వీటిల్లోనే అధిక వడ్డీ.. రూ. 5 లక్షలపై ఎంతొస్తుంది

గతంలో ఆర్బీఐ కీలక రెపో రేట్లను వరుసగా పెంచుకుంటూ గరిష్ట స్థాయిలకు చేర్చిన సంగతి తెలిసిందే. ఒకప్పుడు 4 శాతంగా ఉండగా.. దీనిని ఏడాదిన్నర వ్యవధిలోనే దాదాపు 250 బేసిస్ పాయింట్లు పెంచి 6.50 శాతానికి పెంచింది. ఇదే గరిష్ట స్థాయి అని చెప్పొచ్చు. ఈ క్రమంలోనే చాలా బ్యాంకులు లోన్ వడ్డీ రేట్లు పెంచి.. మరోవైపు ఫిక్స్‌డ్ డిపాజిట్లపైనా అధిక వడ్డీ రేట్లు ఆఫర్ చేశాయి. ఇంకా చాలా బ్యాంకులు కస్టమర్లను ఆకర్షించేందుకు మరింత అధిక వడ్డీతో ప్రత్యేక ఫిక్స్‌డ్ డిపాజిట్ పథకాల్ని లాంఛ్ చేశాయి. ఇందులో భాగంగానే.. స్టేట్ బ్యాంక్ ఆఫ్ ఇండియా కూడా చాలా స్పెషల్ స్కీమ్స్ తీసుకొచ్చింది. వీటి కింద అధిక వడ్డీ రేట్లు ఆఫర్ చేస్తోంది.

అందులో ఒకటి ఎస్బీఐ అమృత్ వృష్టి పథకం. ఇక్కడ కాల వ్యవధి 444 రోజులుగా ఉంది. ఎస్బీఐలో డిపాజిట్లపై అన్నింటికంటే ఎక్కువ వడ్డీ ఈ స్కీంలోనే ఉంది. ఇక్కడ సాధారణ ప్రజలకు 444 రోజుల వ్యవధిపై అత్యధికంగా 7.25 శాతం వడ్డీ రేటు ఉంది. ఇదే సమయంలో సీనియర్ సిటిజెన్లకు అదనంగా 50 బేసిస్ పాయింట్లు అంటే 7.75 శాతం మేర వడ్డీ అందుతుంది. అయితే ఇందులో చేరేందుకు ఆఖరి తేదీ 2025, మార్చి 31 గా ఉంది. అంటే ఈ నెలాఖర్లోగా ఇందులో చేరాలి. ఆ తర్వాత ఉండకపోవచ్చు. ఆర్బీఐ ఇటీవల రెపో రేట్లను తగ్గించిన క్రమంలో.. ఈ స్కీంను ఎస్బీఐ మళ్లీ పొడిగించే అవకాశాలు లేనట్లు కనిపిస్తోంది.

ఇక ఈ పథకంలో రూ. 5 లక్షలు ఒకేసారి జమ చేసినట్లయితే సాధారణ ప్రజలకు 444 రోజులకు రూ. 44,194 వడ్డీ వస్తుంది. ఇదే సీనియర్ సిటిజెన్లకు 7.75 శాతం కింద రూ. 47,243 వడ్డీ అందుతుంది. ఇక్కడ రూ. 3 కోట్ల వరకు ఎంతైనా ఇన్వెస్ట్ చేయొచ్చు. ఎస్బీఐ నుంచి అందుబాటులో ఉన్న ప్రత్యేక ఎఫ్‌డీ స్కీమ్ ఎస్బీఐ అమృత్ కలశ్ పథకం. ఇక్కడ సాధారణ ప్రజలకు 7.10 శాతం వడ్డీ రేటు ఉంది. సీనియర్ సిటిజెన్లకు 7.60 శాతం వడ్డీ అందుతుంది. ఈ స్కీమ్ టెన్యూర్ 400 రోజులుగా ఉంది. ఇందులో కూడా చేరేందుకు ఆఖరి తేదీ మార్చి 31. ఇక్కడ రూ. 5 లక్షలు జమ చేసినట్లయితే 7.10 శాతం వడ్డీ రేటు ప్రకారం జనరల్ సిటిజెన్స్‌కు రూ. 39,002 వడ్డీ వస్తుంది. సీనియర్ సిటిజెనల్కు 7.60 శాతం వడ్డీ రేటు కింద రూ. 41,744 వడ్డీ వస్తుంది.