బైడెన్ దారిలోనే ట్రంప్.. బాధ్యతలు స్వీకరించిన తొలిరోజే 1600 మందికి క్షమాభిక్ష

అమెరికా నూతన అధ్యక్షుడిగా జనవరి 20వ తేదీన డొనాల్డ్ ట్రంప్ బాధ్యతలు స్వీకరించిన విషయం అందరికీ తెలిసిందే. అయితే ట్రంప్ కూడా మాజీ అధ్యక్షుడు జోబైడెన్ దారిలోనే నడుస్తూ.. పదవీ బాధ్యతలు స్వీరించిన మొదటి రోజునే 1600 మందికి క్షమాభిక్ష కల్పించాడు. అయితే వారంతా ట్రంప్ మద్దతు దారులే కావడం గమనార్హం. 2021 జనవరి 6వ తేదీన అనేక మంది యూఎస్ క్యాపిటల్ హిల్‌పై దాడి చేయగా.. వారందరినీ అమెరికా కోర్టు జైల్లో పెట్టింది. వారికి శిక్షలు కూడా విధించగా.. తాజాగా ట్రంప్ వారందరికీ ఉపశమనం కల్పిస్తూ.. క్షమాభిక్ష ప్రసాదించారు. ఆ పూర్తి వివరాలు మీకోసం.

2020లో అమెరికాలో జరిగిన అధ్యక్ష ఎన్నికల్లో డొనాల్డ్ ట్రంప్ ఓడిపోయారు. అయితే ఆ విషయాన్ని అతడి అభిమానులు ఏమాత్రం జీర్ణించుకోలేకపోయారు. ఈక్రమంలోనే 2021 జనవరి 6వ తేదీన అమెరికా 46వ అధ్యక్షుడిగా జోబైడెన్ విజయాన్ని ధ్రువీకరించేందుకు వాషింగ్టన్ క్యాపిటల్ భవనంలో కాంగ్రెస్ సమావేశం అయింది. ఈ సమావేశానికి కొన్ని గంటల ముందే ట్రంప్ మద్దతదాలు అందరూ.. ట్రంప్‌ను కలిశారు. అనేక విషయాలపై చర్చించారు. ఆ తర్వాత బైడెన్ విజయాన్ని ధ్రువీకరించబోతున్న చోటుకు వచ్చి గొడవ చేశారు.

ముఖ్యంగా వేలాది మంది ఒక్కసారిగా క్యాపిటల్ భవనంలోకి చొచ్చుకు వెళ్లి రచ్చ రచ్చ చేశారు. అక్కడున్న వాటిని ధ్వంసం చేశారు. ఊహించని రీతిలో జరిగిన ఆ దాడిని అడ్డుకునేందుకు అమెరికా పోలీసులు ఎంతగానో ప్రయత్నాలు చేశారు. కానీ మద్దతు దారులు ఎక్కువగా ఉండేసరికి వారిని ఆపలేకపోయారు. ఈకమ్రంలోనే అనేక మంది పోలీసులు తీవ్రంగా గాయపడ్డారు. కానీ ఆ తర్వాత హింసకు పాల్పడ్డ 1600 మందిని పోలీసులు అరెస్ట్ చేశారు. ముఖ్యంగా వాషింగ్టన్ ఫెడరల్ కోర్టులో హాజరుపరిచారు. ఈ ఛార్జీషీట్‌లో ట్రంప్ పేరును కూడా చేర్చారు.

అయితే ట్రంప్ తప్ప మిగతా 1600 మంది నిరసనకారులకు న్యాయస్థానం జైలు శిక్ష విధించగా.. వారంతా అప్పటి నుంచి జైల్లోనే ఉంటున్నారు. అయితే తన మద్దతుదారులను ఎలాగైనా బయటకు తీసుకు రావాలని ట్రంప్ ఎప్పటి నుంచో భావిస్తున్నారు. ఈక్రమంలోనే ఎన్నికలకు ముందే.. తాను అమెరికా అధ్యక్షుడిగా గెలిస్తే కచ్చితంగా మద్దతుదారులకు క్షమాభిక్ష కల్పిస్తానని ప్రకటించారు. అయితే ఇటీవలే విజయం సాధించిన ఆయన.. అగ్రరాజ్యం అమెరికా 47వ దేశ అధ్యక్షుడిగా జనవరి 20వ తేదీన పదవీ బాధ్యతలు చేపట్టారు.

ఇచ్చిన మాట ప్రకారమే ట్రంప్ బాధ్యతలు చేపట్టిన తొలిరోజే యూఎస్ క్యాపిటల్ హిల్ దాడిలో శిక్షలు అనుభవిస్తున్న 1600 మందికి ట్రంప్ క్షమాభిక్ష కల్పించారు. ముఖ్యంగా వారందరిపై ఉన్న కేసులు అన్నీ కొట్టేయాలని అటార్నీ జర్నల్ కు ఆదేశాలు జారీ చేశారు. అయితే ట్రంప్ తన మద్దతుదారులకు మాత్రమే క్షమాభిక్ష ప్రసాదించగా.. జోబైడెన్ మాత్రం అనేక మంది నేరస్తులకు శిక్షలు తగ్గించారు. మరణశిక్షలను కూడా జీవిత ఖైదులుగా మార్చారు.