వరుసగా 8వ సెషన్ అప్పర్‌సర్క్యూట్ కొట్టిన స్టాక్.. లక్షకు ఐదేళ్లలోనే రూ. 1.80 కోట్లు వచ్చాయ్

అమెరికా అధ్యక్షుడిగా డొనాల్డ్ ట్రంప్ బాధ్యతలు చేపట్టిన తర్వాత.. ఇన్వెస్టర్లలో ఒక్కసారిగా గుబులు పుట్టుకుంది. సుంకాలు పెంచుతారన్న ఆందోళనలతో ఇన్వెస్టర్లు ఒక్కసారిగా తీవ్ర ఒత్తిడికి లోనై విపరీతంగా షేర్లను అమ్మేశారు. స్టాక్ మార్కెట్లలో ఇలా సున్నిత అంశాలపై ప్రకటనలు వస్తే.. పెద్ద ఎత్తున ఊగిసలాడుతుంటాయి. ఇప్పుడు అదే జరిగిందే. ఈ క్రమంలోనే దేశీయంగా దిగ్గజ హెవీవెయిట్ స్టాక్స్ భారీగా పడిపోవడం వంటి కారణాలతో భారత మార్కెట్లు పతనమయ్యాయి. మంగళవారం సెషన్లో బొంబాయి స్టాక్ ఎక్స్చేంజి సూచీ సెన్సెక్స్ ఏకంగా 1235 పాయింట్ల పతనంతో 75,838 వద్ద స్థిరపడింది. ఇదే సమయంలో నేషనల్ స్టాక్ ఎక్స్చేంజి సూచీ నిఫ్టీ చూస్తే 320 పాయింట్లు పడిపోయి 23,024 వద్ద సెషన్ ముగించింది. జొమాటో, స్విగ్గీ, పేటీఎం వంటి స్టాక్స్ కూడా ఇంట్రాడేలో 10 శాతానికిపైగా పడిపోవడం నష్టాలకు ఒక కారణం.

అయితే మార్కెట్లు ఇంతలా పడిపోయినప్పటికీ కొన్ని షేర్లు ఈ సమయంలోనూ మంచి లాభాలు నమోదు చేశాయి. మనం ఇక్కడ మాట్లాడుకోవాల్సింది ఎరాయా లైఫ్‌స్పేసెస్ లిమిటెడ్ గురించి. ఈ స్టాక్ మంగళవారం రోజు 5 శాతం అప్పర్ సర్క్యూట్‌తో రూ. 137.60 వద్ద సెషన్ ముగించింది. కిందటి సెషన్లో రూ .131.05 వద్ద ముగిసింది. ఇక్కడ విశేషం ఏంటంటే.. ఈ స్టాక్ ఇప్పుడు వరుసగా 8వ రోజు అప్పర్ సర్క్యూట్ కొట్టింది.

చివరిసారిగా జనవరి 9న రూ. 94.15 వద్ద ముగిసిన స్టాక్.. జనవరి 10, 13, 14, 15, 16, 17, 20, 21 ఇలా వరుసగా 8 సెషన్లలో 5 శాతం చొప్పున అప్పర్ సర్క్యూట్ కొట్టింది. ఈ క్రమంలోనే గత 8 సెషన్లలో ఏకంగా 46.15 శాతం రాబడి అందించింది. దీంతో సగం వరకు లాభాలు వచ్చాయి. ఈ స్టాక్ కొనుగోలు చేసిన వారికి ఈ స్వల్పకాలంలోనే బంపర్ రిటర్న్స్ వచ్చాయని చెప్పొచ్చు.

ఈ స్టాక్ కొంతకాలంగా షార్ట్ టర్మ్, లాంగ్ టర్మ్ ఇలా తేడా లేకుండా కాసుల పంట పండిస్తూనే ఉంది. 5 రోజుల్లో 21 శాతానికిపైగా పెరగ్గా.. నెల రోజుల్లో మాత్రం స్వల్పంగా 7 శాతం తగ్గింది. 6 నెలల్లో 72 శాతానికిపైగా పుంజుకుంది. ఏడాది వ్యవధిలో 764 శాతం పెరిగింది. అంటే సరిగ్గా ఏడాది కిందట ఈ స్టాక్ ధర రూ. 15.92 వద్ద ఉండగా.. అప్పుడు లక్ష పెట్టుబడి పెట్టినట్లయితే ఇప్పుడు వారి చేతికి రూ. 8.64 లక్షలు వచ్చేవి. ఇదే సమయంలో ఐదేళ్లలో 18 వేల శాతానికిపైగా రిటర్న్స్ అందించగా.. లక్ష పెట్టుబడిని రూ. 1.80 కోట్లకుపైగా వచ్చిందంటేనే పెర్ఫామెన్స్ గురించి అర్థం చేసుకోవాలి.

అయితే.. స్టాక్ పెర్ఫామెన్స్ బట్టి తొందరలో ఇన్వెస్ట్ చేయొద్దు. కంపెనీ పనితీరు ఎలా ఉంది. భవిష్యత్తు ప్రణాళికలు ఏంటి.. డీల్స్ ఏమేం ఉన్నాయి.. ఇంకా పెరుగుతుందా ఇలా అన్నీ అంచనా వేసుకొని.. పరిశీలిస్తూ.. ఆర్థిక నిపుణుల సలహా తీసుకొని పెట్టుబడులు పెట్టడం వల్ల మంచి రిటర్న్స్ అందుకోవచ్చు.