సీక్రెట్‌గా రెండో పెళ్లి చేసుకున్న తండ్రి.. తెలీకుండా ఆమెతోనే ప్రేమలో పడ్డ కొడుకు

18 ఏళ్ల యువకుడికి ఆన్‌లైన్ ద్వారా ఓ అమ్మాయి పరిచయం అయింది. చాటింగ్‌తో ప్రారంభం అయిన వీరి స్నేహం ప్రేమగా మారింది. ఈక్రమంలోనే వీరిద్దరూ నెంబర్లు ఇచ్చిపుచ్చుకుని 6 నెలలుగా రోజంతా మాట్లాడుకుంటూనే ఉంటున్నారు. అయితే అనుకోకుండా ఓరోజు యువకుడు తన తండ్రి ఫోన్ చూశాడు. అప్పుడే తన ఆన్‌లైన్ ప్రేయసే.. తన తండ్రి రెండో భార్య అని తెలుసుకుని షాక్ అయ్యాడు. ఏం చేయాలో పాలుపోక మహిళకు ఫోన్ చేసి అడగ్గా తాను కూడా నిజం ఒప్పకుంది. అపై ఏం జరిగిందో తెలియాలంటే మనం ఈ కథ చదివేయాల్సిందే.

పశ్చిమ బెంగాల్‌లోని ముర్షిదాబాద్ జిల్లాకు చెందిన 18 ఏళ్ల యువకుడికి ఆన్‌లైన్‌లో ఓ అమ్మాయి పరిచయం అయింది. అయితే తనకు ఇది వరకే పెళ్లి అయిందని.. కాకపోతే విడాకులు తీసుకని వేరుగా ఉంటున్నట్లు చెప్పింది. ఆమె నిజాయితీ నచ్చడంతో అతడికి ఆమెపై ప్రేమ పుట్టింది. ఇదే విషయాన్ని అమ్మాయికి చెప్పగా ఆమె కూడా ఒప్పుకుంది. ఈక్రమంలోనే ఇద్దరూ ప్రతిరోజూ మాట్లాడుకునే వారు. భవిష్యత్తులో పెళ్లి కూడా చేసుకోవాలని నిర్ణయించుకున్నారు.

ఇదంతా ఇలా ఉండగా.. ఓరోజు తండ్రి సిలిండర్ బుక్ చేయమంటూ ఫోన్ ఇచ్చాడు. అది తీసుకున్న కుమారుడు అనుకోకుండా ఓ మహిళతో తండ్రి చాటింగ్ చేయడం గమనించాడు. అది చూసిన వెంటనే షాక్‌కు గురయ్యాడు. ముఖ్యంగా తాను ప్రేమిస్తున్న యువతే.. తన తండ్రి రెండో భార్య అని గుర్తించాడు. వెంటనే ఆమెకు ఫోన్ చేసి సూటిగా అడిగేశాడు. దీంతో ఆమె అవునని చెప్పగా షాకయ్యాడు. ఇష్టం వచ్చినట్లుగా అరిచేసి ఫోన్ కట్ చేశాడు.

తల్లి చనిపోయిన తర్వాత నుంచి ఒంటరిగానే ఉంటున్నట్లు నటిస్తున్న తండ్రి.. సీక్రెట్‌గా రెండో పెళ్లి చేసుకోవడం, అందులోనూ తాను కూడా అదే అమ్మాయిని ప్రేమించడంతో.. విపరీతంగా కుంగిపోయాడు. పదే పదే ఆ విషయాన్ని తలుచుకుని విపరీతంగా ఏడుస్తూ.. ఆ బాధను తట్టుకోలేక పురుగుల మందు తాగేశాడు. మరోవైపు సదరు యువతి తన భర్తకు ఫోన్ చేసి.. మీ బాబు ఫోన్ చేశాడు మన గురించి తెలిసిపోయిందని చెప్పగా.. వెంటనే ఇంటికెళ్లాడు. అయితే అప్పటికే కుమారుడు పురుగుల మందు తాగి వాంతులు చేసుకుంటుండగా.. వెంటనే ఆస్పత్రిలో చేర్చించాడు. సరైన సమయంలో దవాఖానాకు తీసుకెళ్లడంతో.. యువకుడు ప్రాణాలతో బయట పడ్డాడు.