ఏపీకి మరో ప్రతిష్టాత్మక సంస్థ.. అక్కడే ఏర్పాటు.. దావోస్‌లో చంద్రబాబు ప్రకటన

ఆంధ్రప్రదేశ్ రాజధాని అమరావతిలో మరో ప్రతిష్టాత్మక సంస్థ కొలువు దీరనుంది. ఈ విషయాన్ని ఏపీ ముఖ్యమంత్రి నారా చంద్రబాబు నాయుడు వెల్లడించారు. ప్రపంచ ఆర్థిక సదస్సులో పాల్గొనేందుకు స్విట్జర్లాండ్ వెళ్లారు చంద్రబాబు నాయుడు. దావోస్ పర్యటనలో అమరావతిలో సీఐఐ కేంద్రం ఏర్పాటుపై నారా చంద్రబాబు నాయుడు కీలక ప్రకటన చేశారు. టాటా సంస్థతో కలిసి రాజధాని అమరావతిలో సీఐఐ సెంటర్ ఏర్పాటు చేయనున్నట్లు చంద్రబాబు వెల్లడించారు. రాష్ట్రానికి పెట్టుబడుల ఆకర్షణ, ఉపాధి కల్పన లక్ష్యంగా సీఐఐ కేంద్రం ఏర్పాటు చేయనున్నట్లు సీఎం చంద్రబాబు సోషల్ మీడియా మాధ్యమం ఎక్స్‌‍లో పోస్ట్ చేశారు.

టాటా కంపెనీల భాగస్వామ్యంతో అమరావతిలో సీఐఐ సెంటర్ ఫర్ గ్లోబల్ లీడర్‌షిప్ ఆన్ కాంపిటీటీవ్‌నెస్ ఏర్పాటు చేయనున్నట్లు చంద్రబాబు ట్వీట్‌లో వెల్లడించారు. ఈ గ్లోబల్ లీడర్‌షిప్ ఆన్ కాంపిటీటివ్ నెస్ ద్వారా అంతర్జాతీయ, భారతీయ సంస్థల సహకారంతో ట్రాన్స్‌ఫర్మేటివ్ ఎడ్యుకేషన్, అధునాతన నైపుణ్యాలు, కెపాసిటీ బిల్డింగ్ అందిస్తామన్నారు. ట్రైనింగ్, అడ్వైజరీ సర్వీసుల ద్వారా ఇండస్ట్రియల్ కాంపిటీటివ్‌నెస్ మీద దృష్టి సారిస్తామని పేర్కొన్నారు. సీఐఐ సెంటర్ ద్వారా పెట్టుబడులను ఆకర్షించటంతో పాటుగా ఉద్యోగాల కల్పన సాధ్యమవుతుందని.. ఇది ఆంధ్రప్రదేశ్ రాష్ట్ర ఆర్థికాభివృద్ధికి తోడ్పడుతుందన్నారు. అలాగే వికసిత్ భారత్ 2047 లక్ష్యానికి తోడ్పాటును అందిస్తుందటూ చంద్రబాబు ట్వీట్ చేశారు.

మరోవైపు సీఐఐ నిర్వహించిన సమావేశంలో ఆంధ్రప్రదేశ్ ప్రభుత్వం ప్రణాళికలను చంద్రబాబు నాయుడు వివరించారు. పునరుత్పాదక ఇంధన రంగంలో గ్లోబల్ హబ్‌గా ఏపీని తీర్చిదిద్దేందుకు తీసుకోబోతున్న ప్రణాళికలను వివరించారు. ఆంధ్రప్రదేశ్ ఇంటిగ్రేటెడ్ క్లీన్ ఎనర్జీ పాలసీ 2024-29 అనేది పునరుత్పాదక శక్తి, గ్రీన్ హైడ్రోజన్ అంశాలను ఏకీకృతం చేయడంతో పాటుగా పునరుత్పాదక ఇంధన రంగానికి అవసరమైన నైపుణ్యాలను అందించే ఒక సమగ్ర ఫ్రేమ్‌వర్క్‌గా చంద్రబాబు అభివర్ణించారు. 2030 నాటికి దేశం నిర్దేశించుకున్న లక్ష్యంలో 30 శాతం అంటే.. 1.5 మిలియన్ టన్నుల గ్రీన్ హైడ్రోజన్ ఉత్పత్తి చేయాలనే లక్ష్యంతో ఏపీ ప్రభుత్వం ఉన్నట్లు వివరించారు. అలాగే గ్రీన్ ఎనర్జీ రంగంలో పెట్టుబడులు పెట్టే ప్రపంచస్థాయి కంపెనీలకు ఏపీని గమ్యస్థానంగా మార్చనున్నట్లు చంద్రబాబు వివరించారు.