పుడమి తల్లి మిమ్మల్ని మిస్ అయింది..: ప్రధాని మోదీ

సుదీర్ఘ నిరీక్షణ తర్వాత భారత సంతతి వ్యోమగామి సునీతా విలియమ్స్ అంతర్జాతీయ అంతరిక్ష కేంద్రం నుంచి భూమికి తిరిగి వచ్చారు. దాదాపు 9 నెలల పాటు అక్కడే ఉన్న ఆమె బుధవారం రోజు తెల్లవారుజామున 3.27 గంటలకు అమెరికాలోని ఫ్లోరిడా తీరంలో క్షేమంగా ల్యాండ్ అయ్యారు. వ్యోమగాములు సురిక్షితంగా భూమ్మీదకు రావడంతో.. ప్రంపంచ వ్యాప్తంగా ఉన్న ప్రజలంతా హర్షం వ్యక్తం చేస్తున్నారు. ముఖ్యంగా ప్రధాని నరేంద్ర మోదీ సైతం వీరి రాకకోసం ఎదురు చూడగా.. వారు భూమ్మీదకు చేరుకున్నట్లు తెలిసిన వెంటనే ఎక్స్ వేదికగా పోస్ట్ పెట్టి మరీ సునీతా విలియమ్స్‌కు స్వాగతం పలికారు. ఆ పూర్తి వివరాలు మీకోసం.

ప్రధాని మోదీ ఎక్స్ వేదికగా స్పందిస్తూ.. వెల్‌కమ్ బ్యాక్ క్రూ9.. భూమి మిమ్మల్ని ఇన్నాళ్లూ మిస్ అయిందంటూ వివరించారు. మీ అపరిమత ధైర్యం, క్లిష్టమైన, అనిశ్చిత పరిస్థితుల్లో అచంచలమైన సంకల్పంతో ఎంతో మందికి ఆదర్శంగా నిలిచారన్నారు. అంతరిక్ష అన్వేషణ అంటే మానవ శక్తి పరిమితులను దాటి ముందుకు వెళ్లడం అని, కలలు కనే ధైర్యం కల్గి ఉండడం అని మోదీ వ్యాఖ్యానించారు. ఈ విషయంలో సునీతా తన కెరియర్ అంతా గొప్ప స్ఫూర్తిని ప్రదర్శించి లక్షల మందికి మార్గదర్శకంగా నిలిచారన్నారు.

అంతేకాకుండా సునీతా విలియమ్స్ ఓ ఐకాన్ అని.. మార్గదర్శకురాలు అంటూ చెప్పుకొచ్చారు. సునీతతో పాటు మిగిలిన వ్యోమగాములను సురక్షితంగా భూమి పైకి తీసుకు వచ్చేందుకు అవిశ్రాంతంగా చేసిన కృషి పట్ల గర్వపడుతున్నామని వివరించారు. అభిరుచి, సాంకేతికత కలగలిస్తే ఎలాంటి అద్భుతాలు జరుగుతాయో చూపించారని అన్నారు. అలాగే గతంలో ప్రధాని మోదీ అమెరికా పర్యటనకు వెళ్లినప్పుడు సునీత కుటుంబంతో కలిసి దిగిన ఫొటోను పోస్ట్ చేశారు. ప్రధాని మోదీ చేసిన ఈ ట్వీట్ ప్రస్తుతం నెట్టింట వైరల్ అవుతోంది.

ఇదంతా ఇలా ఉండగా.. ప్రధాని మోదీ సునీతా విలియమ్స్ కు రాసిన లేఖ సైతం నిన్ననే వెలుగులోకి వచ్చింది. ముఖ్యంగా మార్చి 1వ తేదీన రాసిన ఈ లేఖను మంగళ వారం రోజు కేంద్రమంత్రి జితేంద్ర సింగ్ సోషల్ మీడియా వేదికగా ప్రజలతో పంచుకున్నారు. అందులో ప్రధాని మోదీ సునీతా విలియమ్స్‌ను ఉద్దేశించి అనేక విషయాల గురించి మాట్లాడారు. ముఖ్యంగా ఆమె భూమ్మీదకు తిరిగి వచ్చిన తర్వాత.. ఇండియాలో ఆమెను చూడాలని కోరుకుంటున్నట్లు వెల్లడించారు. దీనిపై స్పందించిన సునీతా కుటుంబ సభ్యులు.. ఆమె త్వరలోనే భారత దేశానికి వస్తుందని చెప్పారు.