అదానీ అదిరిపోయే డీల్.. ఏకంగా రూ. 25 వేల కోట్ల విలువైన ప్రాజెక్ట్ సొంతం

మార్కెట్ విలువ పరంగా దేశంలో అతిపెద్ద సంస్థల్లో ఒకటైన అదానీ గ్రూప్ నుంచి కీలక పరిణామం చోటు చేసుకుంది. అదానీ గ్రూప్ నుంచి కీలక కంపెనీల్లోని అదానీ ఎనర్జీ సొల్యూషన్స్ లిమిటెడ్ అదిరిపోయే ప్రకటన చేసింది. ఈ అతిపెద్ద ప్రైవేట్ ట్రాన్స్‌మిషన్ కంపెనీ రూ. 25 వేల కోట్ల విలువ కలిగిన ప్రాజెక్టును చేజిక్కించుకున్నట్లు మంగళవారం రోజు ప్రకటించింది. ఇది భద్లా (రాజస్థాన్)- ఫతేపూర్ (ఉత్తర్‌ప్రదేశ్) HVDC ప్రాజెక్టు. అదానీ గ్రూప్ ఇప్పటివరకు సాధించిన అతిపెద్ద విద్యుత్ ట్రాన్స్‌మిషన్ ఆర్డర్ ఇదే. ఈ ఆర్డర్‌తో.. కంపెనీ ఆర్డర్ బుక్ విలువ ఇప్పుడు రూ 54,761 కోట్లకు చేరుకున్నట్లు ఈ కంపెనీ.. స్టాక్ ఎక్స్చేంజీ ఫైలింగ్‌లో తెలిపింది.

అదానీ ఎనర్జీ కంపెనీ.. ఈ ట్రాన్స్‌మిషన్ ప్రాజెక్టు ద్వారా రాజస్థాన్ నుంచి 6 గిగావాట్స్ పునరుత్పాదక విద్యుత్తును ఉత్తరాదిలోని డిమాండ్ ఉన్న ప్రాంతాలకు తరలిస్తుంది. టారిఫ్ బేస్డ్ కాంపిటేటివ్ బిడ్డింగ్ పద్ధతి ద్వారా ఈ ప్రాజెక్టును సాధించింది. ఈ ప్రాజెక్టును అధునాతన సాంకేతికత ద్వారా 4.5 ఏళ్లలోనే పూర్తి చేయాలని లక్ష్యంగా పెట్టుకుంది.

ఈ డీల్ సాధించిన నేపథ్యంలో.. మంగళవారం రోజు స్టాక్ మార్కెట్లు కుప్పకూలినప్పటికీ ఈ షేరు పెద్దగా నష్టపోలేదు. అదానీ ఎనర్జీ స్టాక్ కేవలం 0.21 శాతం నష్టంతో రూ. 814 వద్ద స్థిరపడింది. అదానీ గ్రూప్ నుంచి మిగతా స్టాక్స్ విషయానికి వస్తే.. అదానీ పోర్ట్స్ 3 శాతానికిపైగా తగ్గగా.. అదానీ పవర్, అదానీ గ్రీన్ ఎనర్జీ, అదానీ ఎంటర్‌ప్రైజెస్ వంటివి 2 శాతానికిపైగా పడిపోయాయి.

కుంభమేళాలో అదానీ..

ప్రపంచంలోనే అతిపెద్ద ఆధ్యాత్మిక కార్యక్రమం అయిన మహా కుంభమేళాలో దిగ్గజ పారిశ్రామిక వేత్త, అదానీ గ్రూప్ అధినేత గౌతమ్ అదానీ పాల్గొన్నారు. అదానీ తన సతీమణి ప్రీతి అదానీ, కుమారుడు కరణ్ అదానీతో కలిసి గంగా, యమునా, సరస్వతీ నదుల సంగమంలో ప్రత్యేక పూజలు నిర్వహించారు. కుటుంబంతో కలిసి స్థానికంగా ఉన్న ఇస్కాన్ ఏర్పాటు చేసిన శిబిరాన్ని కూడా సందర్శించారు. అక్కడ భోజన తయారీలో పాలుపంచుకున్న అదానీ .. అక్కడి భక్తులకు స్వయంగా వడ్డించడం విశేషం. తర్వాత మీడియాతో కూడా అదానీ మాట్లాడారు. గంగమ్మ ఆశీస్సుల కంటే గొప్పదేదీ లేదన్నారు. ఆధ్యాత్మిక సేవా సంస్థ ఇస్కాన్.. అదానీ గ్రూప్‌తో కలిసి నిత్యం లక్షలాది భక్తులకు కుంభమేళాలో భోజనాలు సమకూరుస్తోంది. బ్లూమ్‌బెర్గ్ బిలియనీర్స్ ఇండెక్స్ ప్రకారం ప్రస్తుతం అదానీ 76 బిలియన్ డాలర్ల సంపదతో 19వ స్థానంలో ఉన్నారు.