పేద, మధ్యతరగతికి వరాలు.. టాక్స్ ‌బెనిఫిట్స్, కొత్త పథకాలు

కేంద్ర బడ్జెట్‌కు వేళైంది. ఫిబ్రవరి 1న కేంద్ర ఆర్థిక మంత్రి నిర్మలా సీతారామన్ పార్లమెంటులో బడ్జెట్- 2025 ను ప్రవేశపెడతారు. అయితే అంతకుముందు జనవరి 31న కేంద్ర ఆర్థిక సర్వేను నిర్మలమ్మ లోక్‌సభలో ప్రవేశపెట్టిన సంగతి తెలిసిందే. బడ్జెట్ కోసం పార్లమెంటు సమావేశాలు ఇవాళే ప్రారంభం కాగా.. ప్రారంభం వేళ ప్రధాని నరేంద్ర మోదీ చేసిన వ్యాఖ్యలు కొత్త చర్చకు దారి తీశాయి. శనివారం రోజు ప్రవేశపెట్టనున్న బడ్జెట్‌లో పేదలు, మధ్యతరగతి వర్గం సహా మహిళలకు కూడా పెద్ద పీట వేస్తారన్న అంచనాలు పెంచేందుకు కారణమయ్యాయి. పేదలు, మధ్యతరగతిపై మహాలక్ష్మి కటాక్షం చూపించాలని మోదీ వ్యాఖ్యలు చేయడమే ఇందుకు కారణం.

దీనికి తోడు సమ్మిళిత అభివృద్ధి పెట్టుబడులు, ఆవిష్కరణలు లక్ష్యంగా దూసుకెళ్తున్నామని ఆయన పేర్కొనడంతో ఈసారి ప్రజాకర్షక పథకాలకు పెద్దపీట వేస్తారన్న అంచనాలు పెరిగిపోయాయి. అందుకే వృద్ధికి ఊతం ఇచ్చేందుకు.. మధ్యతరగతికి పన్ను ప్రయోజనాలు, మహిళలకు సంబంధించి ఏమైనా కొత్త పథకాలు తీసుకురావొచ్చన్న ఆశలు రేపుతున్నాయి.

>> బడ్జెట్‌లో మిగతా విషయాలన్నింటి గురించి పక్కన బెడితే.. ప్రతిసారీ ఆదాయపు పన్ను ఊరట కలిగిస్తారంటూ వేతన జీవులు ఆశగా ఎదురుచూస్తుంటారన్న సంగతి తెలిసిందే. గత రెండు బడ్జెట్ సమయాల్లోనూ పన్నుకు సంబంధించి కీలక ప్రకటనలు వచ్చాయి. ఇక ఈసారి కూడా వృద్ధి నెమ్మదించిన తరుణంలో.. మార్పులు ఉండొచ్చని భావిస్తున్నారు. కొత్త పన్ను విధానంలో ఎక్కువగా మినహాయింపులు లేనందున.. స్టాండర్డ్ డిడక్షన్ పెంపు సహా పన్ను శ్లాబుల సవరణ, రిబేట్ పెంపు వంటి అంశాలపై ఉద్యోగులు ఆశలు పెట్టుకున్నారు. నిజంగా ప్రధాని మోదీ వ్యాఖ్యలు.. బడ్జెట్‌ గురించే అయితే మధ్యతరగతికి పెద్ద శుభవార్తే అవుతుందని అంటున్నారు.

మహిళలకు సాధికారిత కల్పించడమే లక్ష్యంగా ప్రతిసారీ ఏదో ఒక ప్రకటన చేస్తున్న కేంద్రం.. ఈసారి బడ్జెట్‌లోనూ కొత్త పథకాలు తెచ్చే అవకాశం ఉన్నట్లు భావిస్తున్నారు విశ్లేషకులు. జన్‌ధన్ యోజన, ముద్రా యోజన పథకాల కేటాయింపులు పెంచొచ్చని తెలుస్తోంది. మహిళా సమ్మాన్ స్కీమ్ గడువు మార్చి 31తో ముగియనున్న నేపథ్యంలో.. డెడ్‌లైన్ పొడిగించడం లేదా కొత్త స్కీమ్ తీసుకురావడం చేయొచ్చని అనుకుంటున్నారు. పేదలకు సంబంధించి ఇప్పటికీ ఉచిత ఆహార ధాన్యాలు, జాతీయ ఉపాధి పథకం వంటివి అమలవుతున్నా.. వీటి కేటాయింపులు పెంచడం వంటివి చేయొచ్చని అనుకుంటున్నారు. మరి ఏం జరుగుతుందో చూడాలి.