ఏపీఎస్ఆర్టీసీకి పండగ తెచ్చిన సంక్రాంతి.. భారీగా ఆదాయం.. ఎంతంటే

సంక్రాంతి పండుగ ఏపీఎస్ఆర్టీసీకి భారీగా ఆదాయం తెచ్చిపెట్టింది. సంక్రాంతి పండుగ రద్దీని దృష్టిలో పెట్టుకుని సొంతూళ్లకు వచ్చేవారి కోసం ఏపీఎస్ ఆర్టీసీ అదనపు బస్సులు ఏర్పాటు చేసిన సంగతి తెలిసిందే. సాధారణంగా నడిచే బస్సు సర్వీసులకు అదనంగా ప్రత్యేక బస్సులు కూడా ఏర్పాటు చేసింది. తెలంగాణ, కర్ణాటక, మహారాష్ట్ర నుంచి ఆంధ్రప్రదేశ్‌కు వచ్చే వారి కోసం ఏపీఎస్ఆర్టీసీ అదనపు బస్సులు నడిపింది. దీంతో సంక్రాంతి పండుగ సీజన్‌లో ఏపీఎస్ఆర్టీసీకి భారీ ఆదాయం సమకూరింది. పండుగ సమయంలో వచ్చేందుకు.. అలాగే పండుగ పూర్తైన తర్వాత తిరిగి వెళ్లేందుకు కూడా ఏపీఎస్ఆర్టీసీ అదనపు బస్సులు నడిపింది. దీంతో ఏపీఎస్ ఆర్టీసీకి భారీగా ఆదాయం సమకూరింది.

సంక్రాంతి పండుగ సీజన్ సందర్భంగా మొత్తం 23.71 కోట్ల రూపాయలు ఏపీఎస్ఆర్టీసీ ఆర్జించింది. సంక్రాంతి పండుగ రద్దీని దృష్టిలో పెట్టుకుని ఏపీఎస్ఆర్టీసీ తొలుత 7,200 అదనపు బస్సులను నడపనున్నట్లు ప్రకటించింది. అయితే ప్రయాణికుల రద్దీ అధికంగా ఉండటంతో 9,097 బస్సులను నడిపింది. దీంతో రూ.23 కోట్ల 71 లక్షల వరకూ ఆదాయం వచ్చింది. తెలుగు ప్రజలకు సంక్రాంతి ముఖ్యమైన పండుగ కావటంతో ఇతర ప్రాంతాల్లో స్థిరపడిన వారు కూడా పెద్ద పండగకి సొంతూరు రావాలని భావిస్తారు. ఈ నేపథ్యంలో అలాంటి వారి కోసం జనవరి 8 నుంచి జనవరి 13 వరకూ ప్రత్యేక బస్సులను ఏపీఎస్ఆర్టీసీ నడిపింది. హైదరాబాద్ నుంచి 2,153 బస్సులు, బెంగళూరు నుంచి 375 బస్సులు, విజయవాడ నుంచి 300 ప్రత్యేక బస్సులు నడపనున్నట్లు తొలుత ప్రకటించినా.. డిమాండ్ అధికంగా ఉండటంతో మరిన్ని బస్సులు నడిపారు.

అలాగే పండుగ కోసం సొంతూర్లకు వచ్చినవారి తిరుగు ప్రయాణానికి కూడా ఏపీఎస్ఆర్టీసీ అదనపు బస్సులు నడిపింది. జనవరి16 నుంచి 20 వరకు 3,200 వరకూ ప్రత్యేక బస్సులు నడిపింది. ఇక ఈ ప్రత్యేక బస్సుల్లో అదనపు ఛార్జీలు కూడా విధించకపోవటం.. రానూ,పోనూ టికెట్ ముందుగానే బుకింగ్ చేసుకుంటే పది శాతం రాయితీ వంటి అవకాశాలు కల్పించారు. దీంతో సంక్రాంతి పండుగకు సొంతూర్లకు వచ్చినవారు ఎక్కువ మంది ఏపీఎస్ఆర్టీసీ బస్సులవైపే మొగ్గు చూపినట్లు సమాచారం. దీంతో సంక్రాంతి పండుగ సీజన్‌లో ఏపీఎస్ఆర్టీసీకి రూ.23.71 కోట్ల ఆదాయం సమకూరినట్లు అధికారులు తెలిపారు.