న్యూజిలాండ్ పర్యటనలో తొలి మ్యాచ్‌లో పాక్ చిత్తు,,,,పాకిస్థాన్ క్రికెట్ టీమ్‌పై సోషల్ మీడియాలో ట్రోల్స్‌

ఫార్మాట్ ఏదైనా గత కొన్ని నెలలుగా ప్రపంచ క్రికెట్‌లో పాకిస్థాన్ జట్టు పేలవ ప్రదర్శన చేస్తోంది. జట్టులో ఎన్ని మార్పులు చేర్పులు చేసినా.. ఆటతీరులో మాత్రం మార్పు రావట్లేదు. గతేడాది జరిగిన టీ20 ప్రపంచకప్‌ 2024లో లీగ్ దశ నుంచే నిష్క్రమించిన ఆ జట్టు.. తాజాగా ఇటీవల పాకిస్థాన్ వేదికగా జరిగిన ఛాంపియన్స్ ట్రోఫీ 2025లోనూ నాకౌట్ చేరలేదు. కనీసం ఒక్క మ్యాచ్ కూడా గెలవలేదు.

దీంతో ఈ ఏడాది చివర్లో జరగనున్న ఆసియా కప్, వచ్చే ఏడాది భారత్‌లో జరగనున్న టీ20 ప్రపంచకప్‌ కోసం జట్టును సిద్ధం చేయడమే లక్ష్యంగా ఆ జట్టు భారీ మార్పులు చేసింది. సీనియర్ ప్లేయర్లు మహమ్మద్ రిజ్వాన్, బాబార్ ఆజమ్‌లపై వేటు వేసింది. యువప్లేయర్ సల్మాన్ అఘాకు టీ20 కెప్టెన్సీ అప్పగించింది. ఛాంపియన్స్ ట్రోఫీ తర్వాత న్యూజిలాండ్ పర్యటనకు వెళ్లింది.

కాగా ఈ పర్యటన ప్రారంభానికి ముందు పాక్ కొత్త కెప్టెన్ సల్మాన్ అఘా.. తమ జట్టులో ఎంతో మంది యువ క్రికెటర్లు ఉన్నారని.. ఎలాంటి భయం లేకుండా.. క్రికెట్ ఆడతామని ప్రగల్భాలు పలికాడు. అయితే న్యూజిలాండ్ పర్యటనలో భాగంగా తొలి మ్యాచ్‌లోనే ఆ జట్టుకు షాక్ తలిగింది. భయం లేకుండా క్రికెట్ ఆడటం అటుంచితే.. కనీసం పూర్తి ఓవర్ల పాటు బ్యాటింగ్ కూడా చేయలేకపోయింది. ప్రత్యర్థి జట్టులో రెండు వికెట్లు కూడా పడగొట్టలేకపోయింది. దీంతో ఆ జట్టుపై విమర్శల వర్షం కురుస్తోంది.

న్యూజిలాండ్ పర్యటనలో భాగంగా పాక్ జట్టు.. నేడు తొలి టీ20 మ్యాచ్‌లో తలపడింది. ఈ మ్యాచ్‌లో పాకిస్థాన్.. 18.4 ఓవర్లలో 91 పరుగులకే కుప్పకూలింది. అనంతరం న్యూజిలాండ్.. 10.1 ఓవర్లలో ఒక్క వికెట్ మాత్రమే కోల్పోయి.. లక్ష్యాన్ని ఛేదించింది. దీంతో మూడు మ్యాచ్‌ల సిరీస్‌లో 1-0 ఆధిక్యంలోకి వెళ్లింది. అయితే పాకిస్థాన్ ఈ మ్యాచ్‌లో గెలవకపోయేందనే బాధ కంటే కూడా.. చిత్తుగా ఓడిన విషయంపై ఆ జట్టు ఫ్యాన్స్‌ను తీవ్రంగా బాధపెడుతోంది. ఇదేనా ఫియర్‌లెస్ క్రికెట్ అని ఆ జట్టు అభిమానులు ప్రశ్నిస్తున్నారు.