కొవ్వును కరిగించి బరువు తగ్గించే బొప్పాయి గింజలు

బొప్పాయి పండు ప్రతి సీజన్‌లో దొరుకుతూ ఉంటుంది. దీన్ని చాలా మంది ఇష్టంగా తింటారు. బొప్పాయి సలాడ్, బొప్పాయి జ్యూస్ ఇలా ఈ పండుని తీసుకుంటారు. దీని రుచి చాలా తియ్యగా ఉంటుంది. బొప్పాయి పండులో ఉన్న పోషకాలు మరే ఫ్రూట్‌లో కూడా లేవంటారు ఆరోగ్య నిపుణులు. కుదిరినప్పుడల్లా బొప్పాయి పండుని తీసుకోవడం వల్ల శరీరానికి ఎన్నో ఆరోగ్య ప్రయోజనాలు చేకూరుతాయి. బొప్పాయి పండును గుజ్జుగా చేసి చిన్న పిల్లలకు తినిపిస్తే చాలా మంచిదంటున్నారు నిపుణులు. యుక్తవయసు ఉన్నవారు దోరగా ఉన్న పండుని తింటే మంచిది. ఇక, బొప్పాయి పండులోనే కాదు వాటి గింజల్లోనూ కూడా అనేక పోషకాలు ఉన్నాయి. బొప్పాయి గింజల్ని తీసుకుంటే అనేక ప్రయోజనాలు అందుతాయి. ఆ ప్రయోజనాలేంటి, వాటిని ఎలా తీసుకోవాలో ఇక్కడ తెలుసుకుందాం.

​బొప్పాయి ఆరోగ్యానికి ఎంతో మేలు చేస్తుంది. ప్రధానంగా బొప్పాయి పండు జీర్ణవ్యవస్థకు చాలా మంచిదని భావిస్తారు. ఫోలిక్ యాసిడ్, పొటాషియం, మెగ్నీషియం, విటమిన్ ఎ, విటమిన్ సి, విటమిన్ వంటి ఎన్నో ముఖ్యమైన పోషకాలు ఈ పండులో ఉన్నాయి. బొప్పాయిలో విటమిన్ సి ఎక్కువగా ఉంటుంది. ఇది ఇమ్యూనిటీ పవర్ పెంచుతుంది. దోరగా ఉన్న బొప్పాయి పండు తినడం వల్ల రక్తపోటు కంట్రోల్‌లో ఉంటుంది. ఇందులో ఉండే విటమిన్ ఎ కంటి ఆరోగ్యాన్ని మెరుగుపరుస్తుంది. దంతాల ఆరోగ్యానికి కూడా బొప్పాయి బెస్ట్ ఆప్షన్. ఇక, బొప్పాయి గింజల్లో కూడా అనేక పోషకాలు ఉంటాయి.

బొప్పాయి గింజల్లో ఉండే పోషకాలు

ఈ విత్తనాల్లో ఆరోగ్యకరమైన కొవ్వులు, ప్రోటీన్లు, విటమిన్లు, జింక్, భాస్వరం, కాల్షియం, మెగ్నీషియం వంటి అనేక పోషకాలు కనిపిస్తాయి. అంతేకాకుండా బొప్పాయి గింజల్లో ఫైబర్ కూడా పుష్కలంగా ఉంటుంది. బొప్పాయి గింజల్లో కార్పైన్ ఉంటుంది. ఇది జీర్ణ ఆరోగ్యాన్ని ప్రోత్సహిస్తుంది. బొప్పాయి గింజల్ని తీసుకోవడం వల్ల కలిగే ఆరోగ్య ప్రయోజనాలేంటో ఇక్కడ తెలుసుకుందాం.

చెడు కొలెస్ట్రాల్‌కి చెక్

మన శరీరంలో చెడ్డ కొలెస్ట్రాల్‌ (ఎల్‌డీఎల్‌) ఎక్కువైతేనే ప్రమాదం. చెడు కొలెస్ట్రాల్‌ ఎక్కువగా ఉంటే.. గుండె జబ్బులు, స్ట్రోక్, గుండెపోటు, హైపర్‌టెన్షన్‌ వచ్చే ప్రమాదం ఎక్కువగా ఉంటుంది. అందుకే చెడు కొలెస్ట్రాల్‌ని తగ్గించుకోవాలి. బొప్పాయి గింజల్లో ఉండే ఫైబర్ శరీరంలోని కొలెస్ట్రాల్ స్థాయిల్ని తగ్గించడంలో సాయపడతాయి. అంతేకాకుండా ఈ గింజల్లో ఒలీక్ ఆమ్లం, మోనోశాచురేటెడ్ కొవ్వు ఆమ్లాలు కనిపిస్తాయి. ఇవి చెడు కొలెస్ట్రాల్‌ను తగ్గిస్తాయి.

గట్ హెల్త్

బొప్పాయి గింజల్లో కార్పైన్ ఉంటుంది. ఇది జీర్ణ ఆరోగ్యాన్ని ప్రోత్సహిస్తుంది. దీనిలో ఉండే ఫైబర్ మలవిసర్జన ప్రక్రియను సులభతరం చేస్తుంది. మలబద్ధక సమస్యతో బాధపడేవారికి ఈ గింజలు బెస్ట్ ఆప్షన్. ఈ చిన్న విత్తనాలలో పపైన్, కైమోపాపైన్ వంటి ఎంజైమ్‌లు ఉంటాయి. ఇవి జీర్ణక్రియకు సహాయపడతాయి. గ్యాస్, ఉబ్బరం, కడుపు నొప్పి వంటి లక్షణాల్ని బొప్పాయి గింజలు తగ్గిస్తాయి.

క్యాన్సర్ నిరోధక లక్షణాలు

బొప్పాయి గింజల్లో క్యాన్సర్ నిరోధక లక్షణాలు పుష్కలంగా ఉన్నాయి. ఈ విత్తనాలలో కనిపించే ఐసోథియోసైనేట్స్ వంటి సమ్మేళనాలు క్యాన్సర్ కణాల పెరుగుదలను నిరోధిస్తాయి. దీంతో, క్యాన్సర్ రాకుండా నిరోధించడంలో బొప్పాయి గింజలు సాయపడతాయి. వీటిని తీసుకోవడం వల్ల ఇమ్యూనిటీ పవర్ కూడా పెరుగుతుంది. బొప్పాయి గింజల్లో విటమిన్ సి ఎక్కువగా ఉంటుంది.

చర్మ, జుట్టు సంరక్షణ

బొప్పాయి గింజల్లో యాంటీఆక్సిడెంట్లు, విటమిన్లు, ఖనిజాలు పుష్కలంగా ఉంటాయి. ఇవి చర్మ సంబంధిత సమస్యలను తగ్గిస్తాయి. ఈ గింజలు జుట్టు పెరుగుదలకు కూడా సహాయపడతాయి. చర్మం, జుట్టు సంరక్షణ కోసం బొప్పాయి గింజల సారం లేదా నూనెను ఉపయోగించవచ్చు.

బొప్పాయి గింజల్ని ఎలా తీసుకోవాలంటే

పండిన బొప్పాయి నుంచి గింజలను తీసి శుభ్రంగా కడగాలి. ఆ తర్వాత వీటిని ఎండబెట్టి పొడి చేసుకోవాలి. ఈ పొడిని నీటిలో కలిపి తాగవచ్చు. లేదా స్మూతీస్, పాలలో కూడా కలిపి తీసుకోవచ్చు. ఈ గింజల్ని ఎండబెట్టి నేరుగా కూడా తినవచ్చు. ఉదయాన్నే ఖాళీ కడుపుతో బొప్పాయి గింజల పొడిని గ్లాసు నీటిలో కలిపి తీసుకోవచ్చు. ఇలా తీసుకోవడం శరీరానికి ఎన్నో ప్రయోజనాలు చేకూరతాయి.