ఈ 2 బైక్స్‌పై భారీ డిస్కౌంట్.. ఏకంగా రూ.1.10 లక్షలు తగ్గింపు

ప్రముఖ టూ-వీలర్ తయారీ సంస్థ యమహా మోటార్ ఇండియా తమ కస్టమర్లకు బంపర్ ఆఫర్ ప్రకటించింది. తమ కంపెనీకి చెందిన స్పోర్ట్స్ మోడల్ బైక్స్ బైక్ ఆర్3 , స్ట్రీట్ ఫైటర్ ఎంటీ 03 మోడళ్లపై భారీ డిస్కౌంట్ ప్రకటించింది. ఈ రెండు ఫ్లాగ్‌షిప్ మోడళ్ల ధరలను ఏకంగా రూ.1.10 లక్షల మేర తగ్గిస్తున్నట్లు తెలిపింది. తగ్గిన ధరలు ఫిబ్రవరి 1, 2025 నుంచే అందుబాటులోకి వస్తాయని తెలిపింది.

ప్రీమియం బైగ్ సెగ్మెంట్‌లో తమ పరిధిని విస్తృతం చేసుకునేందుకు ఈ మేరకు యమహా మోటార్ ఇండియా ఈ రెండు బైక్ మోడళ్లను లాంచ్ చేయడమే కాకుండా ధరలను సైతం తగ్గించినట్లు తెలుస్తోంది. అయితే, వినియోగదారుల నుంచి ఆశించిన స్థాయిలో ఈ మోడళ్లకు ఆదరణ లభించడం లేదు. దీంతోనే కస్టమర్లను ఆకర్షించేందుకు ధరల తగ్గింపు నిర్ణయం తీసుకున్నట్లు తెలుస్తోంది. సవరించిన ధరల అనంతరం యమహా ఆర్3 ధర రూ.3.60 లక్షలు (ఎక్స్ షోరూమ్ ధర)గా ఉండగా.. యమహా ఎంటీ 3 మోడల్ బైక్ ధర రూ.3.50 లక్షలు (ఎక్స్ షోరూమ్ ధర)గా ఉంది.

ఆ బైక్స్ నుంచి గట్టి పోటీ

ఈ రెండు మోడళ్లు 321 సీసీ ట్విన్ సిలిండర్ లిక్విడ్ కూల్డ్ ఇంజిన్‌‌తో లభిస్తున్నాయి. 41 హెచ్‌పీ పవర్ కలిగి ఉంటాయి. 29.5 ఎన్ఎం టార్క్ ఉత్పత్తి చేస్తాయని కంపెనీ తెలిపింది. సిక్స్ స్పీడ్ గేర్ బాక్స్ కలిగి ఉండి, డ్యూయల్ ఛానెల్ ఏబీఎస్ వంటి అధునాతన సదుపాయాలు ఈ బైక్స్‌లో ఉన్నాయి. యమహా ఆర్3కి ఏప్రిల్లా ఆర్ఎస్ 457 (ధర రూ.4.20 లక్షలు), కేటీఎం ఆర్‌సీ 390 (ధర రూ.3.21 లక్షలు), బీఎండబ్ల్యూ జీ3100 ఆర్ఆర్ (3.05 లక్షలు) నుంచి గట్టి పోటీ ఎదురవుతోంది. యమహా ఎంటీ 3 మోడల్ బీఎండబ్ల్యూ జీ310 ఆర్ ధర రూ.2.90 లక్షల నుంచి మొదలవుతోంది. కేటీఎం 390 డ్యూక్ ధర రూ. 3.13 లక్షలుగా ఉంది. ఈ బైక్స్ నుంచి పోటీ ఉంటోంది. ధరల సవరణ నేపథ్యంలో ఈ మోడళ్లు వినియోగదారులను ఆకట్టుకునే అవకాశం ఉందని కంపెనీ భావిస్తోంది.