ఈ ఆఫీసర్ మామూలోడు కాదు.. లంచంగా డబ్బులే కాదు, అంతకుమించి

ప్రభుత్వాలు ఎన్ని చర్యలు తీసుకుంటున్నప్పటికీ గవర్నమెంట్ ఆఫీసుల్లో తీరు మారడం లేదు. కొంతమంది అధికారుల కక్కుర్తి కారణంగా ప్రభుత్వ కార్యాలయాలు అంటేనే ప్రజలకు ఒక రకమైన దురభిప్రాయం ఏర్పడింది. దానిని నిజం చేస్తూ ఓ ఘటన తాజాగా చోటుచేసుకుంది. మనోడి యవ్వారం చూసి ఏకంగా అధికారులే విస్తుపోయారు. సాధారణంగా ఏదైనా పని చేయాలంటే లంచం డిమాండ్ చేయడం చూస్తుంటాం. కానీ ఇప్పుడు చెప్పబోయే ఆఫీసర్‌కు కాసులు మాత్రమే కాదండోయ్.. అంతకుమించి కావాలి. అవినీతి నిరోధక శాఖ అధికారుల సోదాల్లో మనోడి బండారం బట్టబయలైంది.

కాకినాడ అవినీతి నిరోధక శాఖ అధికారులు వెల్లడించిన వివరాల ప్రకారం.. తునికి చెందిన రమేష్‌బాబు భార్య సమత.. ఓ గ్యా్స్ ఏజెన్సీ నిర్వహిస్తున్నారు. అయితే ఒక్కరే నిర్వహించడం కష్టం కావటంతో భర్త రమేష్‌బాబును కూడా భాగస్వామ్యులను చేసుకోవాలని నిర్ణయించుకున్నారు. దీంతో రమేష్‌బాబుతో కలిసి పార్ట్‌నర్‌షిప్ రాయించుకుని,, ఆ పార్ట్‌నర్‌షిప్ డాక్యుమెంట్స్ రిజిస్ట్రేషన్ కోసం కాకినాడ జిల్లా రిజిస్ట్రార్ కార్యాలయాన్ని సంప్రదించారు. అయితే కాకినాడ జిల్లా రిజిస్ట్రార్‌గా ఉన్న ఆనందరావు.. దీనిని తిరస్కరించారు. దీంతో ఎందుకు తిరస్కరించారో కారణం చెప్పాలంటూ సమత భర్త రమేష్‌బాబు వారిని కోరారు.

అప్పుడే జిల్లా రిజిస్ట్రార్ ఆనందరావులోని లంచాధికారి బయటకు వచ్చాడు. సీనియర్‌ అసిస్టెంట్‌ శ్రీనివాసరెడ్డితో కలిసి కాకినాడ జిల్లా రిజిస్ట్రార్‌గా ఉన్ ఆనందరావు రూ.లక్ష లంచం డిమాండ్‌ చేశారు. దీంతో బాధితులు అవినీతి నిరోధక శాఖ అధికారులను సంప్రదించారు. ఏసీబీ అధికారుల సూచన మేరకు.. శుక్రవారం జిల్లా రిజిస్ట్రార్ కార్యాలయానికి చేరుకున్నారు. తమ వెంట లక్ష రూపాయలు నగదు తీసుకువచ్చిన రమేష్ బాబు దంపతులు.. జిల్లా రిజిస్ట్రార్ సూచించిన విధంగా అసిస్టెంట్‌ డాక్యుమెంట్‌ రైటర్‌‌ జగదీష్‌కు సొమ్ము అందజేశారు. ఈ సమయంలోనే తనిఖీలు చేసిన అవినీతి నిరోధక శాఖ అధికారులు.. రెడ్ హ్యాండెడ్‌గా పట్టుకున్నారు.

అనంతరం జిల్లా రిజిస్ట్రార్ కార్యాలయంలో సోదాలు చేసిన ఏసీబీ అధికారులు జిల్లా రిజిస్ట్రార్, సీనియర్‌ అసిస్టెంట్ల వద్ద అనధికారికంగా ఉన్న నగదును స్వాధీనం చేసుకున్నారు. మరో రూ.1.50 లక్షలు నగదు స్వాధీనం చేసుకున్నారు. అలాగే రిజిస్ట్రార్ ఆనందరావు కారును తనిఖీ చేసిన అధికారులు షాక్ తిన్నారు. కారులో ఉంచిన 13 ఖరీదైన విదేశీ మద్యం సీసాలను స్వాధీనం చేసుకున్నారు. అలాగేలెక్కల్లో లేని రూ.7,87,200 ఏసీబీ స్వాధీనం చేసుకున్నారు. మద్యం సీసాలను ఎక్సైజ్‌ అధికారుల చేతికి అప్పగించారు. సదరు రిజిస్ట్రార్ నగదుతో పాటుగా ఖరీదైన మద్యం బాటిళ్లను కూడా లంచంగా తీసుకుంటున్నట్లు గుర్తించారు.