మాధబి పురీపై ఎఫ్ఐఆర్ నమోదు చేయండి.. ముంబై కోర్టు ఆదేశాలు

స్టాక్ మార్కెట్ అవకతవకలు, నియంత్రణల ఉల్లంఘనలపై స్టాక్ మార్కెట్ నియంత్రణ సంస్థ సెబీ మాజీ చీఫ్ మాధబి పురీ బచ్‌తో సహా ఐదుగురు సెబీ ఉన్నత అధికారులపై ఎఫ్ఐఆర్ నమోదు చేయాల్సిందిగా ముంబైలోని ప్రత్యేక న్యాయయస్థానం శనివారం రోజు ఆదేశాలు జారీ చేసింది. దీనికి సంబంధించి పలు ఆంగ్ల మీడియాల్లో కథనాలు వస్తున్నాయి. స్టాక్ ఎక్స్చేంజీల్లో కంపెనీల్ని లిస్ట్ చేయడంలో పెద్ద ఎత్తున అవినీతి, ఆర్థిక మోసం జరిగిందని ఆరోపిస్తూ.. ఠాణేకు చెందిన జర్నలిస్ట్ సవన్ శ్రీవాత్సవ పిటిషన్ దాఖలు చేయగా.. దీనిపై విచారణ జరిపిన ముంబై స్పెషల్ కోర్టు ప్రత్యేక న్యాయమూర్తి ఎస్ఈ బంగర్ తాజాగా ఉత్తర్వులు జారీ చేశారు.

సెబీ అధికారులు తమ విధి నిర్వహణలో విఫలమయ్యారని .. మార్కెట్లో అవకతవకలకు పాల్పడి.. కార్పొరేట్ మోసానికి పాల్పడ్డట్లు ఫిర్యాదులో పేర్కొన్నారు. కార్పొరేట్ సంస్థతో కుమ్మక్కై.. ఇన్‌సైడర్ ట్రేడింగ్‌కు పాల్పడినట్లు ఆరోపించారు.

>> ఇక గత కొన్ని నెలలుగా మాధబి పురీ బచ్ ఎన్నో వివాదాల్లో చిక్కుకుంటున్నారు. ముఖ్యంగా అదానీ గ్రూప్‌కు చెందిన ఆఫ్ షోర్ కంపెనీల్లో ఆమె పెట్టుబడులు పెట్టారని.. గత సంవత్సరం ఆగస్టులో హిండెన్‌బర్గ్ రీసెర్చ్ చేసిన పోస్ట్ సంచలనంగా మారింది. తర్వాత ఆమెపైన మరికొన్ని ఆరోపణలు కూడా వచ్చాయి. దీంట్లో ఆమె భర్త ధావల్ బచ్‌కు కూడా పెట్టుబడులు ఉన్నట్లు పేర్కొనడం విస్తృత చర్చకు దారి తీసింది. అయితే వీటిని ఖండించిన బచ్ దంపతులు.. ఇవన్నీ తప్పుడు ఆరోపణలే అని వివరణ ఇచ్చారు.

గతంలో కూడా సెబీ మాజీ చీఫ్‌పై అదానీ వ్యవహారానికి సంబంధించి ఆరోపణలు వచ్చాయి. దీనిపై గతేడాది అక్టోబరులో తమ ముందు హాజరు కావాలని పార్లమెంటరీ కమిటీ కూడా సమన్లు జారీ చేసింది. అప్పుడు దేశంలోని ఈ టాప్ రెగ్యులేటరీ అథారిటీల పనితీరు సమీక్షించాలని కమిటీ నిర్ణయించింది. ఐసీఐసీఐ బ్యాంకు జీతభత్యాల విషయంలోనూ వివాదం తలెత్తింది. సెబీ కొత్త తుహిన్ కాంత్ పాండే ఇటీవల నియమితులయ్యారు. ఆర్థిక శాఖ కార్యదర్శిగా ఉన్న ఆయనను సెబీ చీఫ్‌గా నియమించారు. మూడేళ్ల పాటు ఆయన పదవిలో కొనసాగనున్నారు.