులు చెల్లుబాటు కావాలన్న ప్రచారంపై కేంద్ర ప్రభుత్వం క్లారిటీ ఇచ్చింది. మరి బ్లాక్ ఇంక్ వినియోగించమని చెప్పిందా, లేదా? తెలుసుకుందాం.

బ్లాక్ ఇంకుతో రాసే చెక్కులు చెల్లుబాటు కావనే ప్రచారాన్ని కేంద్రం ఖండించింది. చెక్కులకు సంబంధించి ఉపయోగించే ఇంక్ సంబంధించి రిజర్వ్ బ్యాంక్ ఆఫ్ ఇండియా ఎలాంటి ఉత్తర్వులు జారీ చేయలేదని స్పష్టం చేసింది. రిజర్వ్ బ్యాంక్ ఆఫ్ ఇండియా పేరుతో జరుగుతున్న ప్రచారం పూర్తిగా తప్పుగా పేర్కొంటూ ప్రెస్ ఇన్ఫర్మేషన్ బ్యూరో ఫ్యాక్ట్ చెక్ విభాగం స్పష్టం చేసింది. సోషల్ మీడియా ఎక్స్ వేదికగా ఈ విషయాన్ని తెలియజేసింది.

'కొత్త సంవత్సరంలో కొత్త రూల్ వచ్చింది. బ్లాక్ ఇంక్‌తో రాసే చెక్కులు చెల్లుబాటు కావు. ఆర్‌బీబీ కొత్త ఉత్తర్వులు జారీ చేసింది' అంటు ఓ పోస్ట్ సోషల్ మీడియాలో వైరల్ అవుతోంది. టైమ్స్ ఆఫ్ ఇండియా ఈ వార్త ప్రచురించినట్లుగా చూపిస్తూ ఈ పోస్టును వైరల్ చేశారు. దీంతో చెక్ బుక్ ఉపయోగించే వారితో పాటుగా చెక్కులు స్వీకరించే సామాన్యుల్లో గందరగోళం నెలకొంది. దీంతో పీఐబీ ఫ్యాక్ట్ చెక్ విభాగం స్పందించింది. చెక్కులపై సిరా ఉపయోగానికి సంబంధించి రిజర్వ్ బ్యాంక్ ఎలాంటి మార్గదర్శకాలను జారీ చేయాలని తెలిపింది. అలాంటి నకిలీ, తప్పుదోవ పట్టించే వార్తలను నమ్మవద్దని ఈ సందర్భంగా బ్యాంక్ కస్టమర్లకు సూచించింది.

టైమ్స్ ఆఫ్ ఇండియాలో జనవరి 14, 2025 రోజున ఈ వార్త ప్రచురితమైనట్లు పేర్కొంటూ సోషల్ మీడియాలో వైరల్ చేస్తున్నట్లు పీఐబీ ఫ్యాక్ట్ చెక్ తేల్చింది. ఆ వార్త దాదాపు ఒక ఫుల్ పేజీ ఉంది. చెక్కులపై బ్లాక్ ఇంక్ ఉపయోగించడం వల్ల ప్రధానమైన సెక్యూరిటీ రిస్క్ ఏర్పడుతోందని, సులభంగా దానిని తుడిపేసి అంకెలు మార్చే అవకాశం ఉందని ఆర్‌బీఐ ప్రతినిధి ఒకరు తెలిపినట్లు ఆ వార్త కథనం పేజీలో పేర్కొన్నారు. అయితే, అది పూర్తిగా నకిలీ, ఫ్యాబ్రికేటెడ్ వార్తా కథనంగా పీఐబీ ఫ్యాక్ట్ చెక్ తేల్చింది. అలాంటి వార్త ఏదీ టైమ్స్ ఆఫ్ ఇండియాలో ప్రచురితం కాలేదని పేర్కొంది.