ఆకాశాన్నంటుతున్న బెంగళూరు అద్దెలు.. సింగిల్ బెడ్‌రూం కోసం నెలకు రూ. 30 వేలా

ఐటీ హబ్‌గా బెంగళూరు నగరం ఎంత ప్రఖ్యాతి గాంచిందో ప్రత్యేకంగా చెప్పాల్సిన పని లేదు. రియల్ ఎస్టేట్ పరంగా కూడా బెంగళూరుకు ప్రత్యేక స్థానం ఉంది. అయితే కొన్నాళ్లుగా ఇక్కడ రియల్ ఎస్టేట్ డిమాండ్ తగ్గుతూ వస్తోంది. అయినప్పటికీ దక్షిణాదిలో హైదరాబాద్, చెన్నైతో గట్టి పోటీనిస్తోంది. బెంగళూరులో ఐటీకి ఎక్కువ అవకాశాలు ఉన్న నేపథ్యంలో అక్కడికి చదువు కోసం అదే విధంగా ఉద్యోగాల నిమిత్తం పలు ప్రాంతాల నుంచి వెళ్తుంటారు. ఇదే సమయంలో అక్కడ రియల్ ఎస్టేట్ డిమాండ్ పెరుగుతూ వెళ్తోంది. ఒక ప్రముఖ ఆంగ్ల మీడియా రిపోర్ట్ ప్రకారం.. ఇటీవల అక్కడ ఇంటి అద్దెలు ఆకాశాన్ని అంటుతున్నట్లు తెలుస్తోంది. అయితే ఇప్పుడు బెంగళూరు నగరంలో 1Bhk అద్దెలు ఏ స్థాయిలో ఉన్నాయో మనం తెలుసుకునే ప్రయత్నం చేద్దాం.

బెంగళూరుకు విద్యార్థులు, ఉద్యోగుల తాకిడి ఎక్కువవుతున్న క్రమంలో సమీప ప్రాంతాల్లోని ఇంటి యజమానులు రెంట్లను బీభత్సంగా పెంచుతున్నారట. దాదాపు ఏడాది- రెండేళ్ల కిందటే అక్కడ రెంట్ల గురించి దేశవ్యాప్తంగా పెద్ద ఎత్తున చర్చ నడిచింది. ముఖ్యంగా ఇంటర్వ్యూలు చేయడం.. ఇంటి ఓనర్లు అద్దె కోసం వచ్చే వారిని పే స్లిప్స్ అడగడం.. ఎక్కువ కాలానికి అడ్వాన్స్ కట్టించుకోవడం.. ఉన్నఫలంగా పంపించేయడం ఇలా పలు ఘటనలు చర్చనీయాంశమయ్యాయి. బెంగళూరులో అద్దె దొరకడమే గగనమైంది.

హిందుస్థాన్ టైమ్ రిపోర్ట్ ప్రకారం.. బెంగళూరు నగరంలో లోకల్ బ్రోకర్స్ ఇటీవల ఏకంగా 20 శాతం మేర అద్దెల్ని పెంచినట్లు తెలుస్తోంది. ప్రైమ్ లొకేషన్స్ అయిన కోరమంగళ, ఇందిరానగర్ వంటి చోట్ల ఎక్కడైనా నెలకు సింగిల్ బెడ్‌రూమ్‌ ఇళ్లకే కనీసం రూ. 25 వేల నుంచి రూ. 30 వేల వరకు వసూలు చేస్తున్నారట. అద్దె సంగతి పక్కనబెడితే.. సెక్యూరిటీ డిపాజిట్ కింద కనీసం 6 నుంచి 9 నెలల వరకు అడ్వాన్స్ అడుగుతున్నారట.

ఇంకా ఇటీవలి కాలంలో 1Bhk పరిమాణం మాత్రం దాదాపు 30 శాతం కుచించుకుపోయినప్పటికీ.. మరోవైపు రెంట్లు మాత్రం అదే రీతిన పెరుగుతూ పోతున్నట్లు రియాల్టీ కార్పొరేషన్ డైరెక్టర్ సునీల్ సింగ్‌‌ను ఉటంకిస్తూ పేర్కొంది. హెబ్బల్, యెలహంక, హెన్నూర్ రోడ్, జక్కుర్ వంటి చోట్ల కూడా రూ. 25 వేలకు దగ్గర్లోనే ఉన్నాయని రిపోర్ట్ తెలిపింది. 400-450 చదరపు అడుగుల ఫ్లాట్ కూడా సెంట్రల్ బెంగళూరులో రూ. 30 వేల వరకు పలుకుతున్నట్లు వెల్లడించింది.

విద్యార్థులు, ఉద్యోగులు.. ఇంత బడ్జెట్ పెట్టేందుకు వణికిపోతున్నారని ఆంగ్ల మీడియా తెలిపింది. ఇక 2bhk కోసం అయితే రూ. 40 వేలకుపైగా చెల్లించాల్సి వస్తుందని పలువురు అద్దెదారులు వాపోతున్నారట. ఇదిలా ఉంటే.. వన్ రూమ్ ప్లస్ కిచెన్ ఫ్లాట్స్.. ప్రైమ్ ఏరియాల్లో 300-400 చదరపు అడుగుల విస్తీర్ణంలో ఉన్నవాటి కోసం నెలకు రూ. 15 నుంచి 20 వేల వరకు చెల్లించాల్సి వస్తోంది.