బెంగళూరులో ప్రముఖ ర్యాపర్ ఆత్మహత్య

దేశంలో భార్య బాధితుల ఆత్మహత్యలు ఆందోళనకు గురిచేస్తున్నాయి. తాజాగా, ఒడిశాకు చెందిన ప్రముఖ సింగర్, ర్యాపర్ అభినవ్ సింగ్ బెంగళూరులో ఆత్మహత్యకు పాల్పడ్డాడు. అతడు తన గదిలో విషం తాగి ఆత్మహత్య చేసుకున్నాడు. ఒడిశా నుంచి బెంగళూరుకు వచ్చిన వారం రోజుల్లోనే ఈ విషాదం చోటుచేసుకుంది. వైవాహిక జీవితంలో ఒడిదొడుకులు, భార్య, ఆమె కుటుంబసభ్యుల వేధింపులతోనే తన కుమారుడు బలవన్మరణానికి పాల్పడినట్టు అభినవ్ తండ్రి బిజయ్ ఆరోపించారు. ఈ మేరకు మారతహళ్లి పోలీస్ స్టేషన్‌లో ఆయన ఫిర్యాదు చేశారు. దీంతో కేసు నమోదుచేసిన పోలీసులు.. దర్యాప్తు చేస్తున్నారు.

ఒడిశాలోని కటక్‌కు చెందిన అభినవ్ సింగ్.. జగ్గర్నాట్‌గా గుర్తింపు పొందిన ఒడియా ర్యాపర్. అతడు ఫిబ్రవరి 9న బెంగళూరులోని కడుబీసనహళ్లిలోని తాను అద్దెకు ఉండే అపార్ట్ మెంట్‌లో విషం తాగి ఆత్మహత్యకు పాల్పడ్డాడు. ఆ రోజు రాత్రి స్నేహితులతో కలిసి డిన్నర్‌కు వెళ్లిన అభినవ్.. తన గదికి తిరిగొచ్చిన తర్వాత విషం తాగాడు. ఈ ఘటన గురించి సమాచారం అందుకున్న పోలీసులు ఘటనాస్థలికి చేరుకుని, మృతదేహాన్ని స్వాధీనం చేసుకున్నారు. ఆత్మహత్యగా కేసు కేసు నమోదు చేసి.. పోస్టుమార్టం అనంతరం మృతదేహాన్ని అభినవ్ కుటుంబానికి అప్పగించారు.

అభినవ్ సింగ్ ఆత్మహత్యకు భార్య, ఆమె తరఫు బంధువుల వేధింపులే కారణమని మొత్తం 10 మంది పేర్లను పోలీసులకు చేసిన ఫిర్యాదులో అతడి తండ్రి పేర్కొన్నాడు. ఒడియా ర్యాప్ సాంగ్స్‌తో అభినవ్ పాపులర్ అయ్యారు. కథక్ ఆంథమ్ సాంగ్ సూపర్ హిట్‌గా నిలవడంతో మరింత ఒడియాలో మంచి గుర్తింపు తీసుకొచ్చింది. చాలా మంది ప్రముఖ కళాకారులతో కలిసి పని చేశాడు.

భార్యతో వివాదాల వల్లే ఆత్మహత్య చేసుకున్నాడని బాధిత కుటుంబం ఫిర్యాదు చేసిందని పోలీసులు తెలిపారు. భార్య వేధింపులా? వేరే ఇతర కారణాలు ఉన్నాయా.. అనే కోణంలో దర్యాప్తు చేస్తున్నట్టు చెప్పారు. అతడు తాగిన విషం? ఏంటనేది తెలియదని.. ల్యాబ్‌ పరీక్షలకు నమూనాలను పంపామని వివరించారు. ఎలాంటి సూసైడ్ నోట్ లభ్యం కాలేదన్నారు. కానీ, అతడి తల్లి మాత్రం తన కొడుకు రాసిన సూసైడ్ నోట్ బెంగళూరు పోలీసులు స్వాధీనం చేసుకున్నారని చెప్పడం గమనార్హం.

గతంలో చాలా ఏళ్లు బెంగళూరులోని ఓ ప్రముఖ సంస్థలో ఆటోమేషన్ టెస్టింగ్ ఇంజినీర్‌గా పనిచేశాడు. గతేడాది భువనేశ్వర్‌లోని ఓ హోటల్‌లో మరో మహిళతో ఉండగా.. భార్య‌కు రెడ్ హ్యాండెడ్‌ దొరికిపోయినట్టు స్థానిక మీడియా తెలిపింది. అప్పట్లో వీడియో సోషల్ మీడియాలో వైరల్ కాగా.. ఇది కుట్రపూరితంగా జరిగిందని అభినవ్ ఆరోపించారు. తన మ్యూజిక్ ఆల్బమ్ విడుదల కాకుండా అడ్డుకోడానికే కుట్రలు చేశారని తెలిపారు.

ఈ ఘటన తర్వాత మద్యానికి బానిసై ఏడాది పాటు తీవ్ర ఒత్తిడి, వ్యక్తిగత ఇబ్బందులతో పోరాడిన అభినవ్.. వాటి నుంచి ఇటీవలే కోలుకున్నాడు. తండ్రి సహకారంతో వాటి నుంచి బయటపడి కొత్త జీవితం మొదలుపెట్టిన అభినవ్.. ఇటీవలే ఉద్యోగంలో చేరాడు. అంతలోనే ఈ ఘోరం జరిగిపోయింది.